VOV4.M'nông: Tĭng Sở Công Thương n'gor Gia Lai, ntơm bah bôk năm tât aƀaơ, lĕ rngôch nsĭt geh tăch n'gluh bah n'gor nchroh nklăp 360 rkeh đôlar, geh 59% trong nchrăp lĕ ma năm, hao 22,3% rđĭl đah ndrel khay dja năm e nơh. Tâm nê cà phê lah ndơ tăch n'gluh tơm, âk 57,5% lĕ rngôch rnoh geh ndơ tăch n'gluh. Na nê̆, tâm 7 khay aơ, rnoh âk tăch n'gluh cà phê ta Gia Lai geh 138 rbăn tấn, tâm ban đah nsĭt geh 207 rkeh đôlar.

Rđĭl đah năm 2020, tăch n'gluh cà phê hao rlău 20% mpeh rnoh âk n'hanh hao rlău 24% mpeh rnoh khlay. Sở Công thương Gia Lai an gĭt, tâm bah ri aơ nơh, ăp doanh nghiệp tăch n'gluh cà phê hŏ ngăch rdâk njêng nkual tăm rlău 34 rbăn ha cà phê tĭng di rnoh 4C, UTZ, Organic; geh trong nchrăp, leo ƀư mât chăm bên đah nô nău nuh srê; di rnoh mbrô ntơm bah rsôp nklâm, săk kah uĕh ndơ geh ƀư, ƀoi tĭng tơm luh, ntŭk neh tăm; ndăn dŏng ăp trong dơh soih bah ăp nău tâm ton tăch rgâl./.

Nuĭh rblang: Điểu Thân