Bri geh lơh n’hang, rŭn in neh ta Dak Lak hôm krit hô tay tâm nău mô hôm blău lơh bah nuĭh tơm bri. Ntĭt kơt ta Công ty lâm nghiệp Buôn Ja Wầm, nkuâl Cư M’gar, bri dôl geh lơh n’hang hô, geh ma nău roh hang rbăn ha.

Tiểu khu 547A, n’har neh Công ty lâm nghiệp Buôn Ja Wầm (ta nkuâl Cư M’gar, n’gor Dak Lak) ăp khay mhe aơ bri geh lơh n’hang mbro. Ta nkual ngai đah Trạm mât njrăng bri mbrô 1 mô hŏ tât 100m, bah meng trong jâng, nklăp 1ha bri mhe geh chôt kăt, tơm si hôm chôt rdăp n’hang. Wăr nê, âk tơm geh koh n’gul khĭt kro, tơm ri nhop huănh, khĭt mbrơi. Wa Trần Hồng Minh, nuĭh kan Trạm mât njrăng bri mbrô 1 an gĭt, ăp nuĭh lơh n’hang bri dŭt janh mô jêng klach ngăn. Mô kơp dăch mô lah ngai, djăt ma hôm bri lah hôm hăn lơh. Rnôk ban saơ, nking nchăng ri khân păng plơng lơh tay, mô dơn nê jă tay băl tât ntêt nkri, lơh. Săk wa Minh nơm tâm bôk khay 6 mhe aơ geh âk nuĭh tât nkri lơh ân tât lăp nhih dak si đŏng:

         “Nuĭh ƀon lan khân păng ntrơn du gŭ lam ntŭk tâm bri, khân păng rŭn in lêng lang jêng he dŭt jêr jŏt. Aƀaơ dŭt krit jêr ngăn, săk gâp nơm mhe aơ hăn kan ri khân păng ji nuih khân păng rdôl lăp tât trạm aơ khân păng lơh tât bĭch nhih dak si, dŭt jăch ngăn”.

         Ndrel đah Tiểu khu 547A, âk tiểu khu êng bah Công ty lâm nghiệp Buôn Ja Wầm bri dôl geh lơh n’hang. Nău mô phit klach mpơl kloh ta ăp neh bri geh lơh n’hang gŭ dŭt dăch kêng ăp trạm mât  njrăng bri, gŭ bah meng ăp trong me way geh nuĭh rsong hăn. Ta ăp neh bri geh lơh n’hang hăch dăch, ăp tơm tăm glêh nar kơt tuh, mbo hŏ dơi srih tăm rlŭ kơt trong mpôl lơh ntŭng bri kơp neh. Wa Nguyễn Công Thắng, Kruanh Trạm mât njrăng bri mbrô 3 srat r’iu nău mô blău lơh ta năp nău lơh n’hang bri, rŭn in neh bri. Nău  kan ơm  jâk r’ah, klach rvê yơn nău geh wăng sa mô đăp mpăn. Hŏ 5 khay aơ, oh nô ta trạm geh rnoh prăk khay. Rnoh nuĭh rlu nău kan nar lơn ma âk, mpet jâk nău kan nar lơn ma têh:

“Nuĭh ƀon lan dah rŏng ntrơn du khân păng lăp ri khân păng lơh âk tâm rnôk mpôl kan bah he đêt, dŭt jêr an oh nô. Oh nô hăn kan ri nuĭh đêt, nuĭh ƀon lan bu gŭ rêh nklang bri ri geh rnôk he mô dơi mât njrăng. Prăk khay ri oh nô geh nuĭh 3 rkeh, nuĭh 5 rkeh prăk, ƀư ri lĕ ma nar lễ, nar pơh ntŭk geh rlu. Prăk khay ri aƀaơ công ty dôl hôm rnon 5 khay. Geh du đêt nuĭh khân păng rlu hôm, nău rêh oh nô mô hŏ dơi đăp mpăn.”

         Wa Nguyễn Tất Văn, Giám đốc Công ty lâm nghiệp Buôn Ja Wầm an gĭt, kơp tât bôk khay 9, ta neh bri đơn vị geh 303 tơ̆ lơh n’hang bri đah rnoh hvi rlău 96ha. Tâm nê, 99% rnoh tơ̆ mô gĭt năl tơm nuĭh lơh. Tâm rnoh 8.800ha đơn vị mât njrăng, hôm nklăp 3.000ha geh bri dơm, yơn dôl tĭng nar hŭch hêng:

“Lơh n’hang bri, rŭn in neh ta bri công ty mât njrăng bôk năm tât aƀaơ dŭt krit âk, ăp rơh hao mbro. I ngăn bri ta Buôn Ja Wầm aƀaơ lơn âk lah bri kro ntang n’hanh bri tâm rlŭ pih rêp jêng nău lơh bri mô kâp jŏ âk mông nar yơn rnoh huach neh dŭt hvi yor tơm si srang n’hanh jê̆”.

         Wa Trương Văn Dự, Hạt trưởng Hạt kiểm lâm nkuâl Cư M’Gar, n’gor Dak  Lak an gĭt, pah kan mât njrăng bri ta Công ty lâm nghiệp Buôn Ja Wầm dôl roh đăp mpăn. Đah 9 cán bộ, nuĭh kan way kan, mpôl kan bah công ty dja mô đăp mpăn gay mât 8.800ha bri n’hanh neh bri. Ăp rnôk duh hô, hạt ân tât kơl bah 7- 8 cán bộ lăp ndrel mât njrăng bri Buôn Ja Wầm, yơn bah ir du nar khay dơm, rnôk mpôl kiểm lâm rhuăt luh sĭt ri bri geh lơh n’hang tay. Aƀaơ Công ty lâm nghiệp Buôn Ja Wầm hŏ dăp rgum jêng công ty 2 nuĭh kan, geh nuĭh bah dih râng yơn mô hŏ an saơ nău tam:

         “Gâp ŭanh năl nău dơi mât njrăng bah công ty aƀaơ lah rbăn lhơ, mô tŏng nău dơi gay mât njrăng bri. Aƀaơ công ty tâm ôp lah sơch lăp nuĭh kan mât, njrăng bri yơn đah nău ngăn geh prăk khay dôl hôm rnon kơt aơ ri mô geh nuĭh nănh lăp ta aơ kan. Mpôl hên dăn đă Sở Nông nghiệp dăn đah n’gor, bri lah tă bah n’gor jao jêng geh nău dăn đah đơn vị tơm bri tâm pă tơm prăk kan, mpôl kan tŏng dăng gay tĭng ƀư nău dơn kan rsong hăn n’hanh nking nchăng nău lơh n’hang bri.”

          Âk năm aơ bri ta Công ty lâm nghiệp Buôn Ja Wầm geh lơh n’hang mbro, neh bri jêng blâm bánh sa bah mpôl ntŭng lơh bri. Rlău 5.800ha tâm lĕ rngôch rnoh 8.800ha hŏ mô hôm bri, nklăp 3.000ha hôm ƀa ƀă geh bri yơn hŏ dŭt srang lĕ. Đah nău ngăn geh lơh hăch ƀăch ƀoch, mpôl ntŭng lơh si mô jêng djăt n’hanh ntul rlong pháp luật kơt aƀaơ, bri ta Buôn Ja Wầm geh ma nău roh lĕ hêng./.