VOV4.M’nông: Narr 11/1 mhe rlău, ta Hà Nội, Uỷ ban Dân tộc lĕ ƀư Rƀŭn nchră n’glôch jêh ƀư tĭng Nghị quyết mrô 45/QĐ-TTg bah Thủ tướng Chính phủ mpeh nău “An du đêt sam ƀŭt báo, tạp chí an nkual rnoi mpôl đêt n’hanh nkual yôk, nkual dŭt jêr jŏt” lvang 2019-2021 n’hanh mbơh ƀư nău kan ăp năm tay. Ta rƀŭn nchră, ăp nuĭh ntoh măt dăn đă năm tât an n’hao tay ăp ntil trong nkoch mbơh tâm di nău mhe kơt ntuh nău ngơi, an ndơ kỹ thuật gay ƀon lan gĭt đah ăp nkô̆ nău tâm mạng internet.

          Jêh 3 năm mbơh ƀư lĕ geh bơi 34 rkeh ndrôm sam ƀŭt báo bah 19 ntil báo n’hanh tạp chí an dơm tât ăp xă, thôn, ƀon an rlău 424 rbăn nuĭh lah ƀon lan rnoi mpôl đêt n’hanh nuĭh ƀon lan nkual yôk, nkual jêr jŏt bah 54 n’gor ta lam dak.

          Ăp ndrôm sam ƀŭt báo chí rgop nkoch trêng nău ntrŭnh, nău kơl pháp luật bah Đảng n’hanh Ngih dak lah nsum n’hanh trong kan rnoi mpôl đêt, nău kơl rnoi mpôl đêt lah êng rgop ƀư tĭng bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt, nkual yôk lvang 2021-2030; ntop tay nău rêh văn hóa, nuih n’hâm an ƀon lan rnoi mpôl đêt, n’hao nău wât rhŏ an nkra njêng, nău rêh bah nuĭh ƀon lan; nkre nkoch trĕ rêng jru hvi nău uĕh văn hóa bah ƀon lan ăp rnoi mpôl đêt.

          Ta rƀŭn nchră, ăp nuĭh ntoh măt râng Rƀŭn nchră uănh lah prêh ăp săk rnglăy ƀư tĭng Nău ntrŭnh mrô 45/QĐ-TTg lvang 2019-2021 an nkual rnoi mpôl đêt n’hanh nkual yôk. Ntoh măt Ban dân tộc ăp n’gor dăn đă âk trong mkra gay ƀư tĭng uĕh nău kan tâm lvang 2022-2025 kơt n’hao tay ăp ntil nkoch trêng tâm di nău mhe kơt ntuh ngơi, pă an ndơ kỹ thuật gay ƀon lan gĭt đah ăp nkô̆ nău mhe tâm mạng internet. Wa Lê Ngọc Vinh-Kruanh Ban Dân tộc n’gor Dak Lak dăn đă:

          “Ntuh kơl prăk kaih gay ndâk njêng, năp lĕ rngôch ăp ntŭk pơk nău ngơi, tivi gưl xă. Aơ lah trong mbơh khlay, ngăn ngên n’hanh săk rnglăy ngăn tâm nău nkoch trêng nău ntrŭnh, trong hăn bah Đảng, nău kơl pháp luật bah Ngih dak, nu nău mhe chính trị n’hanh mbơh rblang nău wât nău rêh blău ơm nkra njêng, mât ndrăy văn hóa, nău uĕh rnoi mpôl đêt”.

          Ăp nuĭh ntoh măt dăn đă âk trong mkra gay ƀư tĭng nău kan uĕh lơn tâm lvang 2022-2025 kơt: n’hao ƀư tơm bah Ban Dân tộc ăp ntŭk; rgâl mhe trong mbơh nu nău (n’hao tay báo rup, rgâl nkô̆ nău tâm ăp mạng xã hội, ntuh kơl tâm ban trong ntuh nău ngơi, pă an ndoh ndơ di động thông minh...); rgŏ jă nuĭh ƀon lan dơi bên răk; ngăch nkra rgâl n’hanh pơk hvi nuĭh dơi kơl; n’hao uĕh, n’hao tay nkô̆ nău, bôk nău kơt: ơh rblang pháp luật, nău uĕh lăng ơm; ndâk njêng trong gay boăt nthoi, tâm pă, tâm rgâl nu nău mhe...

          Ntoh ngơi n’glôn jêh rƀŭn nchră, Kruanh chủ nhiệm Ủy ban Dân tộc Hầu A Lềnh mĭn lah: Nău ntrŭnh an du đêt ndrôm sam ƀŭt báo, tạp chí mô sŏk prăk an nkual rnoi mpôl đêt n’hanh nkual yôk lah nău ntrŭnh, nău kơl di bah Đảng n’hanh ngih dak. Năm tât mbra pă tay ăp ndrôm sam ƀŭt báo tạp chí n’hanh ăp sam ƀŭt báo êng an nkual rnoi mpôl đêt n’hanh nkual yôk. Yor ăp ntil trong mbơh nkoch aơ mô knŭng kơl n’hao nău wsât, rgâl nău ƀư, nău way ơm nkra njêng ma hôm lah trong nkoch ngăn gay ƀư nău rgâl nkra, ntop tay, rgâl nkra jêh nău kơl đah ƀon lan rnoi mpôl đêt. Kruanh n’gâng kan Hầu A Lềnh nkoch kloh.

 “Rlău 3 năm ƀư tĭng n’hanh nsrôih dŭt n’hâm bah he lvang 5 năm bah aƀaơ tât năm 2015, lĕ geh nău ntrŭnh, he lĕ ƀư n’gul gâl rƀŭn nchră, uănh lah tay, tât aơ tay geh trong gay ƀư tĭng hôm, nău he ƀư m’hâm dơm. Gay m’hâm ƀư lĕ rngôch ăp ngih pah kan báo chí, ăp ngih pah kan tâm ôp tâm nchră bah ăp n’gâng kan, nău kan ndrel tâm nchră an ăp n’gâng kan tâm rgop đah Ủy ban dân tộc ƀư uĕh lơn”.

Gay ăp nău mbơh, nău ntrŭnh, nău kơl... dơi nkoch uĕh lơn tât đah ƀon lan rnoi mpôl đêt n’hanh nkoch yôk, tĭng chủ nhiệm Ủy ban Dân tộc Hầu A Lềnh, an n’hao uĕh, rgâl mhe trong ƀư, nkô̆ nău bah ăp ndrôm sam ƀŭt báo chí tĭng trong tâm di dăch dêh đah nău ngăn nău ŭch bah ƀon lan ăp rnoi mpôl.

Trong hăn hun hao nsum, lam hvi bah ăp ntil báo chí ta âk trong, báo nchih hôm e lah têh ngăn đah nkual rnoi mpôl đêt, yor nê, an mât rjăp nău dăng bah báo nchih tâm rnôk nkoch trêng tât nuĭh ƀon lan. Bah meng nĕ, Chủ nhiêm Ủy ban Dân tộc đă ăp n’gâng kan nău kan, ƀon lan geh tât an nsrôih tâm rgop gay ƀư tĭng nău ntrŭnh, rgop n’hao lơn tay săk rnglăy ƀư tĭng nău ntrŭnh 45/QĐ-TTg nar 9/1/2019 bah Thủ tướng chính phủ.

Lam ntŭk rƀŭn nchră

Kruanh n’gâng kan Chủ nhiêm Ủy ban Dân tộc Hầu A Lềnh ntoh ngơi ta rƀŭn nchră.

                    Nuĭh rblang: Y Sưng Phê Ja