VOV4.M'nông: Tâm rnôk tĭng ƀư trong nchrăp nkra têh hvi tay ăp gâl trong ta njăr quốc lộ 24, ta gâl ndranh ƀư mbrô 5 hăn rlău xã Hiếu, nkuâl Kon Plông, n'gor Kon Tum hŏ geh neh dak sor rchoh bôr ndâp bơi 8ha neh tăm ba bah nuĭh ƀon lan. Gay đăp mpăn ăp grep tâm ban kơt ngăch ƀư trong, ăp nhih pah kan dơi kan bah n'gor Kon Tum hŏ ngăch lăp kan đah nău ton bah nuĭh tơm ƀư ndranh lah ntop kơl tâm di an nuĭh ƀon lan.  

Njok bar ding trong quốc lộ 24 gâl hăn rlău xã Hiếu, nkuâl Kon Plông, ta âk gâl trong hăn dôl nkra têh uĕh tay, ta du đêt ntŭk neh lŭ geh dak sor rchoh ndâp bôr lŏ sre ƀư nuĭh ƀon lan mô dơi tuch tăm. Wa Phan Thế Vinh, kruanh UBND xã Hiếu an gĭt, neh tăm ba geh tât khuch lơn âk lah bah nuĭh ƀon lan ăp ƀon: Đăk Lom, Vi Glơng n'hanh Kon Plông:

“Tâm rnôk ƀư trong quốc lộ 24 khuch tă bah phŭt sial lơh ri neh lŭ pĭch rlâm bôr ndâp ăp neh lŏ. Nuĭh ƀon lan dôl kâp ăp nhih pah kan geh nău dơi kan pah kan đah tơm  nuĭh ƀư ndranh ntuh kơl gay ntop kơl an nuĭh ƀon lan năn ngăch n'hanh đăp mpăn geh neh tuch tăm tâm let năp tay đŏng".

        Tĭng tơm nuĭh ƀư ndranh mbrô 5 gâl hăn rlău xã Hiếu, bol ma hŏ mĭn tât nău khuch dja n'hanh hŏ nsrôih joi trong nkra gay bah ir tât khuch lŏ sre bah nuĭh ƀon lan yơn mô geh nău tam ơm. Nkô̆ lah tă bah rnôk ƀư trong hang dak bah lơ prêh ir, sop ntâng trôk hôm way mih mbro jêng dak sor rchoh rdu lŭ neh bôr ndâp ăp lŏ sre bah nuĭh ƀon lan. Wa Bùi Huy Trình, Groi Giám đốc Công ty cổ phần Trường Long, nuĭh tơm ƀư ndranh mbrô 5 an gĭt, nhih pah kan hŏ ton ntop kơl an nuĭh ƀon lan:

       "Mpôl hên tơm ƀư ndranh ndrel đah ăp ding geh tât, nuĭh tơm ntuh kơl pơh bah năp tay hop geh trong nkra gay ntop kơl an kônh wa năn ngăch, tâm di ngăn".

        Wa Nguyễn Văn Thanh, ntơh măt Ƀan mât uănh trong nchrăp ƀư ntung trong Kon Tum, đơn vị dơi Sở Giao thông Vận tải n'gor Kon Tum nsing nơm mât uănh trong nchrăp kan an gĭt:

       “Ƀan mât uănh trong nchrăp hŏ tâm boh kan nsum đah n'gâng kan ta ntŭk, ăp nhih pah kan geh tât, rnăk wâl hăn uănh năl, weh ntrŏng n'hanh njêng trong nchrăp mbra trok tâm an nuĭh ƀon lan tâm di ngăn”.

        Ngăn an saơ, tâm rnôk ndranh ƀư gâl trong mbrô 5 kơi pơk têh hvi tay trong  quốc lộ 24 gâl hăn rlău xã Hiếu, nkuâl Kon Plông hŏ geh nău dak sor rchoh neh lŭ bôr ndâp bơi 8ha neh tăm ba bah 87 rnăk nuĭh ƀon lan đah rnoh âk tât khuch êng êng. Ƀan mât uănh trong nchrăp rdâk njêng ntung trong hăn Kon Tum nsing kalơ tâm ban ŭch đah ăp ding geh tât hŏ rdâk njêng trong nchrăp ntop kơl an nuĭh ƀon lan ƀư 4 rnoh. Na nê̆ đah ăp lŏ geh tât khuch 70% let lơ nchrăp ntop kơl nuĭh ƀon lan 3 tơ̆ tăm ba; ntơm bah 50 tât 70% ntop kơl 2 tơ̆ tăm ba; ntơm bah 30 tât 50% ntop kơl 1,5 tăm ba n'hanh geh khuch tât ta nâm 30% rnoh hvi neh tăm ba ntop kơl 1/2 tơ̆ tăm ba. Geh nău tâm ban ŭch bah nuĭh ƀon lan, nău ntop kơl roh huach khuch khat mbra dơi ƀư tâm khay 10 dĭl./.

Nuĭh rblang: Điểu Thân