Tâm nău rgop tâm nchră bah N’gâng kan Công an, Công an nkuăl Ea H’leo dơi jao rnoh an ƀư  ndâk nkra 86 jay tâm rnglăp. Tĭng thượng tá Phùng Minh Trí-Kruanh Công an nkuăl Ea H’Leo rnôk dơn ntĭm rđău gưl bah lơ, khay 3/2024, ntŭk kan lĕ nchrăp tâm ôp tâm ncjrăp an UBND nkuăl Ea H’leo ndâk njêng Ban ntĭm rđău ƀư tĭng nău rgop an tâm nchră; tâm rgop đah ăp jrô, ban geh tât, UBND ăp xă, nkuăl têh uănh nđôi săch tay nuĭh dơi geh. Ntơm lăp ndâk ƀư, công an nkuăl tâm pă rmôt, ngăn lah đoàn viên druh ndăm bah ntŭk kan jŭr ntop kơl nar luh ndâk ƀư jay an kônh wa... Đah ăp nău nsrôih lĕ rngôch, knŭng jêh 2 khay, nkuăl Ea H’leo lĕ lôch jêh ndâk ƀư 86 mlâm jay, jao an ăp rnăk, rlău ngăch 4 khay. Thượng tá Phùng Minh Trí lah:

Jêh rnôk bơi 2 khay mbơh ƀư, jay tal 86 (jêng lah jay n’glêh dŭt tâm bôk nău rgop tâm nchră ta nkuăl) lĕ dơi jêh. Aơ ngăn ngên lah nău ƀư geh  nkô̆, ngăn ngên n’hanh uĕh lăng, đăp mpăn nău rêh jêng ta lam nkuăl, kơl an kônh wa geh ntŭk gŭ ân đăp mpăn nău rêh jêng, đăp mpăn pah kan jan sa.

Ta Nkuăl Cư Kuin nău ƀư tĭng nău rgop an tâm nchră ndâk ƀư jay tâm rnglăp lĕ geh ngăch bôl mô đêt jêrr jŏt. Tĭng Thượng tá Nguyễn Cao Quyết-Kruanh Công an nkuăl, âk rnăk mpeh tâm nuĭh dơi dơn, yơn neh gay ndâk ƀư jay lŏ mô geh nkhah êng, mô hŏ rgâl nău ŭch dŏng neh, mô geh sam ƀŭt kơp dơn dŏng neh. Du đêt rnăk mô djôt mât sam ƀŭt kơp dơn rnăk ach o, êp ach o. Ndrel đah nĕ lah nău ăp ntuk kan ntop kơl mô njuăl prăk di ngăch. Gay mkra ăp jêr jŏt, wăk kol, công an nkuăl tâm rgop đah ăp jrô kan, ban way kan; UBND ăp xă, ntrŭt ƀư ăp sam ƀŭt ntop kơl kônh wa; rgŏ jă ăp doanh nghiệp ta ntŭk “manh” ndoh ndơ gay ndâk ƀư. Đah nău ntop kơl dŭt n’hâm bah ăp rmôt kan geh tât, ăp jêr jŏt wăk kol ngăch dơi dôh rklaih. Thượng tá Nguyễn Cao Quyết an gĭt:

Rlău ma tơm prăk bah N’gâng kan công an n’hanh n’gor kơl, Công an nkuăl kuăl jă rgŏ jă tay ăp tơm prăk ntop kơl bah ăp nuĭh lŏng bôk tôr gay ntop kơl nuĭh ƀon lan. Nuĭh kan ri rgŏ jă ăp rmôt, công an ăp xă râng ndâk ƀư jay an kônh wa. Rnoh an ƀư ndâk nkra jay lah nâp nâl, uĕh jêng, dŏng săk rnglăy.

Dak Lak lah n’gor nkual yôk geh nklăp 2 rkeh nuĭh, rnoh rnăk ach o nklăp 8%. Rgop jŭt jăng ngih rông mpông sat, N’gâng kan Công an mbơh ƀư bôk nău rgop an tâm nchră ndâk ƀư 1.200 jay tâm kơl jao an ăp rnăch ach o, jêr jŏt, ƀon lan rnoi mpôl đêt, rnăk dơi kơl ta Dak Lak n’hanh công an n’gor ƀĭt joet ƀư tơm. Đah nuih n’hâm lĕ đah nău kan ndrel nsôih bah công an Dak Lak n’hanh n’gâng kan ƀon lan, 1.200 mlâm jay lĕ dơi ƀư jêh tâm dŭt khay 7/2024, rlău nău ngăch n’gluh an 3 khay, djôt tay nău răm an ăp rnăk dơi geh. Nô Y Thon Niê (nuĭh Êđê) ta ƀon Ma Sút, xă Krông Jing, nkuăl M’Đrắk nkoch nău răm rnôk lăp gŭ jay mhe:

Jay si ôm sat têh 20 m2, mih ri truh, duh ri nsuk m’hul. Dơi N’gâng kan Công an an jay rnăk wâl răm rhơn ngăn, aƀaơ mô hôm rvê mih duh. Ur sai oh kon đăp mpăn gŭ rêh, nsrôih hăn pah kan sreh keo sok prăk mât ăp kon hăn nti. Lah uĕh N’gâng kan Công an n’hanh ăp gưl nău kan.

Tĭng Đại tướng Lương Tam Quangn Kruanh N’gâng kan Công an, 1.200 mlâm jay an rnăk jêr jŏt ta Dak Lak dơi ndâk ƀư rlet rlău ngăch an saơ nuih n’hâm ndăn, lĕ đah nău kan bah rmôt công an, ăp gưl nău kan ƀon lan ta Dak Lak; nău hăn ndrel bah âk doanh nghiệp ƀư tĭng nău kan đăp mpăn rêh jêng. Kruanh N’gâng kan Công an lah rjăp, N’gâng kan Công an mbra leo ntrong hăn bôk năp ƀư tĭng bôk nău kan “Lam dak ndrel ty jŭt jăng ngih rông mpông sat ta lam dak”, gay mô an geh nuĭh ntlơi bah kơi.

Ƀư tĭng tay ntĭm rđău bah đồng chí Tổng Bí thư Tô Lâm, N’gâng kan Công an mbra ntrong leo lor bôk năp ƀư ting ntrong leo tâm rlong: “Lam dak ndrel ty jŭt jăng ngih rông mpông sat ta lam dak”. Bah aƀaơ tât năm 2025, rgop ngăn ngên tâm nău rƀŏng 153.000 ngih rông mpông sat ta lam dak, ngăn lah ta ăp ntŭk nkual jru ngai, ta ăp ntŭk mô nâp đăp mpăn rnă njrăng, tâm nĕ geh nkual Tây Nguyên.