VOV4.Mnông- Ấn Độ n’hanh Anh nar 13/1, ntơm ƀư ăp rơh tâm nchră mpeh nău tâm ton tăch rgâl đăp mpăn ta Thủ đô New Delhi, Ấn Độ. Kruanh n’gâng kan Công thương Ấn Độ Piyush Goyal geh rơh tâm mâp đah kruanh n’gâng kan tăch rgâl lam ntur neh dak Anh wa bu ur Anne Marie Trevelyan gay ma ntơm ƀư ăp rơh tâm nchră mpeh du nău tâm ton tăch rgâl geh âk nău ŭch rŏng, geh uănh năl lah nsĭt tay nău geh têh kuăng an lĕ 2 ding. Ntoh ngơi đah báo chí ta năp rơh tâm nchră, wa An ne Marie Trevelyan an gĭt, nău tâm ton mbra geh ntop ntrôl hun hao wăng sa tăch rgâl đah bar ding Anh-Ấn Độ hao tât 28 rmen euro ta năm 2035 n’hanh n’hao prăk khay ta lam dak Anh hao tat 3 rmen Euro. Tĭng ăp nuĭh way kan, nău tâm ton tăch rgâl đah Ấn Độ mbra lah njoat hăn têh ta ntrong kan bâh Anh gay ma njêng rgum tăch rgâl ta nkual Ấn Độ-Thái Bình Dương.