VOV4.M'nông: Kêng măng 6/8, Ƀan rđău đă njrăng n'gang nuh srê Covid-19 n'gor Lâm Đồng hŏ geh si ƀŭt n'glêh an ndal đă gŭ srang ngai êng lam rêh jêng kon nuĭh tĭng nău ntrŭnh mbrô 16 bah Thủ tướng Chính phủ ta 2 xã bah nkual ƀon têh bah Đà Lạt. Tĭng nê, kơp ntơm bah 7h kêng măng 6/8, 2 xã Xuân Trường n'hanh Trạm Hành bah ƀon têh Đà Lạt mbra ntơm an gŭ srang ngai êng lam rêh jêng kon nuĭh tĭng nău ntrŭnh mbrô 16 an tât rnôk geh nău mbơh mhe.

N'glêh an gŭ srang ngai êng lam rêh jêng kon nuĭh ta 2 xã tâm kâng n'har dja ndơ̆ luh tâm rnôk nuh srê Covid-19 tât krit nji. Ƀan rđău đă njrăng n'gang nuh srê Covid-19 n'gor Lâm Đồng jao an Kruanh UBND nkual ƀon têh Đà Lạt leo an ƀư. Geh tât tơm nuh srê mhe, n'gor Lâm Đồng hŏ ndơ̆ luh nău mbơh ndăn gay joi nuĭh hăn tât ăp ntŭk geh ma nău ntưp rêng âk. Tâm nê, rlău ma ăp ntŭk mpeh 2 xã Trạm Hành n'hanh Xuân Trường, hôm geh du đêt ntŭk êng ƀa ƀă ta ăp phường 1, 2, 4, 9 n'hanh 10 ta nkual ƀon têh Đà Lạt. Aƀaơ pah kan ƀoi tĭng, nchih wăr ntŭk geh nuh srê gay rdêl bah, der ntưp rêng bah dih ƀon lan dôl dơi ăp đơn vị nsrôih an ƀư./.

      Nuĭh rblang: Điểu Thân