VOV4.M’nông - Nar 30/11 (tĭng mông New York), Hội đồng Bảo an Liên hợp quốc rƀŭn ăp rơh mpeh nu nău Trung Đông, geh nău Palestine. Wa Tor Wenesland, Nuĭh ƀĭt joet tâm pă êng bah Tổng thư ký Liên hợp quốc mpeh ƀư đăp mpăn Trung Đông n’hanh wa Comfort Ero, Groi Kruanh manh kan bah Rmôt kan mĭn njêng duh jêr lam ntŭr neh lĕ mbơh ta rơh rƀŭn. Wa Comfort Ero nkoch klach rvê đah nău lam ntŭr neh kơt lĕ 2 ding tâm lơh dôl roh nău nsing nơm ƀư đăp mpăn Trung Đông, tâm rnôk Israel na nao jăng lơi nău đă geh tât trong mkra 2 Ngih dak. Du đêt dak kuăl jă Rmôt kôp poăn ƀư rƀŭn nchră lam ntŭr neh đah tât râng bah ăp ding geh tât gay ntrôl ƀư đăp mpăn dôl geh rlu nsrŭng. Âk dak lah rjăp an đăp mpăn dơh an ăp nău ƀư kơl nuĭh n’hanh ndâk njêng nkual Gaza jêh tâm lơh, nkre kuăl jă ăp nuĭh ntop kơl n’hao tâm rgop an tơm prăk bah Ngih pah kan Liên hợp quốc mpeh ntop kơl nuĭh gŭ ndê Palestin.

Nuĭh rblang: Y Sưng Phê Ja