VOV4.M'nông: Australia n'hanh Anh hŏ ký ton ngăn tâm ton dah rŏng tăch rgâl gay rơih ntlơi mpêr n'gar sŏk soăy đah nklăp 99% ndơ Australia tăch n'gluh tât Anh. Nău tâm ton dja mbra ƀư n'hao âk tay rnoh geh tăch n'gluh ndơ tơm khlay bah Australia tâm rnôk dôl geh tât khuch bah trong rmal bah Trung Quốc. Nău tâm ton dja lĕ ma 75% nsĭt geh tăch rgâl bar ding đah Australia n'hanh Anh. Rnôk nău tâm ton geh nău tam, ndơ tăch bah Australia mbra geh âk tay trong dơh soih gay tât đah ntŭk tăch rgâl 65 rkeh nuĭh bah dak Anh. Tâm nău mbơh ndơ̆ luh nar 17/12, Thủ tướng Australia Scott Morrison an gĭt, rnôk nău tâm ton geh tam dŏng, 99% ndơ tăch Australia, rnoh khlay 9,2 rmen AUD, tăch n'gluh tâm Anh mbra an rong dơm prăk sŏk soăy. Nkre nău tâm ton dah rŏng tăch rgâl pơk trong dơh soih gay nuĭh kan tât 35 năm deh bah bar dak dơi hăn tât pah kan ta dak mpeh bah ri tâm 3 năm.

Nuĭh rblang: Điểu Thân