VOV4.M’nông - Nău mbơh mhe ngăn, dơi âk nuĭh ƀon lan uănh tât, nĕ lah 144 nuĭh rêh tâm nkual nchoeng n’gang ta hiẻm 189/1 Mai Hắc Đế., phường Tân Thành, nkual ƀon têh Buôn Ma Thuột, Dak Lak jêh uănh năl mhâm mô geh ntưp đah Sars-CoV-2 da dê. Yơn lah, mô dơi thơ tha, trong kan njrăng n’gang srê Covid-19 hôm e dơi n’gâng kan ƀon lan n’hanh ăp nău kan dơi kan bah n’gor Dak Lak mbơh ƀư dŭt n’hâm.

         Jêh rnôk saơ nuĭh bôk năp ntưp đah Sars-CoV-2, nău kan dak si n’gor Dak Lak lĕ geh công văn njuăl ăp ntŭk kan tâm n’gor đă mô an dăn rlu, mô ƀư hăn nti nsơm, uănh nsong, pâl nđaih gay tŏng ăp nuĭh kan njrăng n’gang srê Covid-19.

         Tĭng nĕ, đă ăp ngih pah kan, ntŭk kan tâm n’gor wah mô an pă nău dăn rlu đah công chức, viên chức n’hanh nuĭh pah kan (knŭng nuĭh geh nkô̆ nău khlay, ndal); mô ƀư hăn nti nsơm, nsong uănh, pâl nđaih (tâm dak n’hanh bah dih dak) tâm lvang mbơh geh ntưp rêng srê Covid-19; rgum nuĭh kan gay tŏng ăp trong kan njrăng n’gang srê; mât đăp mpăn nuĭh kan tŏng ăp an trong kan njrăng n’gang srê, but uănh săm ji ta ăp ngih dak si, ơm tŏng nău ŭch mât njrăng, mât săm n’hanh nău ngăch săk soan nuĭh ƀon lan ta lam n’gor.

Nuĭh kan Ntŭk uănh nđôi kop ji n’gor sŏk mham uănh năl đah nuĭh ƀon lan nkual nchoeng n’gang 189/1 Mai Hắc Đế

         Nkre n’hao uănh nđôi, nkra rgâl di nău ƀư tĭng ăp nău ntrŭnh mpeh njrăng n’gang srê ta ngih pah kan, ntŭk kan, kruanh ăp ngih pah kan ntŭk kan uănh trok bah năp Kruanh n’gâng kan dak si đah ăp nuĭh công chức viên chức, nuĭh pah kan mô tĭng rjăp ăp nău ntrŭnh mpeh njrăng n’gang srê Covid-19; jao an Thanh tra N’gâng kan dak si ƀư tơm, tâm rgop đah ntŭk kan, gưl geh tât ƀư tĭng uănh nđôi nău mbơh ƀư ăp nkô̆ nău ntĭm rđău mpeh trong kan njrăng n’gang srê Covid-19 ta ăp ngih pah kan, ntŭk kan mât uănh, rmal rjăp ăp rmôt kan, êng nuĭh ƀư tih mpeh njrăng n’gang srê.

         N’gâng kan dak si đă ăp ntŭk kan mbơh ƀư, tĭng rjăp ăp trong njrăng n’gang srê Covid-19 tĭng ntĭm rđău bah gưl dơi mkra nău kan, ntĭm rđău bah UBND n’gor Công văn mrô 3743, nar 4/5/2021 bah UBND n’gor n’hanh ntĭm rđău bah N’gâng kan dak si mpeh njrăng n’gang srê Covid-19. Tĭng gưl kan, nău klan n’hanh nu nău nuĭh kan bah ngih pah kan, ntŭk kan ƀư tĭng tâm rgop đah rmôt kan, ntŭk kan, ƀon lan ndâk njêng trong nchrăp, mbơh ƀư ăp nkô̆ nău tŏng ăp trong kan dak si tâm nar ƀư săch nuĭh ntoh măt an Quốc hội khóa 15 n’hanh HĐND ăp gưl ta lam n’gor năm kan 2021-2026.

         Đah ăp ntŭk but uănh săm ji, N’gâng kan dak si đă ƀư tĭng tâm pă nuĭh kan pah kan tâm di đah nu nău nuĭh ji, tâm pă na nê̆ mông nar kan, tâm pă rmôt pah kan tâm pleh; ndâk ƀư trong rdâng tĭng ăp nu nău srê Covid-19, tâm nĕ geh trong nchrăp na nê̆ mpeh tâm pă mông nar kan, ăp rmôt tâm pleh pah kan, ndơ̆ nuĭh ji ngih dak si bah lơ, wơt dơn nuĭh ji, mât săm, uănh nđôi ntưp kaman, njrăng ntưp tâm ntŭk but uănh săm ji rnôk geh nu nău srê geh ta ntŭk.

         Ta năp nu nău jêr jŏt bah srê Covid-19, n’gâng kan ƀon lan nkuăl Cư M’gar, n’gor Dak Lak dôl n’hao ƀư tĭng rjăp ăp trong njrăng n’gang srê. Bah rnôk ta ntŭk geh du hê ntưp, geh nkô̆ nău srê plơ̆ sĭt bah Đà Nẵng, bôl uănh năl du tơ̆ an saơ mô ntưp, yơn geh ntưp hôm e jêr uănh, Ban ntĭm rđau njrăng n’gang srê Covid-19 nkuăl Cư M’gar lĕ mbơh ƀư trong kan njrăng n’gang srê n’hao lơ du gưl. Nkre, uănh nđôi rjăp nău ƀư tĭng ăp trong njrăng n’gang srê ta ntŭk, ngăn lah ăp nkual ƀa ƀơ geh nău ƀư rgum âk nuĭh. Ta chợ nklang nkuăl têh Quảng Phú-Ntŭk tăch rgâl têh bah nkuăl Cư M’gar, Ban mât uănh chợ đă nuĭh ƀa ƀơ nkah nuĭh ƀon lan, rgŏ đă ntŭk tăch rgâl wăn bok put mbung tâm rnôk tăch rwăt, tâm rgâl đah nuĭh uănh nsong, năp rwăt ta chợ; ntrŭt đă nuĭh ƀon lan ƀư tĭng năp rwăt ngăch ăp ndơ dŏng khlay, mô rgum âk nuĭh nkoch bri kơt bah năp... Ăp trong mkra aơ dơi nuĭh ƀon lan, nuĭh tăch rgâl dŭt ŭch. Ăp ntŭk tăch rgâl ăp ntil ndơ mô khlay ta nkuăl rnôk aơ dôl ƀư tĭng rjăp trong njrăng n’gang srê... Lĕ rngôch 40 quán karaoke, bida lĕ ntĭl mpông, an rlu pah kan.

         Ta năp nu nău jêr jŏt bah srê, UBND n’gor Dak Lak lĕ an công văn đah nău mbơh ƀư ăp trong njrăng n’gang srê rnôk ta n’gor lĕ kơp dơn nuĭh ji Covid-19. Tĭng nĕ, n’gor Dak Lak ntĭm rđau Kruanh UBND gưl nkuăl, gưl xă mĭn tâm rgop đah ăp ntŭk kan geh tât ntĭm rđău kơt dŏng ăp trong gay njrăng n’gang srê ta lam n’gor bah n’gul măng nar 10/5/2021 an tât rnôk geh nău mbơh mhe.

Nuĭh răk rblang: Y Sưng Phê Ja