Đah nău nsrôih bah n’gor n’hanh nău ntop kơl bah ăp đơn vị, ăp nuĭh lŏng nuih n’hâm, nău jut jăng nhih jay truh sat, nkưp nde an ăp rnăk mâp jêr jŏt ta n’gor Lạng Sơn hŏ geh ăp nău dơi uĕh. Lvang năm 2024 -2025, n’gor hŏ rgum tơm prăk rlău 160 rmen prăk gay tĭng ƀư pah kan dja, kơl hang rbăn rnăk geh ntŭk gŭ mhe nâp uĕh, đăp mpăn.

Khay mih phŭt năm e nơh, ăp tơ̆ phŭt n’glaih têh ƀư jay nchep nchop bah rnăk wa Nguyễn Thị Dung (nkual Sơn Hà, thị trấn Na Dương, nkuâl Lộc Bình, n’gor Lạng Sơn) lơn ma nchep nchop. Lăp khay sial puh, sial nđik lăp tĭng trôm blŏng srŏ lam bêng njônh njănh tâm trôm jay jê̆. Bol hŏ nsrôih ntêm nkrem âk năm yơn wăng sa jêr jŏt, jêng nău wơl geh bah rnăk wa Dung mpeh du mblâm jay n’hŭt sial, nâp uĕh nklăp mô dơi jêng ngăn ngăn…Ndrĭ jêng, Tết dja dơi wơt năm mhe tâm jay hvi rlău 40 mét vuông geh mpêr nâp, chor jĭr, lăk uĕh ƀư wa Dung rhơn tât rgŏng măt bĭch âk măng:

 “Sai gâp ri geh tai biến ntơm bah năm 1991, gâp ri kop ji wăr năm, ƀăn ri tă bah kât mham rngok jêng hŏ roh 2 năm aơ, hôm du hê kon ndăm rvê joi sa an lĕ ma 5 nuĭh sa jêng nău rêh dŭt jêr jŏt. Ntơm bah rnôk geh trong nchrăp jut jăng nhih jay truh sat, Đảng, Chính phủ, Bộ Công an, ăp n’gâng kan, nsum mpôl, ăp nuĭh lŏng nuih n’hâm hŏ mât uănh kơl rnăk rdâk njêng dơi nhih jay têh hvi, srăch uĕh, rnăk gâp dŭt rhơn nđơr ngăn.”

 Đah nuih n’hâm “mô an du hê ndul êng bah kơi”, nkuâl Lộc Bình, n’gor Lạng Sơn dôl ntrôl ngăch rdâk njêng 292 mblâm jay nâp uĕh an ăp rnăk ach o, dăch kêng ach o, rnăk dơi kơl. Ăp mblâm jay geh rnoh prăk ƀư nklăp 110 rkeh prăk, tâm nê Bộ Công an ntop kơl 70 rkeh prăk. Wa Trịnh Tuấn Đông, Kruanh UBND nkuâl Lộc Bình, n’gor Lạng Sơn an gĭt ăp n’gor tâm nkuâl dôl tâm rlong đah mông nar gay ƀư lôch jêh nău tât ndơ̆ luh:

 “Nău an ƀư Đề án jut jăng nhih jay truh sat, nkưp nde lah trong nchrăp têh bah Đảng n’hanh Ngih dak, geh nkô̆ dŭt khlay, kơl an kônh wa lơn lah ăp rnăk ach o, rnăk dăch kêng ach o, rnăk dơi kơl dơi geh nău mât chăm bah ăp gưl. He ndrel nsum ti rgop suan gay jut jăng nhih jay truh sat, nkưp nde, nsĭt an kônh wa ăp mblâm jay tâm rnôk năm mhe dŭt n’hŭt răm. Tâm rnôk an ƀư mpôl hên hŏ rgŏ jă lĕ rngôch ăp rơh kơn ƀon lan ta ntŭk đah nuih n’hâm nuĭh ndơ geh rgop ndơ nê, gay mhâm ƀư rdâk njêng geh 292 mblâm jay kơl kônh wa wơt Tết Nguyên đán dŭt răm mƀak.”

Kơp tât nar 17/12/2024, Ủy ban MTTQ Việt Nam n’gor Lạng Sơn hŏ dơn geh rlău 77 rmen prăk, tâm nê hŏ tâm pă (manh tâm rlak) prăk an ăp nkuâl mon jay mhe an ăp rnăk jêr jŏt đah lĕ rngôch prăk dŏng ƀư bơi 51 rmen prăk. Lĕ rngôch rnoh rnăk dơi ntop kơl jay gŭ lah rlău 2.400 rnăk, rnoh ngăch ƀư geh tât rlău 80%. Wa Hồ Tiến Thiệu, Kruanh UBND n’gor Lạng Sơn lah rjăp n’gor nsrôih jut jăng lĕ rngôch bơi 2.500 mblâm jay nkưp nde, truh sat an ăp rnăk ach o, dăch kêng ach o, nuĭh geh n’hâm suan nău rêh jêr jŏt... bah năp khay 4/2025:

“Mpôl hên hŏ rgum lĕ gay nsrôih jut jăng nhih jay nkưp nde, truh sat tâm năm 2024-2025, hŏ rgum ăp tơm ndơ rgop bah ăp mpôl đah lĕ rngôch rnoh prăk geh nklăp 160 rmen prăk. Aƀaơ nău kan dôl an ƀư uĕh, di trong rƀŏng, nău mĭn rđău đă bah Thủ tướng lah njêng luh trong leo kan nsum an lam rêh jêng kon nuĭh, gay ăp nuĭh ndrel nsum ti rgop mô dơn êng 1 mpôl nê nơh, trong leo ƀư hŏ geh suan ring tam têh, njêng dơi nău nsing nơm, rhơn nđơr an nuĭh ƀon lan. Aơ lah nău kan dŭt n’hâm geh nkô̆ khlay, mpơl nău mât uănh khlay bah Đảng n’hanh Ngih dak tât ƀon  lan, lơn lah ăp rnăk jêr jŏt. Ăp rnăk I mô hŏ geh jay têh hvi tât Tết Ất Tỵ dja mbra geh jay mhe, aơ lah ndơ ƀư an nuih n’hâm rhơn nđơr n’hanh lah nău răm âk đah ăp rnăk ta n’gor.”

Khay năm mhe dôl tât, ăp mblâm jay “Tâm rnglăp" dơi rdâk ƀư mô dơn nsĭt tay nău rŏng kon nuĭh jru, mpơl nuih n’hâm tâm yô̆ tâm kơl bah nsum mpôl ma hôm lah tơm ndơ an nđơr nuih n’hâm, ntop tay suan ntrôl gay kônh wa ta n’gor mpeh yôk yang Lạng Sơn đăp mpăn pah kan jan sa, đăp mpăn nău rêh, nsan hao klaih rlău ach  o./.