Rlău 14 năm an tĭng ƀư, trong nkhôm prăk săm mât njrăng bri hŏ tĭng kơn nsĭt tay tơm geh wăng sa đăp mpăn n’hanh jŏ jong an rlău jât rbăn rnăk ta n’gor Lâm Đồng, lơn âk lah ăp rnăk rnoi mpôl đê̆. Geh dŏng sa ngăn ngăn bah bri jêng nău gĭt êng n’hanh nău dơn kan tâm pah kan mât njrăng bri bah ƀon lan  ta aơ nar lơn ma dơi n’hao prêh, mât njrăng geh nău tam tơm bri mpêt khlay bah n’gor.

Mô kơp mih mô lah nar, wa Cil Jũ Ha Giảng, nuĭh K’ho, ta thôn Liêng Bông, xã Đạ Nhim, nkuâl Lạc Dương, n’gor Lâm Đồng way đăp mpăn pah kan hăn rsong uănh, mât njrăng bri dơi Ngih dak jao an mât njrăng. Păng an gĭt ăp năm mhe aơ, rnoh prăk dơn geh bah săm  mât njrăng bri nar lơn ma dơi n’hao âk, nsĭt tay tơm geh  wăng sa  đăp mpăn an rnăk wâl ri  pah kan  mât njrăng bri dơi uănh lah nău kan tơm bah kônh wa tâm thôn.

“Kônh wa he dŭt gĭt wât mpeh bri, geh nău gĭt êng he lah nuĭh dơn mât njrăng bri jêng hăn rsong uănh bri ăp nar, tĭng jăp di. Mpeh wăng sa ri ăp nar, ăp khay lah he rêh dơi, prăk dơn mât ri đăp mpăn tŏng an dŏng sa tâm rnăk wâl, mô geh pah pât, tŏng sa, nău rêh đăp mpăn. Geh tơm wăng sa ri kônh wa dŭt rhơn nđơr jêng nău mât chăm n’hanh mât njrăng bri dŭt jăp”.

Aƀaơ ta n’gor Lâm Đồng, ăp ha bri dơn mât njrăng dơi Ngih dak nkhôm dŭt đêt lah 445.000 prăk/năm, dŭt âk lah 2.723.000 prăk/năm uănh tĭng nkual. Wa Bon Dảng Ha Ya Bình, ta thôn Đa Cháy, xã Đạ Nhim, nkuâl Lạc Dương, n’gor Lâm Đồng an gĭt, rĭng ăp rnăk ƀon lan dơi dơn mât njrăng 25ha bri, đah rnoh nkhôm dja, âk rnăk nuĭh rnoi mpôl đê̆ klaih rlău ach o, hŏ nsan hao rgâl geh nău rêh.  

“Mir ba mô geh, gâp aƀaơ rêh nơm geh tâm bri dơm. Ntơm nơh prăk dŭt đêt nklăp 60 rbăn prăk dơm, aƀaơ ri nsĭt geh bah 40 tât 50 rkeh prăk lah rhơn ngăn hôm, dŭt rhơn ngăn. Yor kơt nê̆, săk gâp nơm dŭt nsrôih gay mhâm ƀư nkrêp đah bri, đah oh nô tâm Ban lâm nghiệp gay mât bri an uĕh lơn, nsĭt geh wăng sa đăp mpăn lơn, gay ƀư jăp nău kan bah he hŏ dơi Ngih dak jao”.

Rlău ma ăp doanh nghiệp geh trong nchrăp dơi jao n’hanh manh bri, n’gor Lâm Đồng aƀaơ geh 28 đơn vị tơm bri ngih dak, 3 ƀon lan, 4 mpôl kan, bơi 1.500 rnăk dơi jao neh, jao bri. Ndrel đah nê, geh nklăp 13.000 rnăk dơn mât njrăng bri n’hanh geh dŏng trong kơl bah prăk nkhôm săm mât njrăng bri, lơn âk lah rnăk ƀon lan rnoi mpôl đê̆. Tĭng wa Đinh Hữu Đạo, Groi kruanh Ban mât njrăng bri tu dak nching sial Đa Nhim, nău dŏng trong nkhôm prăk săm mât njrăng bri hŏ njêng luh ăp tơm prăk nâp jŏ n’hanh n’hao dăng nău dơn kan bah kônh wa nuĭh rnoi mpôl đê̆ ta ntŭk đah pah kan mât njrăng bri n’hanh hun hao bri jŏ jong. Tâm ăp năm aơ, bri tu dak nching sial Đa Nhim hŏ mô an geh ŭnh sa bri hô. Rnoh lơh n’hang bri n’hanh rnoh bri geh rŭn in hŭch âk đŏng.

“Nsing ta trong jao mât klŭp tĭng bôk nău kan nkhôm prăk săm mât njrăng bri ăp năm mhe aơ hŏ njêng nău geh đăp mpăn nău rêh ăp nar an nuĭh ƀon lan. Nsĭt geh wăng sa dơi n’hao prêh ri nuĭh ƀon lan geh nuih n’hâm dâk đăt êng tâm nău tâm boh ăp rmôt, gay râng rsong hăn mât njrăng bri kơp lĕ ma măng. Rnôk saơ geh lơh n’hang bri, rŭn in neh bri ri mbơh an ăp ntŭk kâp njrăng tâm dâng gay lăp rmal ngăch. Tâm khay wai năm 2023-2024 ta n’har bri mpôl hên mô geh nău ŭnh sa bri lơh khuch tât bri, nê lah nơm geh dơn mât njrăng bri hŏ ngăch saơ ŭnh sa n’hanh rgum jă êng nuĭh puh n’hât ŭnh năn ngăch”.

Lâm Đồng geh rnoh hvi neh bri krŏng nklăp 538 rbăn ha, rnoh âk nkŭm n’hâm bri geh rlău 54%. Tâm rnoh dja, hŏ geh bơi 400 rbăn ha bri dơi nkhôm prăk săm mât njrăng bri, âk 75% rnoh hvi neh geh bri tâm lam n’gor. Nău dơn mât njrăng bri n’hanh dơi geh dŏng sa na  nê̆ bah trong kơl nkhôm prăk săm mât njrăng bri mô dơn njêng geh tơm wăng sa đăp mpăn an nuĭh ƀon lan gŭ rêh dăch kêng bri, ma hôm rgop khlay tâm nău mât njrăng bri mpêt khlay tĭng trong rƀŏng nâp jong an n’gor.