VOV4.M’nông: Phạm Văn Lương, deh năm 1978, gŭ tâm ƀon Mùi 1, xã Cư Né, nkuăl Krông Búk, n’gor Dak Lak tă 2 tŏ geh nau tih ndrel geh ngih phat dôih mhal 7 năm 6 khay gŭ ndrung. Jêh rnôk lôch năm, rnơm nau nsôih bah săk nơm ndrel nau bonh đă, kơl an bah rnăk vâl ndrel ƀon lan, Phạm Văn Lương hŏ nsôih pah kan jan sa ndrel jêng nŭih tơm ntŭk trah nkra si, đah tơm prăk rlau du rmen. Geh dơi nau aơ, nô mra kơl an ăp nŭih geh ndrel nau rêh gay tâm rnglăp tay nau rêh.

Phung hên tât khâl ntŭk trah si bah nô Phạm văn Lương tâm xã Cư Né, nkuăl Krông Búk, n’gor Dak Lak, rnôk nô ndrel ma rlau 10 nŭih dôl ma trah si ndrel nkra nsưng. Jă phung hên lăp tâm ngih bar dăp êp nê gay ma ngêt dak ndrle nkoch bri. Nô nkoch, ƀon nô tâm n’gor Thanh Hoá, rnôk păng 10 năm tĭng rnăk vâl hăn tâm Dak Lak pah kan. Rnôk nê geh me mbŏ ân hăn nti, yơn lah yor tĭng băl pâl ri ma rlu nti. Jêh âk năm gŭ pâl dơm, păng săch nti nau trah si. Nau kan aơ leo păng geh mâp du đê̆ nŭih tih, vay hăn ntŭng kăl si ndrel jêh nê geh bu krŭng. Yor geh nau gŭ ndrung ueh, păng geh sĭt lor 4 khay. Sĭt tâm nkuăl, đah nau prêng nơm lah nŭih tă gŭ ndrung, ndrel ma nau jă bah phung tih dôih ri păng lŏ geh nau tih nsum đŏng, đah nau tih nchăn nŭih rvăt ndơ tuch tăm ndrel jêh nê lŏ geh bu nhŭp krŭng.

Plŏ tâm ndrung krŭng, rnơm geh nau ntĭm ntui bah cán bộ mât nau kan, nô mĭn ân geh nsôih kơt djăt ăp nau đă tâm ndrung gay jêh aơ rnôk geh luh bah ndrung mra nsôih ƀư ueh tay nau rêh. Lôch năm gŭ ndrung, rnơm nau kơl an bah rnăk vâl, nô rvăt ndơ gay ma ƀư kan, jêh ri hăn trah si ân ma bu. Rnôk geh nau rnơm bah nŭih rvăt dŏng, nô manh prăk rvăt máy móc pơk hvi nau kan bah nơm. Tât rnôk aơ, ntŭk pah kan bah nô geh rnoh prăk ntuh kơl rlau du rmen, bơi tât 10 nŭih kan, đah rnoh prăk khay ntơm 7-12 rkeh/nŭih. Nô Phạm Văn Lương, nkoch:

‘Gâp jêh lôch năm gŭ krŭng ri ŭch mbơh ntĭm bah ăp băl mom, nsrŭng lơi ăp nau kan bư tih, nau kan mô ueh. Ăp nŭih tă geh nau tih kơt aơ rnôk jêh lôch năm gŭ ndrung hăn sĭt tâm nkuăl ri ân nsôih, sâm ndâk ƀư tay nau rêh nơm tă bah ntơm, yor mô geh nau la ôh”.

Phạm Văn Lương dŭt gĭt ngăn nau rêh bah ăp nŭih tă ƀư tih sĭt tâm rnăk vâl jêh lôch năm gŭ ndrung mra mpa âk nau jêr tâm nau tâm rnglăp tay nau rêh. Ndri ma, nô mro nsôih kơl an ăp nŭih geh nau tih kơt nơm. Tâm ntŭk kan bah păng, rnôk nê geh 6 nŭih lah tă mâp gŭ ndrung sĭt. Nô Trương Văn Dương, deh năm 1997, gŭ tâm xã Cư Kpô, nkuăl Krông Búk, lah ngoai tâm âk nŭih kŏ geh gŭ 2 năm tâm ndrung mpeh nau tih dŏng tih dôih ăp chất ma tuý nkoch: Jêh rnôk sĭt tâm nkuăl, săk jăn hôm prêng ngăn yor tă luh ndrung. Mô blau nau kan, ri knŭng krŭng săk tâm ngih. Rnôk nê, nô Lương tât bonh, đă tât ntŭk păng nti kan. rnơm geh nau pă kan pah bah nô Lương, ri păng hŏ dơi joi saơ trong hăn ân săk nơm. Tât rnôk aơ, nô hŏ geh pah kan bơi tât 2 năm, prăk khlay rlau 10 rkeh:

‘Rnôk gâp tă luh bah ndrung ri geh mâp nô Lương, păng bonh đă gap ndrel ma ntĭm mbơh ri dĭng gâp gĭt. Nô lah mô geh nau kan ri tât ntŭk nô gay nti kan, mô dơi klach rvê ôh. Nô kơl an, kơl âk ngăn, gâp pah kan ueh mô hôm plŏ nau tih tay ôh. Mô knŭng bonh gâp ôh, nô kŏ lah đah ăp nô êng êng ân geh nau nsôih tâm nau kan kŏ kơt lah nau rêh, gay jêh aơ mra dơi geh sŏk ur ndrel ma geh rnăk vâl”.

Lam nkuăl Krông Búk geh nklăp 500 nŭih tih luật jêh lôch geh bu krŭng sĭt tâm nkuăl rêh. Trung tá Y Phía Mlô, Groi Kruanh rmôt Thi hành án Hình sự ndrel kơl an tư pháp Công an nkuăl Krông Búk mbơh: Rnơm ƀư ueh nau kan nkoch trêng, bonh đă ndrel kơl an nau kan, ri ma rnoh nŭih tih dôih tâm nkuăl knŭng hôm tâm dâng 0,8%. Âk nŭih tih ndơn saơ jêh rnôk lôch gŭ ndrung sĭt tâm nkuăl nơm ri geh nau rêh nsôih joi lă kan. Tâm nê, Phạm Văn Lương lah nŭih ueh gay ma ăp nŭih tă tih êng êng sĭt tâm nkuăl jêh lôch gŭ ndrung kơt tĭng. Trung tá Y Phía Mlô nkoch:

‘Rnôk aơ tâm nkuăl Krông Buk geh nŭih ntoh lư ƀư nau kan ueh jêh rnôk lôch năm gŭ ndrung sĭt nkuăl lah Phạm Văn Lương. Lương mro nsôih rlet rlau bah nau prêng bah săk nơm, nsôih pah kan jan sa, êng nê ri hôm kơl an âk nŭih tă luh gŭ ndrung gay geh nau kan. Rnơm ri, nau geh ƀư tih tay bah nŭih gŭ ndrung tâm nkuăl Krông Búk mro dêh ngăn”.

Trong plŏ sĭt mra lah trong geh nau jêr, nau rlong, ngăn lah đah ăp nŭih tă tih trong geh gŭ ndrung sĭt bah nkuăl. Đah nau kơl an, bonh đă bah rmôt công an, n’gâng kan bah nkuăl, rnăk vâl ndrel ƀon lan, nau nsôih êng bah săk nơm hŏ kơl an nô Lương, nô Dương mô lah ăp nŭih êng tâm nkuăl Krông Búk rlet bah nau prêng bah nơm, têh jă gay ma plŏ ƀư nau rêh ân ueh, jêng nŭih geh nau dơi tâm nau rêh jêng./.

Nŭih rblang: H’Thi