Broă lơh do tơrgùm ală cau chài trŭ sa bal mờ cau jăk bè phan sa tus bơh lơgar Việt Nam, Thái Lan mờ Malaysia, 3 lơgar geh bơta pràn bè tam, lơh plai sầu riêng. Tàm talkshow, ală cau chài trŭ sa neh lơh 7 bơta phan sa. Ală bơta phan sa là broă pơgồp bal đah plai sầu riêng càr Dăk Lăk mờ bơhiàn phan sa bơh 3 lơgar dê, bơh phan sa lài ngan, phan sa tờm tus mờ phan sa dŭt ndơl.

Uă cau jăk neh đơs, plai sầu riêng càr Dăk Lăk geh bơta pràn dờng ngan nàng bơtàu tơnguh ală bơta phan sa pa, pơgồp bal tàm broă lơh tơnguh bơta kwơ phan geh lơh bơh broă lơh sa suơn sre dê tŭ pơgồp bal lòt nhơl mờ lơh bơta niam chài. Ồng Lý Kim Long, Phó Chủ tịch Mpồl tơrgùm bal Cau chài trŭ sa Việt Nam pà git: “Ngai do añ lơh ngan pơgồp bal đah phan sa tàm dà mờ plai sầu riêng, rơwah ka ti là phan tờm ngan mờ geh uă ngan bơh Phú Yên lài do dê pơgồp bal mờ plai sầu riêng là phan sa krơi is càr Dăk Lăk dê. Kung kờñ kơlôi sơnơng nàng ngui phan sa sầu riêng do tàm ală phan sa hang, lơh geh ală bơta phan bơkah pa krơi is rơlao ai cau năc in, pơlam broă ngui sa, pơgồp bal tàm broă pơlam cau năc càr Dăk Lăk đơs is mờ lơgar Việt Nam he dê đơs bal”.

Jăt Mpồl bơyai lơh yal, talkshow ờ mìng yal ală broă lơh pa tàm broă lơh phan sa sầu riêng mờ gam wèt tus lơh geh phan lòt nhơl krơi is bơh phan geh lơh bơh lơh sa suơn sre càr dê. Geh ờ uă bơta phan sa gơdờp den rơ̆p kơlôi sơnơng, pơgồp bal mờ mpồl hìu tăc phan sa, hìu năc ơm tàm càr nàng drơng cau năc lòt nhơl in di tàm Lơh chờ Sầu riêng càr Dăk Lăk geh bơyai lơh tàm nhai 8 tus. Ồng Nguyễn Quốc Hiệp, Phó Kwang Lam bồ Sờh Niam chài, Tàp pràn să jan mờ Lòt nhơl càr Dăk Lăk pà git: “Bol añ jà cau chài trŭ sa tus nàng lơh geh ală phan sa pa bơh plai sầu riêng nàng lơh geh bal mờ bơceh lơh ală phan sa pa mờ nàng tơnguh uă bơta kwơ bơh plai sầu riêng dê tàm drà kă bro tàm lơgar kung bè drà kă bro ală lơgar dê, cèng geh ală bơta kwơ gơguh uă rơlao tai gơwèt mờ gah phan sầu riêng he dê”.