VOV4.M’nông- Pơh ba năp nơh, kruanh Quốc hội Vương Đình Huệ n’hanh âk mpôl đại biểu Quốc hội ta ăp ntŭk lĕ tâm mâp ƀon lan ta năp rơhr ƀŭn nchră tal 4, Quốc hội khóa 15 nchrăp ƀư ta nar 20/10 atay. Ta ăp rơh tâm mâp, ƀon lan ăp ntŭk lĕ nkoch, dăn đă âk nău khlăy, ŭch geh QH mât uănh doh rklaih.

Mpôl Đại biểu Quốc hội n’gor Dak Nông lĕ geh ƀư tĭng ăp rơh tâm mâp ƀon lan ta ăp xã Nâm N’Jang, nkuăl Dak Song, xã Quảng Tâm nkuăl Tuy Đức, xã  Quảng Phú nkuăl Krông Nô n’hanh xã Quảng Sơn nkuăl Dak Glong, djăt nău tâm rgop mpeh bôk nău kan rơh rƀŭn nchră tal 4 Quốc hội khóa 15 nchrăp geh ƀư tâm khay 10 tay, mbra geh uănh n’hêl âk nkô̆ nău, nău nchrăp  luật, tâm nĕ geh ăp Luật geh tât nău rêh bâh nuĭh ƀon lan. Nĕ lah ăp nău nchrăp Luật ƀon lan ƀư tơm ta ntŭk, Luật neh ntu rgâl mhe, Luật mât nuĭh dŏng ndơ, Luật hợp tác xã.

Ƀon lan Dak Nông dăn đă mpeh âk nău ntoh lư ta ntŭk, dŭt âk lah ăp nău mô dơi, nău hôm nha kŏ văk tâm trong neh ntu, mât bri, mbrơi tâm nău kan doh rklaih săm ƀŭt hành chính ta ntŭk kan ba dâng. Ƀon lan lĕ dăn đă Quốc hội an geh ăp nău kơl đah ăp trong kan dak si, ntĭm nti, nău ntuh kơl ndơ dŏng ntung trong, điện dŏng tâm ăp nkual jêr jŏt...Ngăn lah tâm trong kan tuch tăm, ƀon lan dăn đă nău mpŏng kan kơl an ƀon lan bah nău “Geh âk ndơ yơn tăch mô khlăy”, “sreh- tă”", tăm -sreh”. ƀon lan Lê Quang Phi, ta xã Nâm N’jang, nkuăl Dak Song, ntŭk geh tăm âk tiu ta n’gor Dak Nông nkoch.

“Năm 2018 tơm tiu mô hôm khlăy n’hanh khĭt lĕ rngôch rĭ bâh nĕ tât aƀaơ ƀon lan hên lĕ rgâl jêng tăm du đê̆ ntil tơm tăm, dŭt âk lah ăp tơm sa play. Rĭ n’gor Dak Nông lĕ geh ndơ̆ mbơh âk trong kan gay ma tăm, ngăn lah tơm bơ, tât aƀaơ rĭ bơ dŭt âk ma mô geh nuĭh rvăt, aƀaơ rgâl jêng tăm âk lĕ rngôch. Gâp ŭch mhâm ƀư gay ma geh trong mpŏng kan gay ma n’gor Dak Nông geh rdâk njêng nău ntơ mpeh ntil tơm sa play nĕ an ntoh lư geh rnoh wăng sa âk. N’hanh ăư năm dăch aơ mpôl hên geh djăt âk nău mbơh mpeh rdâk njêng ăp ngih máy nkret ƀư ndơ bum mbo, ndơ tuch tăm, yơn nău ngăn ta ntŭk ê hŏ geh du ngih máy nkret ƀư êng”.

Kruanh Quốc hội Vương Đình Huệ tâm mâp ƀon lan ta nkuăl ƀon têh Hải Phòng

Tâm pơh ba năp nơh đŏng, Kruanh Quốc hội Vương Đình Huệ n’hanh mpôl đại biểu QH nkuăl ƀon têh Hải Phòng lĕ tâm mâp ƀon lan ta nkuăl Thủy Nguyên, nkuăl ƀon têh Hải Phòng ta năp rơh rƀŭn nchră tal 4, QH khóa 15. Ta rơh tâm mâp, ăp ƀon lan bâh nkuăl Thủy Nguyên, nkuăl ƀon têh Hải Phòng mpơl nău knơm, rhơn ta năp nău dơi hun hao bâh neh dak, ta nău leo kan bâh Đảng, Quốc hội, chính phủ ta năp ăp nău jêr jŏt yor nuh srê Covid-19 yơn lĕ leo kan, ntĭm leo ngih dak geh ăp nău dơi na nê̆. QH lĕ geh ăp nău ntrŭnh ngăch ndăn, tâm di gay ma doh rklaih ăp nău jêr jŏt bâh nuĭh ƀon lan n’hanh doanh nghiệp.

Ƀon lan lĕ mbơh na nê̆ ăp nău ntoh lư aƀaơ kơt lah: nău rdâk njêng ăp luật, an geh rgum, tâm ban gay ma mât đăp mpăn n’huch ăp nău kan hành chính, dơh ƀư, dơh nơih an ƀon lan n’hanh doanh nghiệp, nău rgâl nkra Luật uănh săm ji, Luật Thanh tra rgâl nkra, nău kan njrăng rdâng ŭnh sa, nău nai nti rlu kan, mô tŏng nai nti, nchih sƀ giáo khoa, rgâl rnoh prăk khay, prăk kơl an đah công chức, viên chức.

Ơh nău ôp bâh ƀon lan mpeh trong kan dak si, tâm nĕ dăn đă Quốc hội an geh nău uănh năl mpeh rnoh dak si, mât đăp mpăn tŏng dak si uănh săm ji. Yor aƀaơ, nuĭh uănh săm ji bâh bảo hiểm mô geh dak si, rvăt dak si bah dih, dŭt hoach prăk, ngăn lah đah nuĭh ach o, kruanh Quốc hội Vương Đình Huệ an gĭt, Chính phủ dôl ntĭm đă leo kan trĭng trong an geh mât đăp mpăn rnoh pă an, nău ueh n’hanh rnoh khlăy.

“Quốc hội lĕ pă an Chính phủ geh trong kan ngăch ndăn gay ma doh rklaih ăp nău kŏ văk gay ma mbơh dơn nău kan rvăt năp dak si, năp ndơ dŏng tâm n’gâng kan dak si. Lĕ geh mbơh nău kan rvăt năp dak si ta n’gâng kan dak si. Aƀaơ dôl geh nsrôih tay, Chính phủ, Quốc hội lĕ ntĭm đă n’gâng kan, ntŭk kan dak si uănh nđôi tay ăp nău ntrŭnh bâh n’gâng kan dak si, ngăch geh nău kan kloh rjăp, na nê̆ tâm nău mât uănh rnoh khlăy dak si.

Ƀon lan lĕ geh nkoch mbơh nău mô tŏng nai nti, mô tâm ban mpeh nău kan, mât uănh rnoh khlăy sămƀŭt giáo khoa hôm nha geh âk nău mô dơi, dăn đă ndơ̆ sƀ giáo khoa phổ thông lah du ntil ndơ bâh ngih dak mbơh rnoh khlăy, der geh nău ăp doanh nghiệp, nhà xuất bản mbơh êng rnoh khlăy kơt aƀaơ. Ơh nău ôp aơ, kruanh QH lah na nê̆.

“Tâm năm tât tay, rnâng kan Quốc hội mbra geh uănh nđôi du bôk nău kan dŭt khlăy, nĕ lah nău rgâl mhe bôk nău kan n’hanh săm ƀŭt giáo khoa, tâm nĕ geh nkô̆ nău tơm lah nău biên tập, xuất bản, in ấn, pă dŏng n’hanh an dŏng sƀ giáo khoa. Jêng gay ma ăp ngih nti rvăt ndơ̆ an lăp dŏng ta thư viện dŏng âk năm, dŏng an năm ba kơi. Uănh tay nău kan in ấn mhâm ƀư. Nău kan tâm ntŭk rêh jêng mhâm ƀư? tât tay mbra geh ƀư dŭt na nê”.

Ndrel đah nău kan rdâk njêng pháp luật, ƀon lan lam dak dôl knơm ăp nău ntoh lư mbra geh ăp đại biểu QH ndơ̆ mbơh tâm nchră n’hanh doh rklaih tơm khlăy, gĭt vât na nê̆ ta rơh rƀŭn nchră tal 4, QH khóa 15 tât tay.

                                                VOV Tây Nguyên/Nuĭh rblang: Thị Đoắt