`VOV4.M’nông: Khay 6 năm aơ, ăp xã nkuăl têh bah Ia Grai, Gia Lai kŏ luh bah rnăk jêr jŏt ndrel jêr jŏt ngăn ngên (tĭng nau ntrŭnh 816 lơ 4/6/2021 bah Thủ tướng Chính phủ). Aơ lah nau rhơn bah N’gâng kan ndrel ƀon lan yor ăp nau nsôih ndâk njêng văng sa rêh jêng, jut n’huch ach o, hŏ geh dơi. Yơn lah nau nê lŏ ƀư âk rnăk geh manh prăk kơl an lŏ hun hao tuch tăm, tâm rnôk âk nau jêr mhe hŏ ntoh.

            Năm 2017, yuh R’Mah Blich, ƀon Doch Tung, xã Ia Grai, nkuăl Ia Grai, n’gor Gia Lai lah rnăk geh manh prăk tă bah Bôk nau kan rnăk ƀư kan ê nkra tăch rgâl nkuăl jêr gay ma hun hao nau mât rong. Ntơm tơm prăk manh 30 rkeh, yuh Blich ntuh kơl nkra ndrung rong ndrel rong ân ndrôk hun hao văng sa ndrel hŏ geh trok du gưl prăk manh. Yơn lah, mhe aơ, ndrôk yuh khĭt yor ji pŭn ntô. Yuh Blich ŭch prăk gay ma mât rong tay, yơn xã hŏ lah nkuăl I, mô hôm lah nkuăl jêr kơt ntơm nơh ôh, ri ma yuh mô geh dơi manh:

            ‘Bah năp nơh gâp manh prăk ƀư nau kan ê kra tăch rgâl, rnôk aơ hao nkuăl I hôm ri hŏ lăn manh hôm, kơt ntŭk kan phung hên ta aơ ri trok hôm ma kônh wa ê geh nau nâp hŏ tŏng dơi gay ma manh yor mô hôm geh tâm nroh moh săk geh ân manh ri kŏ ŭch n’gâng kan ba lơ kơl an kônh wa”.

            Tâm ban kơt nê, wa Puih Phyinm nŭih ndrel ƀon kŏ geh manh 40 rkeh prăk tă bah bôk nau kan aơ gay ma tăm cà phê. Wa Puih Phyim nkoch: Xã luh bah rnoh săk mâp nau jêr yơn lah nŭih ƀon lan hôm mâp nau jêr yor srê Covid-19. Lah mô geh manh prăk kơt ntơm nơh ri kônh wa jêr ngăn geh hun hao văng sa:

            “Ntŭk manh prăk kơl an ri rnôk aơ xã Ia Grái tâm nkuăl I, mô dơi geh kơl an kơt ntơm nơh ôh, ƀon lan dôl ma mâp nau jêr. Bar năm ma aơ geh srê Covid-19 mô geh dơi ƀư kan, điều, cà phê jur thuk kŏ lơh jêr ân kônh wa. Ŭch ân Ngih dak mĭn ntrong pơk trong nơih gay ma ân kônh wa”.

            Wa Nguyễn Đức Tấn, Kruanh UBND xã Ia Grái, mbơh, xã geh rlau 10 rbăn nŭih rnoi mpôl đê̆ geh bơi tât 45%, rnoh rnăk ach o, êp ach o bah xã n’huch tĭng ăp năm, tât nrôk aơ hôm bơi tât 500 rnăk. Wa Tấn kŏ rvê ngăn rnôk xã hao nkuăl I. Srê Covid-19 dôl lơh jêr hô. Lah mô geh manh prăk kơl an kơt bah năp nê, rnoh rnăk plơ̆ ach o mra hao tay:

            ‘Rnôk aơ gay geh tơm prăk ƀư nau kan, hun hao văng sa tăm tơm si, tơm tăm gleh nar, tơm s âply ri ngăn lah manh prăk ngân hàng chính sách. Lah rnôk aơ mô geh tơm prăk gay ma kơl an ân manh tâm ngân hnàg chính sách ri nau jêr bah kônh wa ƀon lan rnoi mpôl đê̆ ta aơ hô ngăn. Xã đă lah ân geh du nau ntrŭnh êng gay ma kơl an ân ăp rnăk gay geh manh prăk ndrel ăp tơm ân manh êng bah Chính phủ, Ngih dak gay ma pơk trong nơih ân kônh wa hun hao văng sa”.

            Jêh rnôk nau ntrŭnh 861 lơ 4/6/2021 bah Thủ tướng Chính phủ geh nau tam 13/13 xã, nkuăl têh tâm nkuăl Ia Grai lah xã nkuăl I. Lah nkuăl geh tât âk xã dôl lah nkuăl II jêng ntrơn nkuăl I rnôk ƀư tĭng nau ntrŭnh. 1.800 rnăk dôl manh prăk bah bôk nau kan rnăk ƀư nau kan tăch rgâl, jêh rnôk trôk ngân hàng 60 rmen, mra mô geh ân manh prăk tay. Wa Đỗ Văn Đông, Groi Kruanh UBND nkuăl Ia Grai, mbơh:

            ‘Nau jêr ngăn rnôk aơ ri ăp kônh wa mô geh manh tay prăk đŏng ôh, ri UBND nkuăl rđau ân Ngân hàng chính sách bah nkuăl lŏ kơp, geh ăp nau kan kơt tĭng, kơl an ân ăp nau kan ân geh tâm di gay ma pơk trong nơih ân kônh wa geh manh prăk tâm rnôk dôl ma mâp nau jêr kơt rnôk aơ. Lŏ nkoch trêng bonh đă ân kônh wa gĭt dơi ăp nau kan aơ ân tâm di gay kônh wa geh nau gĭt ân tâm di, geh nau hun hao. Nau kơl an bah Ngih dak kŏ geh kơl du du tơ̆, hôm nau kan geh tât nau rêh drăp ndơ, nuih n’hâm bah ƀon lan ân geh n’hao hao, ndri ma ăp nau kan ân geh koh lơi gay ma kônh wa blau nchrăp êng tâm nau kan ê nkra, tuch tăm, tăch rgâl bah nơm”.

            Luh bah ăp nau jêr ndrel ngăn ngên mâp nau jêr lah nau rhơn đah nkuăl Ia Grai, n’gor Gia Lai. Yơn êng đah bơi tât 2000 rnăk dôl ma manh prăk chính sách xã hội ân an nau kan tăch rgâl dôl ma tâm nkuăl jêr jŏt, kônh wa mra roh ntŭk nsing rnơm nau kơl an mpeh nau kan. Tâm rnôk âk nau jêr mhe yor srê nuh, srê tâm ndrôk rpu, srê Covid-19 ndrel kônh wa dôl ŭch geh nau kơl an doh rklaih./.

                                    Nŭih rblang: H’Thi