Deh nam 1972, là cau kòn cau Mạ ơm tàm sàh Bảo Lâm 1, càr Lâm Đồng, bơh dềt K’Brèm neh kờñ ngan ală jơnau đơs pơnđik kơno đơs bơh kềng bơnhă ồs, tàm mang chờ halà pah kàl lơh yàng lơh chờ ƀòn lơgar dê. Nam 18 sơnam, K’Brèm sơnđờm lòt jăt jơng ală cau kra ƀòn, cau chài dờng sơnam nàng bơtê đơs pơnđik, bơtê dròng cing jañ mồng.

Ală jơnau đơs loong, đơs tìng cau K’Ho, cau Mạ dê sùm jòng ngan, geh tŭ cau đơs jòng bơh mang do tus mang ndai. Jơnau đơs sùm ngui uă rùp hin lơh pơnyơu, gùng đơs gơ dŏ jòng den tàng rơnàng kơnòm kal ke ngan bơsram, kal ke ngan kah. Bulah bè hơ̆, ala tài nàng ală bơta kwơ hơ̆ rơhời gơmŭt tàm bơta rơhời hŭi roh tĕ, K’Brèm neh jòi gùng ai jơnau pơnđik tus rềp rlau mờ rài kis ngai do.

“Ală jơnau đơs loong, đơs tìng rài yau kal ke ngan đơs, pal bơsram jŏ ngan hơ̆ sồng gơtùi kah. Añ cih jơnau pa nàng ală bơyô in ƀươn iăt, ƀươn kah, mơya kung gam prăp gàr geh sơl ală bơta niam bơh jơnau pơnđik kòn cau he dê sơl”.

Cau chài K’Brèm neh lời uă tŭ jiơ ai broă lơh jòi tơrgùm ală jơnau đơs pơnđik yau bơh cau K’Ho, cau Mạ dê. Geh ală dơ̆ lòt jŏ jòng uă ngai, tŭ den nggui kềng bơnhă ồs iăt ală cau kra đơs wơl ală jơnau pơnđik yau, tŭ den lòt jăt làng bol lòt mìr lòt sươn bơh àng drim gờñ tus mho mang ngan. Bơh ală dơ̆ lòt hơ̆, K’Brèm neh jòi tơrgùm geh 6 jơnau pơnđik yau kòn cau Mạ dê, tàm hơ̆ geh 4 jơnau pơnđik geh cồng cih wơl mờ bơtơl tai ală jơnau pa mơya kung gam gàr geh sơl nùs nhơm, jơnau đơs pơnđik bơh chờm bơh jơi bơtiàn he dê.

Tơnơ̆ do, tŭ lơh broă tàm Anih tờm Niam chài kơnhoàl Bảo Lâm (yau), geh gĭt ală gùng đơs crih mờ ală broă lơh đơs crih tam ya làng bol, ồng sơnđờm cih pa ai ală jơnau pơnđik ờs mờng bơh yau in. Mơkung gàr geh sơl gùng đơs crih mờng kwèng ngan bơh jơi bơtiàn he dê, mơya tơngume geh cih rềp mềl rlau mờ rài kis pa tŭ do nàng ơruh pơnu in ƀươn iăt, ƀươn kah mờ ƀươn đơs tàm ală dơ̆ tìp măt lơh kwèng, lơh yàng lơh chờ halà pơrjum bơyai mpồl bơtiàn.

Ờ mìng lơh pa jơnau pơnđik, cau chài K’Brèm gam lời uă tŭ jiơ bơto yal wơl cing mồng mờ jơnau pơnđik ai rơnàng kơnòm să in. Tus tŭ do, ồng neh bơto pơlam gĭt nđờ rơhiang nă ală rơnàng cau tàm pơn jăt tai nàng pơn jăt tai sền gàr niam chài ờs mờng bơh yau. Bi Ka Thổi, kòn cau Mạ ơm tàm sơnah ƀòn 2 Bảo Lộc, là dùl tàm ală kơnòm đềt mềr ngan mờ cau chài K’Brèm đơs bè do:

 “Kơnờm wa Brèm đơs pơnđik kòn cau he dê, oh gŏ gơlơh ngoh rơngăc ngan. Bơh hơ̆ oh bơtê đơs nàng pơgồp bơnah sền gàr jơnau pơnđik jơi bơtiàn he dê".

Uă jơnau đơs crih bơh ồng dê cih jơnau pa bè Kok kech (Jơnau brê bơnơm dê), Đơs n’hồl (Jơnau đơs crih tàm kờñ)…geh ală bơyô kơnòm să gơboh kờñ ngan. Is ồn, jơnau pơnđik Kok kech geh cih jăt jơnau pơnđik yau neh dong ồng lơh geh khà A tàm dơ̆ Pơrlòng Jơnau đơs pơnđik Việt Nam nam 2007. Jăt uă kra ƀòn mờ cau chài tàm tiah do yal, bơta kwơ ngan tàm K’Brèm ờ mìng là wă wờng niam chài K’Ho, Mạ dê lơm mờ gam là tàm nùs nhơm sùm kơ̆p kờñ bơto yal wơl ală bơta kwơ hơ̆ ai rơnàng tơnơ̆ do in. Mò Ka Nhék ơm tàm sàh Bảo Lâm 3, càr Lâm Đồng đơs:

“Tàm tơl jơnau đơs pơnđik ndrờm geh lơm bơnài niam jơnau niam, bơto kòn bơnus kis tam klăc, gơboh kờñ bal. Dilah rơnàng kơnòm să gĭt đơs pơnđik den niam chài jơi bơtiàn he dê rơ̆p ờ gơtìp hŭi roh tĕ”.

Bơh ală dơ̆ lòt jòi tơrgùm kơlôi sơnơng ngềt ngơ̆t tàm ƀòn lơgar, bơh ală ơdŭ bơsram cing mồng, jơnau pơnđik tiah ƀòn lơgar tus ală jơnau đơs crih geh cau iăt kờñ ngan, cau chài K’Brèm (ơm tàm sàh Bảo Lâm 1, càr Lâm Đồng) gam pơgồp bơnah “lơh kah rơngal wơl” ală săp ntas neh geh tŭ pơhìn gơtìp hŭi roh tĕ. Kơnờm bơta jơh nùs jơh tồr bơh ồng dê, ală jơnau đơs pơnđik geh pơnđềm mờ săp ntas đờng goòng dê bơh kòn cau K’Ho, Mạ dê kung gam pơn jăt tai kơno đơs tàm ƀòn lơgar, tàm dơ̆ lơh yàng lơh chờ mờ tàm rài kis ngai do.