VOV4.M’nông – Nău âk kon se ta Australia ntưp Covid-19 dôl ƀư nuĭh ƀon lan klach rvê. Tâm rnôk aơ, nar nđaơ (20/8), Kruanh n’gâng kan dak si Australia Greg Hunt an gĭt, geh âk nău dơi tâm pơh tât, ngih pah kan dơi kan bah dak aơ mbra uănh an nău dŏng vaccine Pfizer an kon se bah 12 tât 15 năm deh. Ơh nău ôp báo chí Australia, Kruanh n’gâng kan dak si dak aơ Greg Hunt an gĭt, aƀaơ ăp nuĭh way kan tâm rmôt mbơh ntĭm chuh dak si bah dak aơ dôl uănh mĭn tay mpeh nău an đă chính phủ chuh vaccine an kon se bah 12 tât 15 năm deh đŏng lah mô. Nău chuh vaccine an kon se dôl nar lơ jêng nău uănh tât bah nău lư Australia rnôk rnoh kơp bah bang New South Wales, ntŭk srê Covid-19 dôl geh jêr jŏt ngăn ta Australia an saơ tâm 1 pơh bah năp, rnoh kon se bah dâng 19 năm deh geh Covid-19 âk rlău nuĭh ji ta rmôt ranh âk năm deh ngăn.

            Nŭih rblang: Y Sưng Phê Ja