Tâm nar mâp cử tri ta xã Đưng K’nớ, Nkuăl Lạc Dương, n’gor Lâm Đồng, cử tri đă Ngih dak ân ƀư jêh trong Trường Sơn Đông, tỉnh lộ 722 rlet tâm nkuăl gay ma ntrŭt dăng nau nthoi trong, ntuh kơl ngih vâl gung trong, ngăn lah điện 3 pha gay kơl an tuch tăm ndrel nau rêh, ntrŭt dăng hun hao văng sa rêh jêng...Cử tri ta aơ uănh ngăn tât nau mât njrăng bri ndrel kơl an tă bah bri gay n’hao nau geh, nau rêh. Cử tri nkoch, nau trok prăk mât bri geh ntrŭnh bah âk năm, yơn lah tâm xã mô geh thuỷ điện ri ma rnoh prăk ƀon lan geh sa bah nau aơ dêh rđil ntŭk êng. Cử tri ƀon Niêng, tâm thôn 1, xã Đưng K’Nơ, đă, Ngih dak ân uănh gay geh tâm ban lơn tâm nau trok prăk mât bri, geh ndri mơ ƀon lan mât njrăng bri nâp, đăp mpăn nau rêh:

          ‘Nau trok kơl mât njrăng bri ri xã hên geh nau kơl an dêh rđil xã êng, mô geh tâm ban. Tâm rnôk nê, âk ƀon lan ta aơ nsing tâm nau mât njrăng bri ri ma mâp âk nau jêr. Phung hên ŭch ân geh rgâl nau geh trôk prăk mât njrăng bri”.

          Ntoh nau tâm nar mâp, wa Phan Đình Trạc, uỷ viên Bộ chính trị, Bí thư Trung ương Đảng, Kruanh Ban nội chính Trung ương na lah, nau đă bah cử tri lah tâm di. Rmôt kan Quốc hội n’gor Lâm Đồng mra đă ăp ntŭk kan, rmôt kan uănh, rklaih, nkre mĭn tay ăp nau kan gay ma mât nau dơi nâp nâl ân ƀon lan nsing tâm bri:

          ‘Ntŭk geh mât bri ueh ma mô geh thuỷ điện, nau mât njrăng tâm nê thuk lơn ri kônh wa mra kăl bri, lơh khuch lơn mô lah n’hao prăk ân nau mât njrăng bri ân bah oi nau roh hoach bri? Nau aơ nơm ân geh uănh ngăn gay geh nau dơi lah nau mât ntŭk ntu bri. Ngăn lah, ân geh nau ntĭm mhâm ƀư joi saơ aơ ăp tơm dak si khlay tăm tâm nâm bri, gay kônh wa nkre mât bri, nkre tăm, geh dơi tăch dak si nê gay n’hao nau rêh. Gâp ân lah knŭng nau nê mơ dơi mât bri ndrel n’hao nau geh ân ƀon lan”.

          Tâm rnôk mâp cử tri tâm xã Ka Đơn, nkuăl Đơn Dương, cử tri ntoh nau tâm ban nuih n’hâm, rnơm ndrel rnê nau dơi ƀư nau kan rdâng sa khâm, ngăn lah nsôih ƀư nau nâp ntrong kan bah Đảng, Ngih dak. Nkre lah, cử tri đă rmôt kan Quốc hội n’gor Lâm Đồng nau kan hôm ntoh tâm rnôk ƀư Luật neh ntu, Luật tâm boh nau kan, nau ân manh, jao tăch, mbơh rnoh neh đah ăp ntŭk. Cử tri lŏ đă ân kơl an, n’hao nau nkra trong hăn tâm lŏ mir, ntung hăn, ƀư nơih nau kan, pơk trong ân nau ƀư jut ngih truh sat, kơl an prăk manh ƀư tuch tăm...Nau ngăn lah, cử tri mbơh hôm geh nau cán bộ ƀư nau kan mô ueh, ƀư ntoch jong, jêr, săm ƀŭt kơp dơn dŏng neh hôm geh nau nkol, ƀư ƀon lan hăn ro âk tŏ.

          Tĭng wa Phan Đình Trạc, Uỷ viên Bộ chính trị, Bí thư Trung ương Đảng, Kruanh Ban Nội chính Trung ương, aơ lah nau ngăn, khuch tât nau kan tuch tăm ndrel nau rêh bah ƀon lan, ân geh ăp ntŭk, ăp gưl rklaih. Tâm nê, nau mbơh ƀư nkol tâm nau kan hành chính, ƀư kol kan ƀon lan, ân geh ƀư kloh ndrel rklaih nâp:

          ‘Săm ƀŭt du mpông ri mplŏ sĭt mplŏ hăn âk tŏ, jêh nê ƀư mbơh lĕ nau geh bah săm ƀŭt bah ƀon lan njoăl, mô geh nau mbơh ân nŭih nơm njoalư săm ƀŭt ma mbơh bah trong nŭih hăn joi rvăt, ndranh. Nau nê ƀư nkoch tât nau blau, nau kan ma ƀon lan, mô lah bah kơi nê geh nau mô ueh đŏng? Rnôk aơ, Tổng bí thư Tô Lâm âk tŏ lah rjăp, ndrel nơm ân geh nsôih ƀư du nau kan ân rjăp mpeh ntŭk kan bah ntrong kan bah lam dak, ƀư n’huch lơi, n’hao nau nâp blau bah cán bộ, công chức, ma nơm ân kơt aơ lah mô dơi, mô tŏng nau đă dơi kan hôm. Gâp đă nơm ân ƀư kloh nau aơ, lah geh nau mô ueh ri nơm ân geh rklaih tât dŭt tât lôch ndrel mbơh tay ân kônh wa ƀon lan ta aơ”./.