VOV4.M’nông - Rmôt kan Hiệp ước tahen Bắc Đại Tây Dương (NATO) mhe mbơh mbra rƀŭn gưl prêh ndal tâm nar 24/3 tât ta ngih pah kan ta Brussels, dak Bỉ gay tâm nchră nu nău tâm lơh ta Ukraine. Nău mbơh na nê̆ bah NATO an gĭt nkô̆ nău rơh rƀŭn mbra rgum rblang n’hanh uănh lah mpeh nău khuch bah tâm lơh ta Ukraine, mĭn lah nău kơl bah NATO đah Ukraine n’hanh n’hao lơn tay dơi nkri n’hanh njrăng n’gang bah năp nău rnă njrăng mhe. Nău mbơh bah NATO mĭn lah đŏng Tổng thống Mỹ Joe Biden mbra râng rƀŭn nchră. Tổng thư ký NATO Jens Stoltenberg lah rjăp châu Âu n’hanh Mỹ an hăn ndrel tâm rnôk khlay aƀaơ. Nar 16/3, Kruanh n’gâng kan mât njrăng bri dak ăp dak tâm NATO rgum rƀŭn gay ndơ̆ ăp nău ntrŭnh khlay geh jŏ jong kơt n’hao rmôt tahen, nglăp ndơ tahen n’hanh ƀư ăp trong njrăng n’gang ka lơ trôk.

Nuĭh rblang: Y Sưng Phê Ja