Ơ Yàng, dan Yàng bơnơm, Yang dà, Yàng ù, Yàng dà dờng, yàng croh dà tus sền. Dan ai mè bèp in geh pràn kơl dang, kis jŏ, lơngăp lơngai. Dan ting bơtrơh ală jơnau ờ niam, ờ bơtoah bơtoài, ai oh kòn kòn sao in lơh sa geh buơn, rài kis hờm ram mờ gơboh gơbài …ơ Yàng”.

Tàm bơta ram mhŭ bơh hìu jòng lơh hờ đang dê, tềng gah drăp tơrnờm, săp răc dan bơh cau lơh yàng gam mpong sùm bè jơnau tơrbŏ bal đah kòn bơnus mờ yàng, đah tŭ do mờ rài lài do dê. Do là broă lơh yàng kah ưn ngài bơh mò Nay H’ Ruyn (mờng hòi là Mè Hiên) bal mờ ồng Ksor Hú (mờng hòi là bèp Hiên) nàng lơh cau mè neh kra in sơn đan là mò Ksor H’ Lang tàm ƀòn M’lah, sàh Phú Túc, càr Gia Lai in.

Tàm trồ tiah mềr niam tàm ƀòn M’lah dê, hìu jòng hờ đang bơh ồng bèp Hiên dê geh gal ngan oh mi ƀòn lơgar tus ñô sa, dong kờl nàng rơcang lơh yàng kah ưn ngài mè ồng in. Drăp tơrnờm neh geh kơ̆t tềng mpang hìu. Poăc iar, poăc sur neh geh buh sin lài. Cau tàm jơi nòi, oh mi ƀòn lơgar tàm ƀòn pơn jăt tai tus ñô sa chờ. Bè Hiên pà git, gơwèt mờ kòn cau Jrai, lơh yàng kah ưn ngài ờ mìng geh was mờ phan sa geh uă, ha là khà phan geh peh nàng pơdơng. Bơta kwơ màng ngan là nùs nhơm git ưn ngài bơh oh kòn ai mè bèp in gơdê. “Kòn cau Jrai lơh yàng ưn ngài ờ di nàng ai tơngŏ gời. Jăt mờ bơta geh bơh hìu nhă dê, geh tŭ mìng là iar, sur mờ 2, 3 drăp tơrnờm kung di sơl. Bơta kwơ màng ngan là nùs nhơm bơh ală oh kòn gơdê, kờñ ưn ngài mè bèp neh deh mờ ròng siam he tus dờng pràn”.

Tơnơ̆ mờ jơnau răc dan bơh cau lơh yàng, ală broă lơh pơn jăt tai geh lơh bal sơl. Cau kòn jà mè bèp ñô bơngàn tơrnờm sơnrờp ngan, pà ào kòn cau, pà bơno bal mờ kòng tê, do là ală phan pà bŭ lah bè ờs ngan, mơya geh uă ngan nùs nhơm niam. Mè Hiên tơlik nùs nhơm mờ pu me neh kra bè do: “Ngai do bol añ lơh yàng kah ưn ngài mè bèp neh deh mờ ròng siam gơs dờng pràn. Bol añ mìng geh ờ uă bơta phan dềt ngan bal mờ phan pà nàng lời kir, kơ̆p kờñ mè sùm pràn kơl dang, chờ hờp mờ oh kòn, kòn sao. Hơ̆ là nùs nhơm git ưn ngài bơh bol añ dê”.

Ờ mìng cau geh lơh yàng ưn ngài ngoh rơngăc ngar. Gơwèt mờ ală oh mi tàm ƀòn, do kung là dơ̆ nàng yal wơl nùs nhơm bal mờ bơta niam bơh oh kòn dê. Tơl jơnau chờ gờm, tơl bơngàn tơrnờm ñô ndrờm geh pơyoa ală jơnau kơ̆p kờñ bè dùl hìu nhă kis bal tam sòr, dùl ƀòn lơgar tam klăc bal. Ồng Nay Ar, cau geh bơngă pin dờn tàm ƀòn M’lah sền gròi sùm broă lơh yàng. Tàm muh măt ồng dê, lơh yàng kah ưn ngài ờ mìng là dùl bơhiàn, mờ gam là jơnau bơsram bè nùs nhơm git ưn ngài neh geh prăp gàr sùm bơh rài lài tus rài tŭ do. “Mè bèp neh ròng siam oh kòn tàm ală nam nhai kal ke, tềng gah bơnhă ồs, mờ tơl bơnai phe, tơl dơ̆ sào. Tŭ do oh kòn neh dờng pràn, geh hìu nhă is, lơh yàng kah ưn ngài nàng răc dan geh bơta pràn kơl dang ai mè bèp in. Hơ̆ là broă lơh kwơ màng ngan, bơto oh kòn sùm kah mè bèp neh deh mờ ròng siam he”.

Lơh yàng kah ưn ngài bơh ồng Ksor Joan mờ mò Kpă Hmir tàm ƀòn Plei Chuet, sơnah ƀòn An Phú, càr Gia Lai geh bơyai lơh tàm nùs nhơm chờ hờp mờ ngoh rơngăc ngan. Gal cau tàm jơi nòi bơh ală ƀòn ndai tus bal mờ tàm să soh phan ờs mờng kòn cau dê niam bơnĕ ngan. Tàm săp dròng cing mpong, ùr bơklao lŏ Kpă H’ Sukơ (kòn ùr pŭt tàm hìu) jào kòng lơngô, ồi tơ̆ bal mờ pơnô sur neh buh sin, do là broă lơh ai tơngŏ nùs nhơm sền gròi bơh oh kòn dê gơwèt mờ rài kis mè bèp. Lŏ Kpă H’ Sukơ ngoh rơngăc pà git: “Ơ mè, ơ bèp! Ngai do bol kòn mìng geh ờ uă phan nàng pà mè bèp in. Ưn ngài mè bèp neh deh bol kòn, ròng siam bol kòn tus dờng bè tŭ do. Bol kòn mìng kơ̆p kờñ mè bèp pràn kơl dang, kis jŏ mờ chờ hờp bal mờ kòn sao”.

Di gơlan, mờ ală cau mè bèp lơi, nùs nhơm chờ hờp mờ gơboh gơbài ngan ờ di là ală phan pà, mờ là geh sền oh kòn neh dờng pràn, git kah bè rơnàng lài do. Mò Kpă Hmir kung chờ hờp mờ ngoh rơngăc ngan tềng đăp mờ bơta sền gŏ oh kòn neh dờng pràn, ngăc ngar, tàm hơ̆ uă ngan là nùs nhơm git ưn ngài gơwèt mờ mè bèp dê. "Ngai lài mè bèp rơƀah ngan, ròng ală kòn mờ jơh ală bơta lơi he geh. Ngai do sền gŏ ală kòn neh dờng, git kah tus mè bèp, bol añ chờ hờp mờ ưn ngài uă ngan. Mìng kơ̆p kờñ ală oh kòn sùm pràn kơl dang, hìu nhă gơboh gơbài”.

Tàm pơn jăt rài kis pa, tŭ geh uă bơhiàn ờs mờng rơhời gơtìp roh, broă lơh yàng kah ưn ngài mè bèp bơh kòn cau Jrai dê kung gam geh prăp gàr sùm, bè dùl dang che tơrbŏ bal rài lài do mờ tŭ do dê. Tàm hìu jòng hờ đang, tềng gah drăp tơrnờm mờ tàm săp dròng cing gam mpong săp, jơnau ưn ngài mè bèp ờ mìng geh đơs mờ jơnau, mờ gam geh pơyoa mờ tơl broă lơh yàng, tơl phan pà, tơl dơ̆ at tê bơh oh kòn, kòn sao dê.