VOV4.M’nông: Kơt tĭng nau kuăl jă bah ăp gưl cán bộ Đoàn tâm n’gor, âk điàn viên, druh ndăm ta Dak Lak nchih êng săm ƀŭt gay ma dăn râng rmôt kan kơl an mpeh ba lơ njrăng rdâng srê Covid-19. Mô rvê nau jêr, ăp nŭih dôl ma rgop n’hâm tâm nau kan ta ăp ntŭk nkhah rgum, kơl an nai dak si ndrel rmôt êng êng gay ndrel nsum ty ntrŭt jăng lơi srê.

Bơi tât 2 pơh ma aơ, nau kan kơl an tâm nkuăl nkhah rgum nŭih tâm Ngih dak si nkuăl Krông Pách, yuh Phan Ngọc Bảo Nhi, tâm xã Hoà An, nkuăl Krông Pắk, n’gor Dak Lak hŏ mơng ma nau kan tâm rnôk nsoh ngăn kho ao njrăng săk n’ăp ma mih mô lah nar. Lah nau dak si mhe lôch nti ri ma yuh geh pă kơl an nau khám ndrel ma sŏk mẫu xét nghiệm ân ăp nŭih tă bah nkuăl geh srê sĭt.

Bah điện thoại yuh Phan Ngọc Bảo Nhi nkoch, saơ ngăn srê tâm Dak Lak geh tât jêr, rnoh nŭih ji hao âk, yuh hŏ nchih săm ƀŭt ndrel njoăl nau dăn ngăn tât ân giám đốc n’gâng kan dak si Dak Lak gay ma dăn râng nau hăn kan nsum đah mpeh bôk năp njrăng srê. Jêh nê, rđau kan n’gâng kan hŏ geh nau mbơh ndrel sŏk njoăl n’ha săm ƀŭt bah yuh tât Rnâng kan rđau nau njrăng rdâng srê bah nkuăl gay ma ndơn ndrel pă nau kan:

‘Gâp saơ srê tâm Dak Lak ntơm geh ntoh hô, rnoh nŭih ntưp hao âk ăp nar ri gâp ŭch râng tâm nau njrăng rdâng srê gay ma kơl an ăp nŭih, yor lah ta Dak Lak kŏ mô tŏng nŭih kơl đŏng. Lah nsum ri nau kan âk ngăn, mâp nau jêr đŏng, rgănh đŏng. Yơn lah, rnôk lăp pah kan nsum ri ăp nŭih ndrel râng njrăng srê ri gâp saơ ŭch ngăn, ueh dŏng”.

  Kŏ lah nŭih hăn kơl an râng nau kơl tâm ntŭk bu nkhah rgum tâm ntŭk ngih dak si nkuăl Krông Pách, nau kan ăp nar bah nô Nguyễn Tấn Huy tâm thôn 2, xã Tân Tiến, nkuăl Krông Pách lah kơl an nchuăn rdeng ndơ dŏng bah ăp jrâu ndrel rep răk kloh tâm ntŭk bu nkhah. Nguyễn Tấn Huy nkoch, nô lah sinh viên năm tal 2 ngih săm ƀŭt Đại học Khoa học Tự nhiên nkuăl ƀon têh Hồ Chí Minh.

Yor srê ntơm khay 5 nô rlu nti gay ma sĭt tâm ƀon der srê. Rnôk Đoàn nkuăl Krông Pắk mbơh lah joi nŭih hăn kơl an, nô geh nau ân bah rnăk wa, nô nchih săm ƀŭt đăng kí ndrel geh ndơn lăp kơl an tâm ntŭk bu nkhah rgum tâm rlau du pơh ma aơ:

“Rnăk vâl hŏ mbơh lor mpeh nau mĭn nau ƀư ri ma rnôk geh đăng ký hăn ri rnăk vâl kŏ ân hăn đŏng, yor nơm ŭch kơl an ân ƀon lan. Tâm aơ ri nau kan kŏ mô geh âk ôh, yơn lah tâm nkuăl geh âk srê ri mô dơi geh nau ntrơn rgâl nŭih êng ôh. Ăp băl mom lah ŭc hăn ri ân leo ăp ndoh ndơ, n’hâm soan ân ueh lah dơi hôm, lăp ta aơ ri nau rêh mô geh kơt lah ngih ôh, ngêt sa, gŭ rlu nsum ri ma geh âk nau êng ngăn rđil ma ngih nơm”.

Nô Nguyễn Văn Hà, Bí thư Đoàn nkuăl Krông Pách mbơh, rnôk tâm nkuăl geh nŭih ji ndrel ndâk ntŭk nkhah rgum nŭih gay ma vơt nŭih hăn pah kan ta ưbah ăp nkuăl geh srê, Đoàn nkuăl hŏ ƀư nau rgâl ăp nau nchrăp kan, kơl an ân nau kan njrăng rdâng srê Covid-19 ndrel nau rêh jêng tâm ƀon lan lam nkuăl.

Ndrel ma nau kơl an nŭih jêr, ntŭk kan đoàn hŏ kơl an rmôt kan kơl an đah nau kơl an mpeh bôk năp njrăng srê. Rơh bôk năp, geh 15 nŭih hăn kơl an geh âk lăp ndrel geh pă nau kơl an tâm ăp ntŭk nkhah rgum nŭih tâm nkuăl Krông Pách:

‘Ntơm rnôk geh nau rgŏ jă ri rnoh đoàn viên druh ndăm nchih săm ƀŭt dăn râng geh nau dơi bah Rnâng kan Đoàn nkuăl. Phung hên kŏ ƀư kloh nau kan, ntơm bah nau nchih săm ƀŭt ân tât nau kơp dơn ân bah rnăk vâl, bah nkuăl, rmôt kan mbơh. Mâp ngăn tât ăp nŭih ŭch hăn kơl an, djăt nau mĭn, nau ŭch ndrel ntrŭnh ƀư nau kan njêng ăp rmôt kan ngăn ndrle jao ân ăp nkuăl gay ma dăp rgum, pă nau kan, mbơh ntĭm ăp băl mom râng du trong ân ueh tam ngăn đah nau kan kơl an aơ”.

Tâm nkuăl Cư M’gar, ntơm dŭt khay 7 rlau aơ, knŭng jêh du nar mbơh săch nŭih hăn kơl an, Rnâng kan Đoàn nkuăl Cư M’gar hŏ ndơn âk săm ƀŭt dăn lăp râng kơl an bah rmôt kan “Njrăng kơl ao ndrih”. Tĭng nô Y Wal Mlô, Bí thư Đoàn kuăl Cư M’gar, lam nkuăl hŏ ndâk 18 rmôt kan kơl an mpeh nai ndrih 2 gưl nkuăl ndrel xã đah 280 nŭih gay ma kơl an nau njrăng rdâng srê, nchrăp ăp ndoh ndơ tâm nkuăl nkhah rgum nsum.

Êng rmôt kan bah nkuăl hŏ ndơn săm ƀŭt đăng ký bah rlau 50 nŭih băl mom. Đoàn nkuăl hŏ nchih moh săk, ƀư nau ntĭm nti ăp nau ntrŭnh ndrel nchrăp ân nâp ueh ân ăp nŭih hăn kơl an. Nkre mâp kan nsum đah Rnâng kan rđau nau njrăng rdâng srê gưl nkuăl gay ma pă nau kan ân tâm di đah ăp nŭih:

‘Âk băl mom đoàn viên druh năm ri hôm mom ngăn, geh nŭih ri mhe lôch nti jrâu 12 ŭch hăn râng kơl an bah ăp rmôt kan bôk năp bah nau njrăng rsê tâm nkuăl hôm. Mra dơi saơ lah nuih n’hâm ŭch kơl an, mra hăn kơl an gay ma ndơn nau kan mât đăp mpăn tâm ăp nau jêr, nau kan mhe bah ăp băl mom lah nsum ndrel bah mom ndăm tâm nkuăl Cư M’gar lah êng ri geh ƀư ueh mro. Nau nê ân saơ nau kan, nau dơi bah mom ndăm tâm nau nsum ty đah ăp gưl uỷ, n’gâng kan bah nkuăl tâm nau njrăng rdâng srê ji”.

Đah nau mĭn “mô râng kơl an ri rnôk aơ ri ntă jŏ dĭng hăn kơl”, âk nŭih đoàn viên hŏ mô rvê mpeh nau đăng ký râng nau kơl an mpeh bôk năp njrăng rdâng srê Covid-19. Bol ma măng, nar, mih sial jêr jâk, ndrel ma ăp nau kan rmôt kan êng, mom ndăm Dak Lak dôl nsôih rgop n’hâm đah ăp nau kan n’hêl gay ma ndrel nsum ty kơl jut jăng lơi srê ji./.

                        Nŭih rblang: H’Thi