VOV4.M'nông: Ôi (5/8), Mpôl pah kan bah Chính phủ tă bah Groi Thủ tướng Vũ Đức Đam ƀư kruanh mpôl leo hăn hŏ tât ôp uănh pah kan njrăng, n'gang nuh srê ta n'gor Bình Phước. Mpôl pah kan hŏ hăn ôp uănh pah kan săm nuĭh ji Covid-19 ta Nhih dak si manh ntăm an ta nkuâl Đồng Phú, n'gor Bình Phước. Nhih dak si dja geh rnoh hvi 150 nsưng bĭch ji, dŏng kan ntơm bah nar 30/7 tât aƀaơ n'hanh dôl săm an 43 nuĭh ji. Bah năp nê, nhih dak si săm bah 3 nuĭh ji n'hanh hŏ dơi an sĭt jay.

Groi Thủ tướng Vũ Đức Đam năl lah n'hanh rnê âk nău nsrôih bah rmôt bác sĩ, điều dưỡng hŏ săm an nuĭh ji Covid-19. Groi thủ tướng lah rjăp, rlău ma phác đồ bah Bộ Y tế, n'gor ân uănh khlay nkre săm đah Đông, Tây y n'hanh ƀư an ntŭk gŭ, nău mĭn nđik aih an nuĭh ji mơ ngăch bah ji. Aƀaơ, Bình Dương n'hanh nkual ƀon têh Hồ Chí Minh geh rnoh nuĭh ntưp dŭt âk, jêng Bình Phước mô dơi uănh lhơ, thơ tha tâm pah kan njrăng, n'gang nuh srê ntưp rêng./.

Nuĭh rblang: Điểu Thân