VOV4.M’nông: N’gâng kan ntĭm nti lĕ an trong ntĭm, ntĭm nti ta jrô tâm ban đah gưl chôt srê, tâm nĕ ta ăp nkual geh srê ta rnoh gưl 1, 2 (tâm ban lah nkual mô geh srê n’hanh geh srê) ri dơi ƀư ntĭm n’hanh nti ta jrô. Yơn lah âk nău rgop an lah, gay tŏng ăp đăp mpăn an kon hŏk tât ngih sam ƀŭt tâm rnôk tâm di đăp mpăn, ngăch, uănh nđôi tam chôt srê Covid-19 ri đah nău mkra kơt: chuh vaccine, “5K”, ƀư nti tâm ƀah... ri an nâp nâl tay trong groi nđôi dak si ngih sam ƀŭt gay geh ntŭk ntô đăp mpăn an kon se ta ngih sam ƀŭt.

          Tĭng ăp nuĭh way kan, tâm rnôk srê Covid-19 geh jêr jŏt, nău tŏng ăp đăp mpăn săk soan an kon hŏk lah khlay ngăn. Tâm rnôk neh dak he ƀư tâm di đăp mpăn, ngăch, uănh nđôi srê Covid-19 tam, dơi tât ngih sam ƀŭt nti lah nău ŭch tâm di bah kon hŏk jêng an geh trong ơm ngăn gay ăp oh hăn nti. Nău tâm pă nkual gay ntrŭnh an ƀư nti ta ngih sam bŭt mô lah ntĭ trực tuyến lah tâm di da dê tâm rnôk aƀaơ. Yơn lah, ndrel đah trong mkra tâm pă nkual ri hôm ŭch geh âk trong mkra tâm ban êng gay kon hŏk tât ngih sam ƀŭt kơt: chuh vaccine, ƀư nti tâm ƀah, “5K”. Tĭng Groi Chủ nhiệm Ủy ban Văn hóa- Ntĭm nti bah Quốc hội Tạ Văn Hạ, an ƀư uănh nđôi dak si đah kon hŏk ta ngih sam ƀŭt rjăp lơn rnôk ăp oh plơ̆ tay ngih sam ƀŭt nti yor “nkual mô geh srê” tâm njrăng n’gang srê Covid-19 knŭng geh nău dơi oi dơm:

          “Srê mô geh nkual, srê mô geh n’har. Hôm aƀaơ mô geh srê, yơn ôi taơ dơi jêng ntŭk mô hôm geh ntŭk mô geh srê tay. Jêng rƀŏng tât he an geh trong ƀư di, kơt lah ta Nhật Bản geh trong n’gơ neh, lah kơt n’gơ neh, ăp mon dơi nti mbra m’hâm ƀư n’hanh tĭng gưl m’hâm ƀư. He an ndâk njêng du trong tâm di đah ngih sam ƀŭt, rnôk saơ F0 tâm rnôk dơi mkra m’hâm ƀư, đah ăp kon m’hâm ƀư, đah ăp nai m’hâm ƀư”.

          Ntoh măt Quốc hội wa Nguyễn Anh Trí an lah, tâm rnôk rêh nsum, tâm di đăp mpăn đah srê Covid-19 ri nău nti an mĭn tât nău rgâl. Kon hŏk mô dơi ntĭm ta ngih sam ƀŭt, nti tă bah tivi mro yor nkre mô tŏng ăp uĕh blău n’hanh đah jŏ jong mbra khuch tât săk soan đah nuih n’hâm bah ăp oh. Yor rĭ, an geh ngih sam ƀŭt đăp mpăn gay me bơ̆ đăp mpăn njŭn kon tât ngih sam ƀŭt:

          “Nău dŭt khlay lah ƀư geh trong dak si tâm ăp ngih sam ƀŭt dâl. Aơ lah ntŭk ngih dak si. Bah meng ăp nai ntĭm nti, bah meng ăp nuĭh mât rong ri geh du rmôt dŭt khlay nĕ lah cán bộ dak si. Ăp nar an vĕ duh săk, jêh nĕ ntĭm an ăp mon ăp nău, jêh nĕ lah geh nău saơ ri uănh năl an ăp mon”.

          Ta rơh rƀŭn mhe aơ đah Chính phủ đah N’gâng kan ntĭm nti mpeh ƀư trong nchrăp năm nti 2021-2022 tâm rnôk srê Covid-19, Groi kruanh ntŭk kan dơi kan mbơh ƀư ăp trong đăp mpăn rnôk nti plơ̆ tay ngih sam ƀŭt. Tĭng nĕ, ndrel đah nău ntrôl ngăch chuh vaccine an kon hŏk bah 12 năm deh tât bah dâng 18 năm deh ri an uănh tay, nâp nâl tay trong dak si ngih sam ƀŭt, đăp mpăn ntŭk ntô an kon hŏk tâm rnôk srê:

          “Ăp mon kon hŏk ngăn lah ăp mon tâm rnoh năm deh mô hŏ dơi chuh vaccine hăn nti, he an geh trong mât njrăng. Dăn đă N’gâng kan dak si đah N’gâng kan ntĭm nti ntĭm rđău uănh tay, nchrăp trong groi nđôi dak si ta ngih sam ƀŭt, m’hâm ƀư an lĕ rngôch ăp mon kon hŏk tâm ngih sam ƀŭt geh tu tơm na nê̆ gay uănh nđôi săk soan tâm nău srê, tŏng ăp di nuih n’hâm, he tât ngih sam ƀŭt ri an đăp mpăn n’hanh tâm ngih sam ƀŭt nĕ lah ntŭk ntô đăp mpăn”.

          Aƀaơ hin, geh 23 n’gor, nkual ƀon têh an kon hŏk hăn nti ta ngih sam ƀŭt, 15 n’gor, nkual ƀon têh nti rgop đah trực tuyến n’hanh ta ngih sam ƀŭt, ăp n’gor, nkual ƀon têh hôm ƀa ƀă nti trực tuyến n’hanh tă bah ti vi. Âk ntŭk dôl rgâl an nti ta ngih sam ƀŭt rnôk srê dơi uănh nđôi. Âk nuĭh way kan an lah, rnôk dơi ƀư trong groi nđôi dak si ta ngih sam ƀŭt rjăp, boăt nthoi trong sam ƀŭt sam tra bah kon hŏk ăp ngih sam ƀŭt đah trong sam ƀŭt sam tra njrăng n’gang srê bah ntŭk gŭ n’hanh mbơh ƀư rĭng tâm ban ăp trong mkra êng ri mbra dơi geh ntŭk ntô đăp mpăn an kon hŏk tât ngih sam ƀŭt./.

                    Nuĭh rblang: Y Sưng Phê Ja