Kruanh Quốc hội Trần Thanh Mẫn mbơh kloh: Aơ lah rơh bôk năp tâm năm 2025, geh tâm nau khuh răm bah lam Đảng, năm mhe ndrel ƀư nau kan rhơn Tết năm mhe Ất Tỵ, nkah 95 năm Nar ndâk Đảng Cộng sản Việt Nam. Nkre lah, Quốc hội ndrel HĐND ăp gưl ƀư nau kan di nkah 79 năm Nar săch kan bôk năp bah Quốc hội Việt Nam. Lah rjăp nau kan tâm năm 2025 lah dŭt âk, Kruanh Quốc hội mbơh, tâm 3 khay bôk năp rgum ƀư rơh rƀŭn ndal tal 9:

            ‘Phung he ân rgum, nsŭn n’hâm ân rơh rƀŭn ndal tâm dŭt khay 2. Rơh rƀŭn aơ Quốc hội mra rƀŭn mô kâp nar ma kơp mhâm ƀư ân jêh nchră ăp luật, nau ntrŭnh bah Quốc hội kơl an nau rƀŭn lôch nau ntrŭnh mrô 18 mpeh nau ƀư rtŭt gleh, nau kan ân săk tâm rơh tât”.

            Uỷ ban Rnâng kan Quốc hội uănh nau mbơh nau kan bah kơl an ƀon lan bah Quốc hội khay 12 năm 2024. Kruanh ban Dân nguyện Dương Thanh Bình mbơh: Cử tri ndrel ƀon lan tâm ban lŏ rđau ƀư nau ntrŭnh mrô 18 mpeh nau rgum ƀư rtŭt gleh ntŭk kan chính trị. Cử tri ndrel ƀon lan ŭch ơm geh trong kan bah ăp ntŭk kan Đảng, Ngih dak, ăp ntŭk kan tă bah Trung ương tât nkuăl ân gleh, ueh mhe, pah kan săk tam.

            Uỷ ban Rnâng kan Quốc hội mbơh nau nchrăp nau ntrŭnh n’hêl nau ƀư mâp cử tri bah ntoh măt Quốc hội ndrel HĐND. Âk nau rgop bah ăp nŭih tâm Rnâng kan Quốc hội hôm rvê mpeh rnâng kan Uỷ ban MTTQ Việt Nam gưl xã ƀư rƀŭn mâp cử tri. Kruanh Uỷ ban pháp luật Hoàng Thanh Tùng mbơh kloh:

            ‘Rnâng kan Uỷ ban MTTQ Việt Nam gưl xã mô di lah ntŭk kŏ dơi geh pah kan săk tam ndrel tâm ban, ngăn lah tâm ăp nkuăl jru, nkual ngai, nkuăl hôm âk nau jêr. Ri ma nau ntrŭnh ƀư ntŭk kan bah rơh rƀŭn mâp cử tri tâm gưl xã ma jao tâm nau ntrŭnh ân Rnâng kan Uỷ ban MTTQ Việt Nam gưl xã mro lah ntŭk kan ƀư tơm, tâm rgop ma MTTQ gưl nkuăl ndrel ăp ntŭk kan, ƀư mâp cử tri ri geh du đê̆ nŭih mô đăp mpăn nau đă, khuch tât nau tâm mâp vah cử tri”.

            Tâm rơh rƀŭn, 100% nŭih kan Uỷ ban Rnâng kan hŏ nchră nau ntrŭnh n’hêl tâm nau ƀư mâp cử tri bah ntoh măt Quốc hội ndrel ntoh măt HĐND. Nau ntrŭnh mpeh nau dơi ndrel nau kan bah ăp ntŭk kan, ntŭk ƀư tâm rnôk mâp cử tri; Nau kan, nau ƀư, nkô̆ nau mâp cử tri; rgum nau đă bah cử tri; ngăn lah nau ntrŭnh nau kan bah ntŭk kan, rmôt kan, ntŭk rklaih nau bah cử tri, mbơh nau tă geh bah nau ntrŭnh đă bah cử tri ndrel mêt uănh nau kan rklaih đă bah cử tri.

            Ăp nŭih kan bah Uỷ ban Rnâng kan Quốc hội kŏ mbơh ăp nau nkol ân geh ăp ntŭk kan geh nau rklaih tam tâm rơh tât kơt ndoh ndơ hao khlay; nau kol trong hăn, nau tăch rgâl, nchuăn rdeng, mât prăp dŏng pháo tih dôih...Groi Kruanh Quốc hội Nguyễn Đức Hải đă ân ngăch leo nau ntrŭnh Luật neh ntu 2024 lăp tâm nau rêh:

            ‘Phung he dôl ntrŭnh ƀư Luật neh ntu lăp ngăn tâm nau rêh ƀon lan rhơn ngăn. Yơn nau kan lah geh tât nau ntrơn rgâl rnoh tăch; geh tât nau kơp dơn nau dơi dŏng neh bah nkuăl...rnôk aơ hôm kol âk ngăn hồ sơ. Nơm ân ntrŭt dăng nau kan pă săm ƀŭt kơp dơn nau dơi dŏng neh, nau aơ ân geh nau rgum tâm rgop bah ăp gưl. Tâm nau ƀư du luật mhe, nau kan mhe geh dŏng ndrel ƀon lan dôl kâp rnơm”.

            Uỷ ban Rnâng kan Quốc hội đă Chính phủ rđau ăp ntŭk kan, n’gâng kan geh tât, n’gâng kan ăp nkuăl ân uănh rjăp lơn nau kan nchrăp ndoh ndơ kơl an rơh Tết năm mhe; N’gâng kan gung trong nchuăn rdeng n’hao nau kan mêt uănh nau ƀư kơp rnoh nkhôm ncho ndeh, lir mbơh rnoh nchuăn rdeng. N’gâng kan Công an mêt uănh, n’huch nau khuch prah tâm tom ndeh, ngăn lah rnôk ăp nau kan nchuăn rdeng năch, ndoh ndơ mra hao âk gay ma năn kơl an tâm rnôk Tết năm mhe./.