VOV4.M'nông- Lôch rlău 20 năm mbơh ƀư nău kơl an manh prăk đah nuĭh ach o n’hanh ăp nuĭh dơi kơl êng tĭng Nghị định 78 bâh Chính phủ, rnoh prăk an manh lĕ tât ta ăp tổ, bản, bâh nkual njônh ngai, nkual yôk prêh, ntop âk ta nău nsrôih kơl n’huch ach o, rdâk njêng nkual ƀon lan mhe n’hanh đăp mpăn nău rêh jêng ta Sơn La.

Lah rnăk ach jŏ năm bâh tiểu khu Hua Ít, nkuăl têh Ít Ong, nkuăl Mường La, n’gor Sơn La, nău geh ăp năm bâh rnăk vâl wa Lèo Văn Binh kanŭng kâp knơm ta mir mbo, mir dơm dơm. Năm 2015, geh cán bộ Ngân hàng chính sách xã hội nkuăl ndrel đah n’gâng kan tiểu khu rgŏ jă, wa Binh dăn manh 50 rkeh prăk bâh rnoh prăk an manh bâh ngân hàng chính sách xã hội nkuăl gay ma rvăt tay neh, rgâltơm tăm jêng tăm ăp ntil tơm an tâm di đah nău ueh neh yôk bri, nău duh phang ta ntŭk.

Cán bộ ngân hàng chính sách xã hội tât ăp ntŭk pă an ƀon lan manh prăk

Năm 2018, wa Binh geh manh tay 50 rkeh prăk, bâh ngân hàng chính sách xã hội gay ma rvăt tay tơm ntil, kon ntil sĭt tăm, mât rong gay ma hun hao wăng sa. Lôch âk năm, mir mbo, mir bum lĕ jêng nău wăng sa lĕ rngôch, pơk hvi rlău 1 ha đah 100 tơm nhãn ndop, 150 tơm bŭng ntô nđir, play rba Đài Loan, play đŭr Thái, ndrel đah nĕ lah 10 mblâm ndrôk, rpu n’hanh kik djăr mbơk lêng. Wa Lèo Văn Binh nkoch: lôch yan mhe nơh, nău kan wăng sa bâh rnăk vâl ntơm an geh sa, rlău 100 rkeh prăk lôch n’hâp lĕ prăk dŏng, ăp năm let năp tay, ăp ntil tơm hao jêng ueh, rnoh khlăy ăp ntil ndơ ueh mbra an nău geh klâp ma 250 rkeh prăk.

        “Rnăk vâl gâp geh manh bâh Ngân hàng chính sách rĭ rvăt ndrôk, rvăt neh gay ma tăm tơm sa play, bâh geh rnoh prăk nĕ rĭ aƀaơ rnăk vâl gâp geh mir tơm sa play đăp mpăn, ndrôk rpu hun hao, play tât di lêh rĭ geh ndeh bu rvăt tât ta mir rdeng dâl”.

Âk rnăk vâl lĕ manh prăk rvăt tơm ntil sĭt tăm hun hao ueh jêng.

        Geh tât 40 nuĭh pah kan mbro n’hanh 50 nuĭh pah kan tĭng yan, Công ty trách nhiệm hữu hạn một thành viên Hữu Hảo Tây Bắc ta bản Văn Minh, xã Mường Bú, nkuăl Mường La pah kan sŏk dŏng ndơ trôm neh, rnoh geh klâp ma 2.500-3 rbăn mét khối lŭ jêng ndơ dŏng/khay; nkre lah công ty lĕ geh ƀư rdâk njêng ăp nău kan kĩ thuật way dŏng n’hanh nchoăn rdeng drăp ndơ trong neh. Yor geh nău khuch tât bâh nuh srê Covid-19 jŏ jong tâm ba năp nơh, công ty geh mâp âk jêr jŏt, ngăn lah nău trok prăk khay an nuĭh pah kan.

        Wa Đỗ Xuân Hảo, Giám đốc công ty an gĭt, bâh rnoh prăk an manh, prăk kon mô geh sŏk bâh ngân hàng chính sách xã hội nkuăl, công ty lĕ tâm trok geh prăk khay, bâh nĕ njêng nău kan gay ma oh yuh tâm công ty đăp mpăn pah kan jan sa tâm rơh ntưp rêng nuh srê nơh.

       “Tâm rnôk geh nuh srê Covid ntưp rêng dŭt hô, oh nô nuĭh pah kan du đê̆ geh ntưp Covid-19 geh gŭ nkhah êng, năch mô an hăn nsong, drăp ndơ geh ƀư mô dơi tăch đŏng, jêng dŭt jêr ngăn, ta rnôk nĕ geh Ngân hàng chính sách xã hội nta nău nơih kơl an jêng lah ngăch kơl tâm rnôk jêr jŏt n’hanh trok geh du đê̆ prăk khay an oh nô pah kan”.

Nău pah kan wăng sa bâh wa Binh ntơm geh sa rlău 100 rkeh prăk.

        Wa Tạ Văn Toàn, groi giám đốc Ngân hàng chính sách xã hội n’gor Sơn La an gĭt: Đah trong kan “Gĭt vât nuih n’hâm ƀon lan- geh nsrôih pah kan”, tâm 20 năm ƀư tĭng Nghị định 78 bâh chính phủ, rnoh prăk an manh lĕ geh an tât lĕ rngôch ăp ƀon lan, tiểu khu, nđâp ma ta nkual njônh ngai, nkual dŭt jêr jŏt, lĕ kơl an rhiăng rbăn rnăk bah ach o, âk rnăk vâl nănh mĭn nănh kan, nănh manh prăk gay ma ntuh kơl rvăt năp ndơ dŏng, tơm ntil, kon rong rgâl nău kan hun hao wăng sa, mât đăp mpăn nău rêh an rnăk vâl, nta nău pah kan an nuĭh ƀon lan ta ntŭk n’hanh ntop mât đăp mpăn nău kan rnă njrăng nău rêh jêng ta ntŭk. Êng năm 2021 mhe nơh, rnoh geh an manh geh rlău 1.459 rmen prăk, nău geh sŏk rnon lah rlău 1.178 rmen prăk, lĕ rnoh rnon rlău 4.964 rmen prăk, geh dŭt âk nuĭh manh prăk dŏng prăk manh tâm di nkô̆ nău kan, geh săk rnglăy, ăp nuĭh kan lĕ geh ƀư tĭng ueh nău trok rnon, trok prăk kon tât di nar n’hanh prăk mpêt nkrem tĭng di nău ntrŭnh.

        “Đah bôk nău 20 năm mbơh ƀư, ntŭk kan ta n’gor Sơn La mbra geh uănh tĭng nău mpŏng hun hao wăng sa rêh jêng ta ăp nkual, ăp nkuăl, ăp thôn, ƀon, ntrôl dăng nău kan mbơh tơih mpeh an manh prăk, ngăn lah ăp bôk nău kan an manh prăk kơl nău rêh jêng mhe, ăp bôk nău kan tĭng nău nchŏng đă bâh chính phủ, rgum ta ăp nkual njônh ngai, nkual hôm nha geh âk nău jêr jŏt gay ma ƀon lan geh dŏng tay prăk tâm ban kơt lah ngăch ndăn doh rklaih ăp nău kŏ văk, jêr jŏt, ăp nău ntoh luh mbra dơi geh”.

        Bâh rlău 20 năm ƀư tĭng, Nghị định 78 bâh chính phủ ta Sơn La, nău pah kan an manh prăk bâh Ngân hàng chính sách xã hội lĕ n’hao săk rnglăy na nê̆, geh nău kan dŭt khlăy tâm nău jut jăng ach o n’hanh đăp mpăn nău rêh jêng, dêh bên ueh đah nuĭh ach o n’hanh ăp nuĭh dơi kơl êng.

Nuĭh rblang: Thị Đoắt