VOV4.M’nông: Ta n’gor Gia Lai, âk rmôt kan, êng nuĭh lĕ geh âk nău ƀư ngăn ngên gay tâm pă ăp jêr jŏt, ŏk r’ah đah rmôt kan dôl gŭ ntŭk trong rlong sial nchăng n’gang srê.

          Gay ndrel ty rgop soan ntop kơl n’gor Gia Lai tâm trong kan njrăng, n’gang chôt srê Covid-19, rmôt Lŏng bôk tôr Fly To Sky tâm rgop đah Hội Liên hiệp Druh ndăm Việt Nam n’gor Gia Lai ƀư Bôk nău kan “Tâm pă tâm rŏng-Gia Lai ndrel ty lơh chrai Covid-19” đah ăp nău mbơh uĕh lăng đah nău kan bah nuĭh ƀon lan n’hanh mât tay nuih n’hâm tâm rnglăp ta ntŭk gŭ rêh. Rmôt lŏng bôk tôr hôm an Ƀan ntĭm đă njrăng, n’gang srê Covid-19 n’gor Gia Lai ăp ndoh ndơ kơt bok put mbung, bil mprănh dak diu, dak puh rao kaman, nhiệt kế hồng ngoại n’hanh ăp ndơ dŏng khlay. Nô Lê Văn Phúc-Chủ nhiệm Rmôt lŏng bôk tôr nkoch:

          “Bah du hê nuĭh ƀon lan Việt Nam, lah du hê nuĭh kon bah nkual neh Gia Lai, gâp kơt ăp băl tâm rmôt lŏng bôk tôr dŭt rvê. Tâm 4 rơh chôt srê Covid-19, rmôt ƀư ăp nău kan gay ntop kơl njrăng n’gang srê n’hanh tât aƀaơ dĭng lĕ khlay ntop kơl geh 5 rmen prăk hôm. Đah nău ŭch ntop kơl an ăp rmôt pah kan, kơt nuĭh ƀon lan jêr jŏt ta n’gor, tâm pă mâp jêr jŏt gay ndrel ty lơh chrai Covid-19”.

Ăp nuĭh lŏng bôk tôr ntop kơl ntŭk bôk năp nchăng n’gang srê ta Gia Lai

          Hôm nô Phạm Thăng Bằng-Du hê tơm mir nkao ta nkual ƀon têh Pleiku ndrel ăp nuĭh tâm câu lạc bộ “Nkao lan Gia Lai” an 295 rkeh prăk n’hanh 100 thùng mì tôm tât Ƀan ntĭm đă njrăng n’gang srê Covid-19 n’gor Gia Lai. Nô Phạm Thăng Bằng, an gĭt.

          “Gâp mpŏng ăp ngih pah kan nău kan n’hanh nuĭh ƀon lan ndrel soan, tâm rnglăp, ƀư tĭng nău ntĭm bah gưl ka lơ gay he nchrăng n’gang srê, lôch jêh nău ŭch bah nuĭh ƀon lan dôl kâp lôch bah srê lơ ơm lơ uĕh”.

Ăp ndơ dŏng khlay bah ăp nuĭh lŏng bôk tôr dơi njuăl tât ăp nkual nkhah êng

          Đah nuih n’hâm “Tâm yô̆ tâm kơl”, ăp nar bah năp, âk rmôt kơl an lĕ rgop âk ndơ dak si kơt bok put mbung, dak puh rao kaman ty, n’hanh âk tấn biăp, bum, play ăp ntil gay ntop kơl an ntŭk bôk năp dôl măng nar njrăng n’gang srê. Tĭng Uỷ ban MTTQ Việt Nam n’gor Gia Lai, jêh rlău 3 khay rgŏ jă, ntŭk kan lĕ wơt dơn prăk n’hanh ndơ bah 345 rmôt kan, êng nuĭh kơl trong kan njrăng n’gang srê Covid-19 n’gor Gia Lai, đah dĭng lĕ bơi 22 rmen prăk. Wa Phạm Thị Lan-Groi Kruanh Uỷ ban MTTQ Việt Nam n’gor Gia Lai an gĭt:

          “Mpôl hên lĕ geh nău kuăl jă geh tâm ban nuih n’hâm, tâm ban soan bah ăp nsum mpôl, êng nuĭh, ăp ngih pah kan, ntŭk kan, doanh nghiệp rƀŏng tĭng ntop kơl trong kan njrăng n’gang srê Covid-19. Mpôl hên mbra dŏng tơm prăk ntop kơl aơ gay ơm ntop kơl ăp ntŭk khah êng bah rmôt tahen, công an n’gor n’hanh ăp ngih dak si, nkre ntop kơl kônh wa ƀon lan tâm nkual srê ndâk nkra tay jêr jŏt, đăp mpăn nău rêh. Mpŏng, đah nău tâm rnglăp tâm ban ŭch du nuih n’hâm ri he mbra srôih ndrel gay ntrôl rŭch chôt srê”.

          Nuĭh rblang: Y Sưng Phê Ja