VOV4.M’nông: Bôk nau kan “Kon rong tahen Biên phòng” geh Đảng uỷ, N’gâng kan tahen Biên phòng ntrŭnh ƀư tâm ăp năm rlau aơ, hŏ ndơn geh bơi tât 3000 tơ̆ kon se, đah rnoh kơl an ăp mon lah 500 rbăn/khay tât lôch nti jrâu 12. Nau nê ntoh nau ŭch rŏng ngăn bah tahen Biên phòng đah kon se geh nau rêh jêr jŏt tâm nkuăl n’har bri.

            Mon Y Phú Mlô (rnoi Bunong) tâm ƀon Ndrang Phốk, xã Krông Na, nkuăl Buôn Đôn, n’gor Dak Lak rêh kon đơi tă bah ndul me, mbơ̆ păng lơi êng. U păng hŏ leo nsĭt păng gay ma rong. Yor u che păng n’hâm soan mô hôm dăng, ri ma nau mẩt rong sau mâp nau jêr. Bah năp nau rêh mô ueh bah Y Phú, rđau kan Tahen Biên phòng Srê-pốk, tâm N’Gâng kan rđau kan tahen n’gor Dak Lak hŏ leo mon sĭt rong. Trung tá Đỗ Văn Nhương-Groi Kruanh rđau kan rmôt bonh đă ƀon lan đồn biên phòng Srê-pốk, ngơi:

            ‘Rnôk mhe tât ri păng mô dăng ôh, jêh rnôk mât chăm ân tât rnôk aơ, păng hao têh, săk têh lŏ n’hâm soan ngăch dăng, lay oi, nuih n’hâm păng mô hôm geh nau prêng kơt ntơm nơh ôh. Oh nô phung hên nsôih tâm pă mông nar gay ma mât chăm, răk rong, ntĭm mbơh păng tĭng ăp nau ngơi, ri phung hên dŏng nau ŭch rŏng ndrel nuih n’hâm bah nơm gay răk rong mon ân jêng nŭih ueh. Uănh păng kơt lah kon sau tâm ngih nơm, ŭch jêh aơ têh ndăm ri mra geh nau kơl tâm nau rêh”.

            Y Phú Mlô nkoch: Ntơm bah nar sĭt gŭ nsum ma tahen, păng geh sông hơm, geh nti săm ƀŭt ndrel ăp nau ueh lăng êng. Ăp nar, jêh hăn nti, păng geh pâl, ntĭm nti săk jăn n’hâm soan ndrel tahen. Lah mô gĭt nau âi ntĭm ri sĭt ta nê “ăp nŭih bơ̆ grat ndrih” lŏ ntĭm tay. Hăn nti ri ăp kônh rdeng tât mpông ngih săm ƀŭt jêh ri lŏ vơt sĭt tâm ntŭk tahen. Gŭ ma tahen biên phòng, mon geh nau rêh hơm răm, ueh lăng:

            ‘Mĕ gâp khĭt hôm, u che ri ach o ngăn, mô geh piăng ân gâp sông. Rnôk gâp hăn gŭ ta aơ ma kônh tahen biên phòng, ăp kônh ân gâp sông hơm, geh pâl m’ak, geh ăp kônh nti nchih săm ƀŭt. Năm ba kơi gâp nti jrâu 1, gâp mra nti ân ueh gay ma ân u che, ăp kônh tahen rhơn”.

            Mhe rlau aơ, Trung ương Đoàn Druh ndăm cộng sản Hồ Chí Minh tâm rgop nsum đah N’gâng kan rđau tahen mâp ăp kon se ntoh lư tâm bôk nau kan “Kon rong tahen biên phòng”. Rhơn geh rnag nau aơ, oh Seo Thị Hoa, kon rong tahen Biên phòng n’gor Nghệ An nkoch: Rnăk hên geh 4 oh nô gŭ ma u. Năm 2014, Hoa geh nau ŭch rlu nti gay ma gŭ tâm ngih kơl rong oh, yơn lah ăp tahen Biên phòng ndơn mât rong kơl păng hăn nti ndrle nti ueh lơn:

            ‘Ăp kônh vay tât ngih gfâp gay nti ân gâp, ndrel bonh đă gâp nsôih hăn nti ueh gay jêh aơ tă geh dơi rgâl nau rêh nơm. Gâp nsôih nti, rơh rlau aơ 4 năm gâp lah kon se nti blau ăp ntil, ndrel 3 năm gâp geh dơi kon se nti nkuăl mon Văn ndrel môn Tiếng anh”.

            Đại tá Đỗ Quang Thấm-Groi chính uỷ tahen Biên phòng n’gor Dak Lak mbơh, ăp năm rlau aơ, bôk nau kan “Kon rong tahen Biên phòng” hŏ kơl an ăp kon se mpeh nau ntĭm nti, rgop nau kơl an ân kon se geh hăn nti. Rơh tât, Tahen Biên phòng, n’gor Dak Lak mra lŏ uănh, pơk hvi bôk nau kan “Kon rong biên phòng” tâm lam n’gor:

            ‘Ăp năm ba kơi ri ntoh tă bah nau kan bah tahen biên phòng, nau rêh mâp jêr bah nkuăl n’har bri kŏ kơt lah nau ueh bah bôk nau kan, ri phung hên lŏ ntrŭt dăng nau ƀư ân ueh lơn tay nau kan aơ. Tahen Biên phòng Dak Lak lŏ tâm rgop nsum đah gưl kan tâm nkuăl, ƀư nau kơp uănh, nchih moh săk ăp mon geh nau rêh jêr jŏt gay ma ndơn geh kơl an, kơl ăp kon se gay geh hăn nti, ntĭm nti ƀư jêng ăp nŭih ueh tâm nau rêh”.

            Nau kan “Kon rong Đồn biên phòng” yor Ngâng kan tahen Biên phòng rgŏ jă gay kơl an ăp kon se gơi nti geh nau rêh jêr jŏt, rêh kon đơi, mô geh ntŭk nsing rnơm, oh kon rnăk vâl mâp nau jêr tâm nkuăl n’har bri, bah nê pơk trong ân ăp oh geh hăn nti, hun hao ăp ntil, jêh aơ jêng nŭih geh nau dơi ân rnăk vâl ndrel nau rêh. Bah nau kan aơ, rgop nau ƀư ueh lơn nau tâm rnglăp đah tahen ndrel ƀon lan tâm nkuăl n’har bri, ndâk njêng nau dơi neh dak lam ƀon lan ân nâp nâl./.

Nŭih rblang: H’Thi