Tàm pơn jăt rài kis ñhăp ñhar tàm ƀòn dờng Hồ Chí Minh dê, ală mang lồi poh pa do, geh uă cau năc lòt nhơl tus bơh ală lơgar bal mờ làng bol kis tàm ƀòn dờng do jòi tus dùl broă lơh krơi is. Ờ di tiah tòm kă bro phan ha là gùng lòt jơng, ală cau do rơwah nggui tàm dùl anih nàng sền đơs crih, bal mờ ală gùng đơs crih geh uă bơta niam chài jơi bơtiàn Việt Nam dê, geh yal mờ gùng đơs crih pa. Tàm do, săp ntas đờng tranh, đờng bầu, đờng nhị, đờn T’rưng, đờng lŭ ha là ală săp dròng cing Tây Nguyên mpong sùm tàm mpồl phan pờ jơnau đơs 3D pa, ai cau sền mŭt tàm broă jòi sền bơta niam chài Việt Nam dê, bơh tiah đah Tô mŭt tàm đah Jum. Rơlao 30 nơm phan teh phan uh jơi bơtiàn dê bal mờ 12 gùng đơs crih pa neh lơh geh bơta niam bơh uă tiah dê, ai geh dùl broă lơh geh sền niam bè ờs mờ pa ngan.

Hơ̆ là broă lơh đơs crih tamya “Chờ gờm Show”, geh bơyai lơh tàm hìu sồ 06 gùng Nguyễn Siêu, sơnah ƀòn Sài Gòn, ƀòn dờng Hồ Chí Minh dê. Tus tàm do, cau sền ờ mìng geh sền đơs crih tamya, mờ gam geh sa ală phan sa krơi is pe tiah đah Tô – tàm Gùl – đah Jum tai. Broă pơgồp bal đah gùng đơs crih, rùp rài mờ phan sa, dong kờl pah mang geh bơyai lơh gơs dùl dơ̆ lòt nhơl sền bơta niam chài Việt Nam mờ uă bơta krơi is ngan.

Sùm ơwañ să jan jăt gùng đơs crih, ồng Edgar, cau năc lòt nhơl tus bơh lơgar Canada pà git, ồng neh lòt uă tiah tàm lơgar Việt Nam, mơya do là dơ̆ sơnrờp ồng geh iăt mờ sền gŏ uă phan teh geh lơh bal dùl dơ̆ lĕ. Ồng đơs là, hơ̆ là dùl dơ̆ sền niam bơnĕ ngan. “Mùl màl nàng gơtùi đơs, añ gơlơh nùs nhơm niam bơnĕ ngan. Añ ờ kơlôi là broă lơh đơs crih tamya do geh ngui uă phan teh bè do. Bơta lơh añ gơboh ngan là geh uă bơta phan teh mờ añ dơ̆ sơnrờp sền gŏ mờ iăt. Broă geh sền mờ iăt uă bơta phan teh krơi is bè do dơ̆ lĕ bal là dùl dơ̆ sền niam bơnĕ ngan. Dơ̆ sa phan mang do kung bơkah ngan, geh piang, geh ƀañ mi mờ uă phan sa bơkah ndai lơgar Việt Nam dê”.

Tàm tŭ hơ̆, lŏ Zamanie, cau nắc lòt nhơl tus bơh lơgar Mỹ pà git, broă lơh đơs crih tamya do neh rơlao mờ jơnau kơ̆p kờñ tŭ geh dong kờl lŏ sền gŏ jơnau yal bè bơta niam chài bal mờ kòn bơnus lơgar Việt Nam dê bơh gùng đơs crih. Bơta lời wơl niam tàm nùs nhơm lŏ dê là bơta pràn bơh ală cau đơs tàm jơnang đơs crih dê. “Añ git tus tàm do là kơnờm mờ broă jòi sền tàm internet, añ gŏ broă lơh đơs crih tamya do geh uă jơnau đơs niam mờ niam bơnĕ ngan, den tàng añ lơh ngan tus nàng sền. Mờ mùl màl, broă lơh gùng đơs crih do niam bơnĕ rơlao mờ jơnau añ kơ̆p kờñ añ dê. Tơnơ̆ mờ tŭ neh sền, añ gơtùi đơs là añ mùl màl gơboh ngan. An sền niam bơnĕ ngan mờ gùng đơs crih do, bơta pràn bơh ală cau chài đơs crih bal mờ nùs nhơm chờ hờp mờ mpồl đơs crih tamya neh lơh gơs. Añ kung gơlơh gŏ là, broă lơh gùng đơs crih do neh yal bè dùl jơnau niam bơnĕ ngan bè ală ù tiah mờ bơta niam chài krơi is lơgar Việt Nam dê bơh gùng đơs crih mờ jơnăng đơs crih dê lơh”.

Jăt ồng Trần Minh Hoàng, Kwang Lam bồ Kă bro Chờ gờm Show yal, broă lơh gùng đơs crih do geh bơh jơnau kơ̆p kờñ ai geh dùl phan lòt nhơl mang pa ai ƀòn dờng Hồ Chí Minh. Ala mờ lơh jơnau đơs crih jơi bơtiàn dê jăt broă lơh ờs mờng, mpồl lơh jơnau đơs crih do neh rơwah broă lơh pa ngan nàng ai bơta niam chài lơgar Việt Nam dê tus rềp mờ cau sền, tàm hơ̆ uă ngan là ală cau sền tus bơh ală lơgar dê. “Añ kơ̆p kờñ uă ngan là lơh geh uă gùng đơs crih bal mờ bơta niam chài lơgar Việt Nam dê tus mờ ală bơyô bơh ală lơgar kung bè cau sền tàm lơgar. Geh bơyai lơh sùm pah mang, bol añ kung kơ̆p kờñ Jơnau chờ gờm Show rơ̆p gơs dùl anih tus niam chài krơi is mờ ờ hoan geh ngan tàm ƀòn dờng Hồ Chí Minh dê nàng drơng cau năc in sền. Den tàng, bol añ kung ai show lơh do bè dùl anih ala măt niam chài, pơgồp bal tàm broă ai gùng đơs crih bal mờ bơta niam chài Việt Nam dê tus mờ mpồl bơtiàn ală lơgar”.

Bơh tŭ ai tàm broă lơh bơh nhai 3 nam 2025, broă lơh do neh dờp geh jơnau đơs niam bơnĕ ngan bơh cau sền dê. Tŭ do, Chờ gờm Show neh wă rơlao 30 rơbô dơ̆ cau sền; tàm hơ̆ geh mờr nggùl là cau năc tus bơh ală lơgar.