Festival geh bơyai lơh bơh ngai 17 tus ngai 19 nhai 7 tàm sơnah ƀòn Nha Trang mờ uă tiah ndai tàm càr dê, mờ rơlao 40 broă lơh niam chài, đơs crih tamya, tàp pràn să jan mờ lòt nhơl; ală broă lơh dờp bal geh lơh bơh ngai 10 nhai 7 tus ngai 10 nhai 8.

Do là dơ̆ sơnrờp tơnơ̆ 11 dơ̆ bơyai lơh, broă lơh do tam gơl măt sơnđan bơh Festival Dà làng Nha Trang, càr Khánh Hoà gơs Festival Dà lềng Khánh Hoà mờ rơ̆p geh bơyai lơh sùm pah nam ala mìng geh lơh 2 nam dùl dơ̆. Bơta tơngŏ tờm bơh Festival dê là 3 broă lơh dờng geh bơyai lơh pơn jăt tơn tàm 3 ngai. Dơ̆ sơn đờm geh bơyai lơh tàm mang ngai 17 nhai 7 geh lơh dờng ngan, ngui măi mok pa, sòl 3D Mapping pơgồp bal mờ phăo bơkào. Tàm mang ngai 18 nhai 7 geh bơyai lơh chờ Carnival mờ ai rơndeh bơkào lòt nhơl lòt tàm gùng Trần Phú. Broă tơn jơh geh bơyai lơh tàm mang ngai 19 nhai 7 pơgồp bal broă lơh đơs crih tamya dờng ală lơgar “Tơrbŏ bal 5 châu”. Festival nam do geh broă tus bal bơh uă cau chài pơnrơ ngan bal mờ ală mpồl đơs crih tamya tàm lơgar mờ bơh ală lơgar tus bal.