VOV4.M’nông: Nau kan 42 nŭih ƀon lan Việt Nam nchuăt du krap luh bah Casino tâm nkuăl n’har bri Campuchia-Việt Nam ndrel êp aơ nau leo tăch ntŭng nŭih tih dôih hăn dak ba dih êp aơ geh âk nŭih uănh njrăng. Tâm rơh rƀŭn vay ăp khay bah N’gâng kan nchră nau geh tâm dŭt pơh rlau aơ, nŭih ntoh ngơi N’gâng kan nchră nau Việt Nam Lê Thị Thu Hằng lah rjăp, ăp n’gâng kan ndrel ăp n’gor ân njrăng rjăp, n’hao nau gĭt mĭn bah ƀon lan đah nau kan hăn kan tât dak ba dih, tâm nê geh Campuchia.

            Bah năp nau kan nar lơn geh âk nŭih Việt Nam geh leo tăch hăn pah kan tih dôih tâm Campuchia ndrel geh nau jêr tâm rnôk pah kan, Nŭih ntoh ngơi N’gâng kan nchră nau Lê Thị Thu Hằng mbơh:

            ‘Aơ lah nau kan ma phung hên dŭt n’hâm uănh njrăng. N’gâng kan nchră nau, ăp ntŭk kan ntoh măt Việt Nam tâm Campuchia tâm rgop rjăp ngăn đah ăp N’gâng kan, ntŭk kan tâm dak, ngăn lah ăp nkuăl tâm êp nkuăl n’har bri đah Campuchia ndrel tâm rgop nsum đah ntŭk kan n’gâng kan tâm ntŭk gay ma ndơn nau, uănh năl, ntrŭnh âk nau kan kơl an ân nŭih hăn kan ndrel năn kơl an ăp nŭih hăn kan dôl mâp nau jêr, nau khuch. Mhe rlau, ăp ntŭk kan n’gâng kan hŏ kơl an ndrel leo nsĭt Việt Nam nklăp rlau 500 nŭih tât dak nơm đăp mpăn, kơl an săm ƀŭt ƀư kan ân ma rbăn nŭih êng đŏng”.

            Tâm 6 khay bôk năm aơ, N’gâng kan Công an hŏ lơh rklaih âk ntŭk, nhŭp âk nŭih leo nŭih hăn kan tih dôih tâm Campuchia ndrel mbơh nkah ân nŭih ƀon lan geh tât nau kan aơ. Tĭng nŭih ntoh ngơi N’gâng kan nchră nau, rnôk ăp nŭih hăn pah kan bah Việt Nam hăn Campuchia, âk nŭih mâp nau jêr tâm rnôk pah kan. Yơn tâm rnôk ntrŭnh ƀư nau kan kơl an nŭih hăn kan, ăp ntŭk kan ntoh măt Việt Nam kŏ mâp du đê̆ nau kol. Wa Lê Thị Thu Hằng mbơh:

            ‘Ê lor, nê lah nau kan kơl an rklaih luh ân geh nau tâm rgop kơl an rjăp bah ntŭk kan n’gâng kan tâm ntŭk. Âk nŭih hăn pah kan mô geh săm ƀŭt săk nơm, mô geh săm ƀŭt luh hăn kan yor lah rlet trong luh n’har tih dôih ri ma roh âk mông nar gay ma uănh năl moh săk kŏ kơt lah lơh jêng nau jêr jŏt tâm rnôk jao, ndơn nau jao. Ăp ntŭk kan ntoh măt Việt Nam tâm Campuchia hŏ nsôih ngăn gay ma nchrăp ƀư ăp nau pah kan, tâm mâp ndrel vay tâm mâp mbơh nau đah mpeh Campuchia gay ma rklaih nau kan aơ”.

            Wa Lê Thị Thu Hằng kŏ lah rjăp, tâm rơh tât, N’gâng kan nchră nau ndrel ăp ntŭk kan ntoh măt Việt Nam tâm Campuchia mra tâm rgop gay ma ntrŭnh ƀư đah ăp ntŭk kan, ăp nkuăl tâm dak ndrel mpeh Campuchia gay ma ntrŭnh ƀư ăp nau kan kŏ kơt lah n’hao nau tâm rgop, tâm kơl an nŭih tâm Campuchia, leo sĭt dak ăp nŭih geh bu rlăm hăn kan tih dôih, đăp mpăn nau dơi, nau geh tâm di pháp luật bah nŭih kan Việt Nam. Ăp nkuăl kŏ n’hao nau kan mêt uănh, nkah mbơh nŭih ƀon lan tâm nkuăl rnôk hăn kan.

            Tâm rơh rƀŭn mbơh, djăt ăp nau kan mpeh âk jêt nŭih Việt Nam rlet trong dak, nchưat du luh bah casino tâm nkuăl n’har bri Campuchia, nŭih ntoh ngơi Lê Thị Thu Hằng mbơh, ntŭk kan bah Việt Nam ta Campuchia hŏ pah kan đah ăp ntŭk kan n’gâng kan tâm ntŭk, đă ơm uănh, ƀư kloh nkô̆ nau ndrel nau kan bah ăp ding tâm nau kan tă geh tih. Rnôk aơ n’hâm soan bah ăp nŭih dĭt dak nơm hŏ geh đăp mpăn ndrel nau geh xét nghiệm ân saơ mô geh tă dŏng ma tuý./.

Nŭih rblang: H’Thi