VOV4.M’nông: Ƀư bôk nau kan mâp ƀon lan jêh rơh rƀŭn tal 2, Quốc hội gưl XV mhe rlau, Kruanh Rnâng kan Nội chính Trung ương Phan Đình Trạc ndrel rmôt kan ntoh măt Quốc hội n’gor Lâm Đồng ƀư mâp cử tri tâm âk n’gor. Bah nê, cử tri ntoh nau rhơn mpeh ăp nau dơi bah rơh rƀŭn Quốc hội mhe rlau đah nau rgâl mhe, blau mhe, nkre đă cử tri âk nau kan tâm nkuăl.

            Jêh rnôk lôch rơh rƀŭn tal 2, Quốc hội gưl XV, Kruanh rnâng kan Nội chính Trung ương Phan Đình Trạc ndrel rmôt kan ntoh măt Quốc hội n’gor Lâm Đồng hŏ mâp ƀon lan tâm du đê̆ Phường, xã tâm ăp nkuăl Đức Trọng, Lạc Dương ndrel nkuăl ƀon têh Đà Lạt, n’gor Lâm Đồng.

            Tâm ăp ntŭk mâp, cử tri n’gor Lâm Đồng kŏ ntoh nau rnơm ndrel ŭch tâm ăp nau ntrŭnh tâm trong gay ntrŭt dăng hun hao văng sa rêh jêng, ntrong kan gay ma rlet nau jêr yor srê Covid-19 bah Chính phủ, bah Quốc hội bah rơh rƀŭn tal 2 Quốc hội gưl XV. Nkre, lŏ đă âk nau kan geh tât nau kan mât Ngih dak tâm ăp nau kan, ăp nau kơl an tâm nau rêh jêng ndrel nau nchrăp ntrŭt dăng nau ê nkra, tăch rgâl tâm nau kan mhe.

            Tâm xã Hiệp An, nkuăl Đức Trọng, âk ngăn cử tri nkah đă tât nau kan neh ntu, ngăn lah nau kan pă săm ƀŭt pă dŏng neh mbrơi, pă n’har neh bri ê kloh; nau nkha săm ƀŭt hộ khẩu, ƀư trong hăn ƀon lan, trok tâm neh ƀư nkra nglau hoch dak Ta Hoét hôm mâp âk nau jêr...Tĭng cử tri Mai Khả Cử, tâm thôn Tân An, xã Hiệp An, êp ăp nau kan aơ, nau kan mât đăp mpăn ndâk nkra kŏ lah nau kan duh dôl geh Quốc hội, n’gâng kan ăp gưl uănh khlay, rgâl nkra:

            ‘Xã Hiệp An tâm rnoh nkuăl geh rgum bư đô thị yơn nau kan ndâk nkra ri geh nau mô tâm ban ngăn. Njok trong QL20 ndâk lă lêng ngih vâl, ntŭk tăch ndơ ri geh ntŭk luh bah trong, geh ntŭk lăp tâm trôm. Ntă ngih ƀư lor ri ma mô geh nau nkah mhal, ma nau nkra êng ba kơi ri nchih nau nkhah mhal...đă n’gâng kan ba lơ ân uănh n’hêl, uănh nau kan mât đăp mpăn tâm nau ndâk nkra”.

            Tâm ban ma nê, cử tri xã Lát, nkuăl Lạc Dương ri đă du đê̆ nkô̆ nau geh tât nau kan mpeh nau ntrơn rgâl neh tuch tăm, neh tăm bri jêng neh gŭ, nau pă săm ƀŭt dŏng neh, nau ntrơn ntŭk gŭ, gŭ âm geh tât ntŭk nkra thuỷ điện Đạ Dâng-Đạ Chomo, kơl an manh prăk gay ma ƀư nau kan tuch tăm, hao rklaih ach o, nau kan trok pă prăk khay đah nŭih pah kan tâm xã. Cử tri kŏ đă ân geh ntrŭt dăng ngăch nau nkra trong ĐT 726 gay ma hăn ân nơih, hun hao văng sa n’hao nau mhal ăp nau tih ndeh rdeng jâk ir, n’hao rnoh rnăk geh dŏng dak kloh...

            Tâm rnôk nê, cử tri nkuăl  ƀon teh Đà Lạt ngăn ngên uănh khlay tât nau kan njrăng, rdâng srê Covid-19 ndrel ăp nau kan ndâk nau kan ê nkra, tăch rgâl ƀư nau kan pâl n’aih, ntrŭt dăng nau văng sa rêh jêng hun hao. Cử tri Nguyễn Thị Hiếu Hoà, Giám đốc Ntŭk kan dak si Đà Lạt mbơh, đah nau dơi nâp mpeh ntŭk ntu ndrel nŭih kan mô âk, vay tŭp tâm nau âk ir nŭih kơt rnôk aơ, lah mô geh nau doh rklaih ân năn ri Đà Lạt jêr ngăn geh nau dơi nkô̆ nau bar ntil kan tâm nau kan mhe.

            ‘Rmôt kan ƀư ăp nau kan ƀa ƀơ kơt lah khám săm ji, njrăng rdâng, nau kan rnoh nŭih, ndrel ma nau kan njrăng rdâng srê. Nŭih kan gay ma tŏng ƀư nau kan ri mô âk, tâm rnôk dôl hôm ƀư nau ntrŭnh n’huch rnoh nŭih pah kan. Tâm rơh tât, rnôk ntrŭnh ƀư tay ăp nau kan mpeh ntŭk săm kŏ kơt lah nau nchrăp njrăng, rdâng srê, ăp nau kan bah ngih dak si hăn ntrơn leo ndrel ăp rmôt mât chăm...ngăn lah mra geh ntop tay nau jâk ndrel âk nŭih lăp săm ir tâm mpeh tâm dâng”.

            Ntoh măt rmôt kan ntoh măt Quốc hội n’gor Lâm Đồng, Kruanh Ban Nội chính Trung ương Phan Đình Trạc kơp dơn, rnê ngăn ăp nau blau mhe tâm dăch ma nau ngăn bah nau rêh cử tri. Nkre mbơh, nkoch, ƀư kloh tay du đê̆ nau kan geh tât nau kơl an jêh rnôk rklaih ach o, gay đăp mpăn nau rklaih ach o nâp nâl, nau kơl an đah ăp cán bộ tâm xã, ngăn lah cán bộ ƀư nau kan, ƀon lan. Ngăn lah, uănh khlay tât nau đă bah cử tri xã Lát, nkuăl Lạc Dương mpeh neh ntu, wa Phan Đình Trạc đă n’gâng kan ndrel nkuăl ân kơl rklaih, ƀư ân năn:

            ‘Aơ lah du xã nkuăl yôk hŏ rklaih ach o ndrel geh dơi ƀon lan mhe. Ŭch kônh wa nơm ân lŏ nsôih, tâm rnglăp, rklaih nau jêr, nsôih ân rjăp lơn tay, prêh lơn tay gay ma nơm mô êng knŭng mâp ân nâp xã ƀon lan mhe, ma hôm lah xã ƀon lan ntil mhe. Bah nau kan mpeh neh gŭ, neh tuch tăm, pă săm ƀŭt kơp dơn dŏng neh, trok tâm ntŭk gŭ...ri đă nkuăl, xã, n’gor ân ndal kơl an kônh wa ƀon lan. Yor nê lah nau kan khlay bah nau tuch tăm, đăp mpăn nau rêh”.

            Di rnôk mâp cử tri jêh rơh rƀŭn tal 2, Quốc hội gưl XV, Kruanh Ban nội chính Trung ương Phan Đình Trạc hŏ pă ân n’gor Lâm Đồng ndơ dŏng tâm nau kan dak si, njrăng rdâng srê Covid-19, geh: 10 máy sŏ n’hâm, 200 rbăn mlâm bok put mbung ndrel 200 rbăn ndơ test ngăch Covid-19 tă bah tơm bah N’gâng kan dak si. Nkre, kơl an 6000 nklâm ndơ ân công nhân ndrel nŭih pah kan mâp nau jêr tâm Lâm Đồng tă bah tơm prăk bah Tổng Liên đoàn Lao động Việt Nam./.

                        Nŭih rblang: H’Thi