Kêng măng 12/1, ta xă Hòa Thắng, nkual ƀon têh Buôn Ma Thuột, Hội chữ Thập đỏ n’gor Dak Lak tâm rgop đah ntŭk kan ntop kơl ƀư an ndơ rơh Tết Nguyên đán Ất Tỵ n’hanh mbơh ntĭm, ntop kơl mât uănh săk soan sêk mbung an nuĭh ach o.

Ta bôk nău kan, mpôl rdâk ƀư lĕ an 50 nklâm ndơ tết (du nklâm ndơ khlay 300 rbăn prăk) an nuĭh ach o, nuĭh geh nău rêh dŭt jêr jŏt ta xă Hòa Thắng n’hanh ăp ntŭk kiău ma; mbơh ntĭm, nchih săk ntop kơl nuĭh ƀon lan geh nău mpeh sêk mbung gay ƀư but uănh, săm ji. Ăp nuĭh geh ăp nău ji mpeh sêk mbung mbra dơi ntop kơl ndơ̆ wơt tât  ntŭk nha khoa, dơi but uănh, mbơh ntĭm n’hanh mât uănh săk soan sêk mbung an dơm, ntop kơl prăk sa ôi, xăng ndeh tâm rơh but uănh bôk năp n’hanh kơl an bah 30-50% prăk ăp nău rhŏ săm ji ăp rơh bah kơi tay.