Tàm hìu mpàn (ndàp), rơkàng tìm mờ kiă neh klàr jat tŭ tơngai, cau chài H’Brơi gam rơlĕ rơlùn cah ơyun pơ yơng sau bic mờ ală jơnau pơnđik kòn cau M’nông mờng kwèng ngan. Tàm ală kơlik mpàn là ală sră jờng rơ geh sền gàr bơh uă rơnàng tàm hìu bơnhă bè cơng tàng ai bơta tàm pơn jat tai bơh dùl hìu bơnhă bềng lìu bơhiàn kac màng dê.

Cau chài H’Brơi deh nam 1975 tàm dùl hìu bơnhă geh jơh bal bèp mờ mè ndrờm mut tàm mpồl ling pờ gùng drơng pôs đồng kac màng B4 Nâm Nung in tàm ală nam nhai tam lơh dră wơl bol sò tơm Tây mờ bol sò tơm Mỹ sơgràm phà. Deh tŭ ƀòn tờm pa tơngklàs, dà lơgar pa tơrgùm dùl, dờng tàm sap cing bèp dê, jơnau pơnđik mè dê, bơta kờñ gơboh niam chài cau M’nông neh gơmut tàm nùs mò dê bơh tŭ gam dềt. Cau chài mò H’Brơi yal:

“Añ git mờ kah jơh ală jơnau pơnđik do bơh tŭ gam dềt. Lài do, pah tŭ tàm ƀòn geh dơ̆ lơh chờ, añ sùm lòt jat mè đơs pơnđik. Ơm tàm hìu den iat mè đơs pơ yơng kòn, pơ yơng sau den tàng rơhời ală jơnau pơnđik hơ̆ gơ mut tàm să he bơh tŭ lơi kung ờ git sơl. Bơsram đơs pơnđik kung ờ huan kal ke ir, bơta kuơmàng là pal git iat, kah hơ̆ sồng đòm đơs”.

Gơ wèt mờ cau M’nông, pơnđik ờ mìng là jơnau đơs crih mờ gam prap gàr bơta kah yau, bơhiàn bơh yau mờ bơta niam rài kis mpồl bơtiàn dê. Bơh ală jơnau pơ yơng, đơs tàm sơrbŏ bơr tus jơnau pơnđik yal yau (cau M’nông hòi là Ot Ndrong), jơh ală ndrờm pơyua jơnau bơto tơngkah bơh mò pàng dê bè bơta kờñ gơboh, bơta tam klac bal mờ nùs nhơm lơh broă. Tŭ do, cau chài H’Brơi neh mblàng wơl bơta kờñ đơs pơnđik ai rơnàng tàm pơn jat tai in.

Dờng tàm jơnau đơs pơnđik mè dê, bi H’Như, kòn ùr mò H’Brơi dê neh gờñ đềt mềr mờ ală broă lơh niam chài ờs mờng ƀòn lơgar dê. Tŭ do, H’Như là cau lam bồ mpồl tamya kòn cau M’nông sàh Nâm Nung dê:

“Bơh tŭ gam dềt añ neh jat mè lòt tàp đơs pơnđik, tàp tamya bal mờ ală mơi, ală wă tàm mpồl niam chài kòn cau sàh dê. Mè añ dê là cau lam bồ den tàng añ sùm geh iat kơno ală gùng đơs pơnđik, ală jơnau tamya ờs mờng mờ rơhời lơh gơs bơta kờñ gơboh mờ jơnau pơnđik mờ jơnau tamya kòn cau M’nông he dê”.

Là Bí thư Chi đoàn ơruh pơnu ƀòn Ja Rah, sàh Nâm Nung, bi H’Như sền broă prap gàr niam chài jơi bơtiàn kung là broă cau kơnòm să dê. Ală dơ̆ pơrjum đoàn tàm trồ mang ờ mìng là anih nàng đoàn viên in tàm cribơyai broă lơh mờ gam gơ gơs là anih tàp đơs crih tamya kòn cau. Jơh ală đoàn viên, ơruh pơnu mờ kơnòm dềt tus bal pơrjum Chi đoàn ƀòn Ja Rah geh rlau 30 nă cau, tàm hơ̆ bàr pe nă ơruh pơnu geh rơ wah mut tàm mpồl tamya kòn cau sàh Nâm Nung bơh H’Như drơng kơnòl. Bi H’Như yal:

“Uă ngan cau tàm mpồl tamya ndrờm là đoàn viên ơruh pơnu tàm ƀòn den tàng broă hòi jà lòt tàp ƀuơn ngan. Bol hi sùm pơgồp bal ală dơ̆ tàp tamya, tàp đơs pơnđik tàm ală dơ̆ pơrjum chi đoàn, ờ mìng lơh gơlik anih nhơl ñŏ niam bơnĕ ai ơruh pơnu in mờ gam pơgồp bơnah prap gàr ală bơta kuơ niam chài bơh yau”.

Pah dơ̆ lơh chờ halà ală dơ̆ bơyai lơh niam chài kòn cau, rùp să 2 nă mè mờ kòn mò H’Brơi đơs pơnđik, tamya neh gơ gơs mờng kwèng ngan. Tàm sap cing mồng mpong ntas tàm ƀòn, mè đơs ală jơnau pơnđik rơlĕ rơlùn, iat bơkah tồr ngan. Ai kòn ùr den gơ rờm bal mờ ală jơnau tamya lơbơn niam, bơnĕ bơnài.

Ală nam rềp ndo, mpồl đơs crih tamya kòn cau sàh Nâm Nung sùm tus bal uă dơ̆ bơyai lơh, tìp mat lơh kwèng niam chài tàm gùt lơgar mờ ai geh uă khà jờng. Mờ mò H;Brơi, bi H’Như gam pơn jat tai mblàng wơl bơta kờñ gơboh niam chài bơh yau cau M’nông dê tus rơnàng kơnòm să. Mò H’Thương Knul - Phó Lam bồ Mpồl Niam chài - Mpồl bơtiàn Mpồl duh broă Làng bol sàh Nâm Nung pà git:

“Mò Hbrơi tŭ do là cau lam bồ mpồl cing mồng, đơs pơnđik, ai kòn ùr mò dê den drơng kơnòl mpồl tamya kòn cau. Tàm uă nam do, bàr nă mè mờ kòn neh jơh nùs tus bal prap gàr mờ bơto wơl niam chài bơh yau rơnàng kơnòm să in. Tàm ală nam do, mpồl cau chài niam chài kòn cau bơh mò H’Brơi tus bal neh tus bal tàm uă dơ̆ pơrlòng, dơ̆ bơyai lơh tàm càr mờ bơdìh càr. Is ồn, tàm dơ̆ bơyai lơh niam chài kòn cau bơyai lơh tàm Quảng Trị tàm nam 2024, mpồl neh ai geh 9 khà jờng, tàm hơ̆ geh 4 khà A bal mờ uă khà B mờ khà C tàm ală tơngume bơyai lơh”.

Bơh hìu dềt tàm ƀòn Ja Rah, cau chài H’Brơi gam lơh ngan tàm pơn jat tai bơhiàn ờs mờng bơh hìu bơnhă dê mờ ală broă geh kuơ ƀòn lơgar in. Dilah rơnàng mò pàng tă pơgồp bơta pràn ai kac màng in den rơnàng tŭ do pơgồp bơta pràn nàng sền gàr, lơh niam bơta niam chài jơi bơtiàn. Bơh jơnau pơnđik pơ yơng mè dê, jơnau pơnđik mè dê tus ală jơnau tamya kòn ùr dê, hiòng niam chài M’nông kung gam gơ hòr sùm bơh ală rơnàng, nàng sap cing, sap đơs pơnđik sùm mpong ntas, sùm geh đơs tàm ƀòn tŭ do.