VOV4.Mnông- Khánh Sơn n’hanh Khánh Vĩnh n’gor Khánh Hòa lah 2 nkuăl gôl yôk, ntŭk gŭ rêh bâh ƀon lan mpôl rnoi đê̆, nău rêh jêr jŏt. Tâm nĕ, nkuăl Khánh Vĩnh dăch n’har đah Dak Lak n’hanh Lâm Đồng. Ndrel đah nău kan ntuh kơl rdâk njêng ndơ dŏng ntung trong, 2 nkuăl gôl yôk aơ lĕ hun hao nău pah kan jan sa, n’hao nău geh an ƀon lan, tĭng njoat geh bah nău ach o.

Rnăk vâl nô Cao Hữu Thìn, rnoi Rắc Lây, ta thôn Hòn Dung, xã Sơn Hiệp, nkuăl Khánh Sơn, n’gor Khánh Hòa geh 7 sào neh ƀư mir, tâm nĕ geh 5 sào tăm sầu riêng, 2 sào tăm play bŭng ntô nđir. Tâm rnôk kâp lêh tơm sa play, nô Cao Hữu Thìn tăm tơm gơnh sa kơt tuh ăp ntil, mbo. Kơp tât dŭt năm 2021, rnăk vâl nô Cao Hữu Thìn geh tât 100 rkeh prăk.

Gâp dŭt ŭch bah ach o, tăm tơm sa play, pah kan nâp jŏ lơn. Geh rmeh gay ma geh prăk mpêt nkrem. Tăm tâm breh đah tơm êng klâp ma 3 khay geh hôm, sŏk prăk nĕ he rvăt phân poh an sầu riêng. Gâp ăp nar hăn pah kan ƀư ngih jay an bu, tŏng prăk sŏng ăp nar an rnăk vâl. Prăk tăch sầu riêng gay ma ntêm, ƀư ntop tay ntuh ƀư mât ăp ntil tơm êng”.

Rlău 10 năm aơ, nkuăl Khánh Sơn, n’gor Khánh Hòa rgâl tơm tăm bâh ăp ntil tơm mô geh săk rnglăy tât ăp ntil tơm sa play ntoh lư kơt sầu riêng, plăy bŭng ntô nđir, măng cụt, tao..Tât aƀaơ, nkuăl gôl yôk Khánh Sơn lĕ geh rlău 1.700 ha sầu riêng, âk rnăk ƀon lan nău geh rmen prăk bâh nkual neh yôk. Nkuăl Khánh Sơn, way geh ƀư ăp nău kan tâm rgop, mbơh nău kan gay ma ăp nuĭh gĭt nău ntơ sầu riêng. ăp nău jêr jŏt ma ƀon lan nuĭh rnoi đê̆ dôl mâp kơt lah mô tŏng neh pah kan, nău pah kan dôl ntơm rgâl. Yuh Cao Thị Thanh Thảo, ta thôn Tà Nĩa, xã Sơn Trung, nkuăl Khánh Sơn an gĭt, rnăk vâl geh rlău 1 ha sầu riêng ndrel đah âk ntil tơm sa play êng.

Sầu riêng Khánh Sơn geh nău ntơ êng bâh Khánh Sơn hôm, 1 ha he geh rlău 200 rkeh prăk, ƀon lan ta aơ lah geh rnoh prăk âk ngăn hôm. Đah ƀon lan ta aơ, ŭch bah ach o rĭ an geh mât neh ƀât. Geh ndơ ma tăm ăp ntil tơm sa play. Ƀon lan hăn kan an ăp rnăk geh mir neh têh, nkre geh prăk nkre dơi geh ƀư nău kan mât chăm tơm sầu riêng ta rnăk nĕ. Gay ma he geh mât chăm tay mir tơm nơm tăm”.

Lvang năm 2021-2025, nkuăl Khánh Sơn uănh năl bâh nău njêng nkual way tăm tơm sa play, hun hao pâl nđaih ndrel đah tuch tăm gay ma ơm bah nkuăl ach o. Ta ntŭk lĕ geh nău nchrăp kan tât năm 2025, ndơ̆ nău geh râng geh bâh ƀon lan rnoi đê̆ hao rlău 2 tơ̆ đah năm 2020. Wa Nguyễn Văn Nhuận, kruanh UBND nkuăl Khánh Sơn, n’gor Khánh Hòa an gĭt, gay ma n’hao nău geh an ƀon lan, ơm bah nkuăl ach o, rlău ma nău ntuh kơl ndơ dŏng ntung trong ăp năm geh klâp ma rlău 100 rmen prăk, nkuăl dôl n’hao nău dơi kan, rgâl mhe trong pah kan bâh ƀon lan rnoi đê̆:

Gâp ƀư trong aơ gay ma ƀon lan lăp tât ntŭk ma ƀon lan rgum pah kan jan sa. Ntơm nơh mô geh trong hăn an geh hao yôk, njrŏng prit bâh ta mir anh roh n’gul nar mơ tât ta aơ. Nău mĭn ŭch nsum lah nsrôih an bah ach o, nsrôih rĭ geh yơn mô hŏ geh nău rgâl. Nău kan mbơh tơih, rgŏ jă, ntuh kơl an ntĭm nti, ntĭm nti an rơh oh kon se bâh 5-10 năm tay mbra êng.

N’gor Khánh Hòa aƀaơ geh klâp ma 6 rbăn rnăk ƀon lan rnoi đê̆ ach o, geh tât 60% rnoh rnăk ach o ta lam dak. N’gor lĕ geh bôk nău kan ntuh kơl hun hao wăng sa rêh jêng ta nkual yôk gay ma an bah tâm ƀah đah nkual yôk n’hanh nkual ba dâng. Lvang năm 2015-2020, n’gor Khánh Hòa lĕ ntêm geh klâp ma 400 rmen prăk ntuh kơl rdâk njêng ndơ dŏng ntung trong, nău pah kan jan sa an 2 nkuăl gôl yôk Khánh Sơn, Khánh Vĩnh. Wa Nguyễn Tấn Tuân, kruanh UBND n’gor Khánh Hòa an gĭt, dôl geh rdâk njêng nău nchrăp n’gor tĭng trong rgâl mhe bâh neh bri jêng neh tăm tơm si jŏ năm, tâm rgop đah ntĭm nti nău kan, kơl an ƀon lan bah ach o nâp nâl.

2 nkuăl gôl yôk Khánh Sơn n’hanh Khánh Vĩnh, an geh nănh rgâl mhe bâh neh bri pah kan jêng tăm tơm si jŏ năm. Ƀon lan mơ geh tŏng nău dơi gay ma dơn lĕ ăp nău kơl pah kan jan sa. Ntơm nơh dŭt âk lah hăn ta bri, ƀư mir rĭ aƀaơ an geh ntĭm nti nău kan, ntơm ƀư ăp nkual kơt lah Khánh Sơn, Khánh Vĩnh an geh jêng nkual công nghiệp, nkual ƀon têh sinh thái”.

Tâm lvang năm 2021-2025, n’gor Khánh Hòa an geh rgum ntuh kơl an  gôl yôk, nsrôih tât lĕ năm kan aơ mô hôm geh nkuăl ach o. N’gor mbra an pă tơm prăk ngih dak ntuh kơl an nkual rnoi đê̆-gôl yôk hao dŭt đê̆ lah 1,5 tơ̆ đah lvang năm 2016-2020. Ta mneg nĕ, ng’or lĕ rgâl mhe bơi tât 10 rbăn ha neh bâh ăp nkual ƀon lan, ntŭk mât bri gay ma ƀư pă an bơi tât 3 rbăn ha an ƀon lan geh neh pah kan jan sa, rnoh hôm e pă an UBND ăp nkuăl mât uănh.

Nuĭh rblang: Thị Đoắt