VOV4.M’nông: Du nau kan geh âk cử tri uănh khlay tâm pơh rlau aơ, nê lah nau kan bôk năp geh Uỷ ban Rnâng kan rgop nau tâm nau nchrăp Luật neh ntu (rgâl nkra). Aơ lah du nau nchrăp Luật têh, geh nau khlay ngăn, ngăn lah geh tât nau dơi âk ding bah nau rêh văng sa, rêh jêng bah neh dak. Tâm nar rƀŭn, Uỷ ban Rnâng kan Quốc hội đă ƀư kloh nau kan sŏk lơi neh gay ma hun hao văng sa, rêh jêng yor nau geh nsum bah neh dak, nsum mpôl. Nkre đă uănh nau kan geh tât tơm prăk neh nti, ngăn lah njrăng rdâng nau mô tâm di, ƀư khuch tât nau kan ndâk jêng luật.

Nau kan rgâl nkra Luật neh ntu tâm bôk nau ƀư nau kan, nau ntrŭnh mpeh luật neh ntu, rklaih nau tâm rkăng, nau tâm rkeh tâm ăp nau kan, pháp luật geh tât neh ntu. Đăp mpăn tâm ban nau dơi ndrel nau geh jêng bah Ngih dak, nŭih dŏng neh ndrel nŭih ntuh kơl. Kloh rjăp, tâm di đah ntŭk ƀư nau kan tăch rgâl neh. Nkre ƀư ueh nau dơi ƀon lan ƀư tơm, n’huch nau phong lah mpeh neh ntu.

Tâm rơh rƀŭn, Kruanh Uỷ ban tư pháp Lê Thị Nga đă ƀư kloh ăp nkô̆ nau, nau dơi tâm rnôk Ngih dak sŏk lơi neh gay ma hun hao văng sa, rêh jêng yor nau geh jêng bah neh dak, nsum mpôl gay ma der nau nau ndăn, sŏk lơi neh lă lêng, mô tâm di, đăp mpăn nau dơi tâm di pháp luật bah nŭih ƀon lan rnôk geh neh bu sŏk lơi. Ngăn lah sŏk lơi gay ma ƀư ăp nau kan tâm nkuăl đô thị, ngih gŭ ƀư kan tăch rgâl:

‘Nau aơ ri nơm ân geh nchâp dŏng nau kan tâm nchră đah nŭih ƀon lan ndrel ntŭk kan tăch rgâl tĭng tâm di nau đă bah Nau ntrŭnh mrô 18. Nau ntrŭnh mrô 18 lŏ ƀư nau kan geh nau tâm nchrăp êng đah nŭih ƀon lan ndrel ntŭk kan tăch rgâl tâm nau ntrơn rgâl nau dơi dŏng neh gay ma ƀư ăp nau kan mpeh đô thị, ngih gŭ ƀư kan tăch rgâl. Rnôk aơ mô leo tâm rnoh sŏk lơi neh ma nau kan tâm nchrăp đah ƀon lan ndrel ntŭk kan tăch rgâl”.

Nkoch tât nau aơ ta rơh rƀŭn, Kruanh n’gâng kan Tài nguyên ndrel Môi trường Trần Hồng Hà mbơh, dôl ndâk nkô̆ nau ƀư nau kan đah nau geh lah Ngih dak sŏk lơi neh gay ma hun hao nau văng sa, rêh jêng yor nau dơi bah neh dak, nsum mpôl, lah mô ƀư rjăp mra geh nau kan gay ma kơp uănh:

‘Phung hên gĭt lah nau kơp uănh ri mô hŏ tâm di. Bar lah nau nchrăp mhâm ƀư gay ma gĭt tay ăp nau kan geh jêng bah neh dak, nau geh jêng nsum mpôl ri ân geh lŏ mĭn rvê ngăn gay ma đăp mpăn nau kan aơ ân geh kloh lơn. Nau kan aơ phung hên dăn dơi geh djăt, mra lŏ dŏng âk mông nar gay ma mĭn. Đah ăp nau kan gay ma phung hên lŏ geh nau ntrŭnh đă mpeh nkô̆, nau mpeh nau geh dơi bah neh dak, nsum mpôl. Kơt lah rnôk aơ gay ma njêng rnoh neh kơl an nau kan rƀŏng trong hăn gay ma sŏk lơi, gay ma njêng luh tu tơm neh ntu kơl an ân nau ntĭm nti tĭng trong gay ma sŏk lơi, gay ma njêng luh nau geh dơi gay ma tăch geh rnoh ndrel ma sŏk rnoh neh aơ gay ma hun hao njêng ntŭk ntu gung trong”.

Ntoh nau tâm nar rƀŭn, Kruanh Quốc hội Vương Đình Huệ lah rjăp Bôk nau nchrăp Luật neh ntu (rgâl nkra) lah nau nchrăp Luật khlay, geh nau dơi têh ngăn tât nau hun hao văng sa, rêh jêng. Nchră tât nau kan nchrăp ƀư nau nchrăp Luật. Kruanh Quốc hội nkah ntŭk kan nchrăp săch lŏ kơp, đăp mpăn nau dơi ndrel nau geh jêng bah ăp ding. Ngăn lah rdâng nau sa khâm, ƀư mô ueh tât nau dơi geh nsum tâm nau ndâk njêng luật:

‘Rgâl nkra, ntop tay ăp nau ntrŭnh gay ma rklaih ăp nau kol, nau mô tâm di tâm nau ngăn, yơn ân geh đăp mpăn nau dơi rgum đah nau kan jŏ jong. Ƀư ngăn, der nau dah rŏng ma ƀư jêng ăp nau tih ngăn rnôk aơ lŏ leo tâm nau nchrăp kan Luật. Njrăng rdâng nau mô tâm di, nau joi ân geh jêng êng tâm rnôk ndâk njêng pahps luật ndrel ăp nau kan ntoh luh tâm nau ngăn yơn geh nau tĭng rnôk, geh nau tĭng nau tât, nkah êng bah du đê̆ ntŭk êng êng. Tâm nuih n’hâm geh jêng bah neh dak, ƀon lan, nau geh jêng bah nsum mpôl, nau geh jêng bah ntŭk kan tăch rgâl, nau geh jêng bah ƀon lan, nau dơi ndrel nau geh tâm di pháp luật bah ăp nŭih”.

Aơ lah nau nchrăp luật geh nau rgop đă bôk năp, nau nchrăp mra mbơh đă Quốc hội uănh, rgop nau rơh bôk năp tâm rơh rƀŭn tal 4 tât ndrel mra geh uănh nchră jêh pe rơh rƀŭn. Bôk nau nchrăp Luật neh ntu (rgâl nkra) aơ mra ƀư ân rjăp nau ntrŭnh mrô 18 bah Rnâng kan rđau kan Trung ương mpeh nau lŏ rgâl mhe, ƀư jêh nau ntrŭnh, ƀư ân săk tam nau mât ndrel dŏng neh, njêng nau dơi leo neh dak nơm jêng dak hun hao geh nau săk rnglay văng sa./.

VOV.VN

Nŭih rblang: H’Thi