VOV4.M'nông: Dâk ta năp geh ma nău ranh rnoh nuĭh, Việt Nam dôl nsrôih tĭng ƀư âk trong nkra gay mât njrăng, mât chăm n'hanh n'hao ngăch dăng n'hâm suan nuĭh âk năm deh, lơn lah uănh khlay tât nkual ƀon lan rnoi mpôl đê̆.

Na nê̆, N'glêh an mbrô 1579/QĐ-TTg uănh an dŏng bôk nău kan Mât chăm n'hâm suan nuĭh âk năm deh tât năm 2030 đah nău ŭch mât chăm, n'hao ngăch dăng n'hâm suan nuĭh âk năm deh (nuĭh tŏng ntơm bah 60 năm deh let lơ) đăp mpăn bên di đah ranh rnoh nuĭh, rgop tĭng ƀư geh nău dơi Trong kan rnoh nuĭh Việt Nam tât năm 2030.

Gay jêng ngăn ngăn rnoh tât kan ndơ̆ luh nsum, bôk nău kan Mât chăm n'hâm suan nuĭh âk năm deh nuĭh âk năm deh tât năm 2030 hŏ an dŏng 14 nkô̆ na nê̆ tât năm 2030. Tâm nê geh âk rnoh ŭch tât kan khlay kơt: 100% gưl ủy Đảng, n'gâng kan ăp gưl an dŏng nghị quyết, trong nchrăp, ntuh kơl ngân sách an mât chăm n'hâm suan nuĭh âk năm deh tâm năm 2025 n'hanh mât tât năm 2030; Nuĭh âk năm deh mô lah rnăk wâl mât chăm n'hâm suan nuĭh âk năm deh na nê̆ gĭt mpeh nău lư ranh rnoh nuĭh, nău dơi mât chăm n'hâm suan nuĭh âk năm deh geh 70% năm 2025; 85% năm 2030; Nuĭh âk năm deh dơi uănh năl n'hâm suan dŭt đêt 1 tơ̆/năm, dơi nchih si ƀŭt tĭng groi nđôi mât chăm n'hâm suan geh 95% năm 2025; 100% năm 2030; N'hao lĕ rngôch nuĭh âk năm deh dơi ban saơ, săm, mât uănh ăp nău ji mô ntưp rêng (ung thư, play nuih, hao duh mham, ji chrach njŭng, ji lhăt n'hâm klơm soh jŏ bah, bôk rngok wâr ...); N'hao lĕ rngôch rnoh xã, phường, thị trấn tât rnoh gŭ rêh dêh bên đah nuĭh âk năm deh tât dŭt đêt 20% năm 2025; 50% năm 2030…

Tĭng, rnoh âk hvi bah bôk nău kan Mât chăm n'hâm suan nuĭh âk năm deh tât năm 2030 an ƀư lam dak. Rgum ta ăp n'gor, nkual ƀon têh n'hanh ntŭk geh âk bu ranh rlău rĭng geh nsum bah lam dak; nkual jru, nkual ngai, nkual jêr jŏt, nkual rnoi mpôl đê̆, mpeh yôk yang, gôl dak.

Gay dơi tât ăp rnoh kan ndơ̆ luh tât năm 2030, Bôk nău kan rdâk njêng ndrel du tơ̆ 6 nău dơn kan n'hanh trong nkra nê lah: N'hao dăng nău rđău kan, nchŏng đă bah ăp gưl ủy Đảng, n'gâng kan mpeh pah kan Mât chăm n'hâm suan nuĭh âk năm deh; ntrôl dăng nkoch trêng rgŏ jă rgâl nău way gŭ rêh uĕh râng kơl Mât chăm n'hâm suan nuĭh âk năm deh; rdâk tay, hun hao lam rêng kan pă an ndơ rhŏ dŏng mât chăm n'hâm suan bôk năp, njrăng n'gang nău ji ntưp rêng, but săm ji an nuĭh âk năm deh; tĭng kơn rdâk njêng trong ntĭt leo Mât chăm n'hâm suan nuĭh âk năm deh jŏ jong; ntĭm nti, kơi năp nti nău blău kan an nuĭh pah kan Mât chăm n'hâm suan nuĭh âk năm deh; ƀư lôch jêh ăp tŏng trong kơl pháp luật geh tât Mât chăm n'hâm suan nuĭh âk năm deh; gŭ mĭn, tâm boh dak bah dih n'hanh đăp mpăn tơm ndơ dŏng tĭng ƀư bôk nău kan.

Nkuâl Đại Từ, Thái Nguyên aƀaơ geh 33 rnoi nuĭh oh nô ndrel gŭ rêh, tâm nê rnoi mpôl đê̆ âk rlău 32%. Gay tĭng ƀư rnoh săk geh rnoh nuĭh dŭt âk, tâm bah ri aơ nơh, dơi geh nău ntop kơl bah Ntŭk rgum Mât chăm n'hâm suan nuĭh âk năm deh n'gor Thái Nguyên, nkuâl Đại Từ hŏ njêng geh 21 Câu lạc bộ (CLB) thể dục dưỡng sinh kinh lạc Việt Nam, wăch rgum rlău 2.000 hội viên Nuĭh âk năm deh tât. Đah âk nău kan geh nkô̆ khlay, ngăn ngăn, ăp Câu lạc bộ hŏ rgop rgâl geh ngăch dăng n'hâm suan n'hanh nsĭt tay nău rhơn an nuĭh âk năm deh ta nkuâl.

Bah meng nău ƀư tiăr nti tĭng rmôt nuĭh ta ăp nkual ƀon lan gŭ, tổ dân phố; rgum pâl ntơm bah 3- 4 tơ̆ lam Câu lạc bộ ăp khay; ăp Câu lạc bộ dưỡng sinh kinh lạc hôm ƀư nău kan tâm nđŭr, tâm kơt nti nău tă ơm gĭt kan đah ăp Câu lạc bộ tâm n'hanh bah dih n'gor. Gay mât nău kan, ăp Câu lạc bộ ƀư rgop prăk nkre bah âk tơm ndơ kơt: hội viên rgop, nău ntop kơl bah ăp mpôl kan, ăp nuĭh, doanh nghiệp, kon său ăp hội viên,…

Tĭng wa Nguyễn Ngọc Yến, Kruanh Ƀan ntơh măt nuĭh âk năm deh n'gor Thái Nguyên, gay nuĭh âk năm deh rêh rhơn mƀak, ngăch dăng, rêh uĕh n'hanh mpơl tay ăp nău tă ơm gĭt khlay bah he tâm nău rêh, way lah ntŭk nsing, trong ntĭt leo lor ntoh ang an kon său kơt tĭng ri nkô̆ nău mât chăm n'hâm suan lam lĕ rngôch an nuĭh âk năm deh nklăp ân geh trong kan têh jong, trong nkra jŏ n'hanh geh nău tam lơn.

Ân geh prăk nkrem kơt nuĭh âk năm deh ndrel đah ăp nsum mpôl, ƀư jay tâm rŏng mât chăm nuĭh âk năm deh rnôk kop ji, rdâk njêng ăp Câu lạc bộ rơh bu ranh tâm kơl nsum, ma aƀaơ ân dăn ngih dak geh tơm prăk gay năp nti an lĕ rngôch ăp ntŭk mât chăm.

Gay tĭng ƀư rnoh tât kan n'hao săk geh rnoh nuĭh, Thái Nguyên hôm tâm rdâng đah âk ntul rlong đŏng, tâm nê geh nău kuăl jă nsum mpôl kơl mât chăm lam lĕ rngôch an nuĭh âk năm deh. Yơn lah, wa Hồ Thị Thanh Thủy, Chi cục trưởng Chi cục Dân số Kế hoạch hóa gia đình n'gor Thái Nguyên

N'gâng kan mbra nsŏng kơl tay an n'gor gay tĭng ƀư ăp trong nkra uănh khlay tât nkô̆ nău pă an nău gĭt blău, mbơh gĭt lam hvi nău gĭt blău an nuĭh âk năm deh, gay nuĭh âk năm deh mbra dơi mât chăm êng n'hâm suan săk nơm tâm ban kơt mât njrăng êng n'hâm suan săk nơm, gay n'hao ngăch dăng n'hâm suan bah nuĭh âk năm deh n'hanh ƀư ăp nău kan uănh năl n'hâm suan, mât n'hâm suan an nuĭh âk năm deh đah nău ŭch rŏng lah săk geh nău rêh tâm ban kơt n'hâm suan nuĭh âk năm deh mbra rgâl geh n'hanh n'hao săk geh rnoh nuĭh nsum./.

VOV4- Nuĭh rblang: Điểu Thân