VOV4.M’nông – Nar rgum ndơ sa uănh năl kỷ lục lam dak, nău ƀư mbơh tơih n’hanh nkret gâm 100 ndơ sa kah bah biăp-bum-play n’hanh nkao Đà Lạt dơi ƀư ta bôk khay 4/2021 mbra geh nkô̆ nău khlay, pơk an nău ƀư mbah rhơn Festival Nkao Đà Lạt năm 2021. Kơp tât nar 15/3/2021, nău ƀư lĕ wăch rgum ăp nuĭh lah nuĭh nkret gâm, dăn nkret gâm rlău 100 ndơ sa; tâm nĕ, knŭng kơp êng ăp nuĭh nkret gâm ta Lâm Đồng, geh 77 nuĭh bah Đà Lạt, 17 nuĭh bah ăp nkuăl; hôm ƀa ƀă bah ăp n’gor, nkual ƀon têh tâm dak. Ăp nuĭh nkret gâm mô knŭng tât bah ăp jay ngêt sa, ntŭk ngêt sa; ma hôm tât bah ăp ngih sam ƀŭt ntĭm nău kan, ntŭk lĭr ndơ, ntŭk tuch tăm mât rong.... Nău ƀư “100 ndơ sa bah biăp n’hanh nkao Đà Lạt” yor Hiệp hội Pâl nđaih Lâm Đồng-Đà Lạt ƀư, lah tâm rđŭr tâm mât, nti nău blău ơm nău kan nkret gâm bah ăp nuĭh nkret gâm ăp ntŭk; kơt mpla nsơ n’hanh tâm rnglăp biăp-bum-play n’hanh nkao Đà Lạt.

Nŭih rblang: Y Sưng Phê Ja