VOV4.M’nông – 3 nuĭh dơi săch Tổng thống Đức mhe geh rơh tâm nchră ta tivi. Aơ lah ăp nuĭh dơi ndơn wa Angela Merkel ta nău ƀư Thủ tướng Đức jêh rơh săch têh Liên bang ƀư jêh 4 pơh tay ta Đức. Rơh tâm nchră geh đah wa Armin Laschet, kruanh Đảng Dân chủ Thiên chúa giáo-CDU, wa Annalena Baerbock, kruanh đảng Xanh n’hanh wa Olf Scholz, ntoh măt an đảng Dân chủ Xã hội-SPD, lĕ ƀư tâm măng 29/8 ta kênh tivi Đức RTL. Tâm nĕ dôl uănh ngăn rơh tâm nchră đah wa Armin Laschet n’hanh wa bu ur Annalena Baerbock. Wa Annalena Baerbock nduih wa Armin Laschet mô geh du bôk nău ƀư na nê̆ tâm rnôk wa Laschet ntôn bôk nău kan ƀư bah wa Annalena Baerbock mbra ƀư khuch jâng công nghiệp Đức yor an âk nău kơl an nu nău ntŭk ntô. Hôm tĭng ăp rơh sroh joi nău lư an saơ, nuĭh dơi săch Olaf Scholz, ơm ƀư Kruanh n’gâng kan prăk kaih Đức lah nuĭh dơi geh âk nău kơl ngăn bah nuĭh ƀon lan Đức.

Nŭih rblang: Y Sưng Phê Ja