Tâm Sơn La, n’gor geh rlau 1,3 rkeh nŭih, tâm nê rnoi mpôl đê̆ rlau 83%, nau kan bah bu ur cán bộ nŭih rnoi mpôl đê̆ hăn ndrel, tâm pă mbăk nau kan ndrel ma rđau kan ăp nkuăl ntoh nâp. Nau geh bah Sơn La lah rgum ân hun hao tuch tăm tĭng nau kan prêh mhe, tuch tăm kloh, tuch tăm hữu co. Tŭng wa Lưu Minh Quân, Kruanh Ban Dân vận n’gor Sơn La, n’gor mro uănh kơl an mât chăm ân nau kan cán bộ, ngăn lah cán bộ bu ur. Rnoh bu ur ntoh ămt Quốc hội, bu ur ntoh măt HĐND, rnoh bu ur râng ăp gưl uỷ, rnoh lăp đảng lah bu ur...kŏ âk lơn rđil năm kan bah năp. Êng rnoh đảng viên bu ur geh lăp đảng ntơm bôk năm kan tât rnôk aơ rlau 42% rnoh đảng viên me lăp. Mbơh du đê̆ nau tă dơi tâm nau kan tâm ban bu ur bu klô ndrel n’hao nau dơi bah bu ur tâm nkuăl, wa Lưu Minh Quân, mbơh:

‘Nau kan tơm tâm Sơn La, nê lah nau rđau gay ma dơi ntrŭt dăng nau kan kơl an ân bu ur n’huch ach o nâp nâl bah nau kan văng sa bah nkuăl. SơnLa lah 1 tâm 14 n’gor bah lam dak đăng ký ma Trung ương rmôt dŏng nau kan mhe tâm nau mât rmôt têm nkrem prăk gay ma n’hao nau nâp nau kan geh dơi ma nau đă mhe. Sơn La kŏ ntrŭnh ƀư bôk nau kan kơl an bu ur nti kan, pă kan pah ân rlau 9.700 oh nur. Ntrŭt dăng nau kan tâm rlong ndâk nŭih bu ur Việt Nam rơh mhe, mât geh 651 nau kan, 2818 nŭih đah 1292 bu ur geh dơi nau săk tam bah nŭih bu ur Việt Nam tâm nau rêh mhe”.

Tâm Lai Châu, tĭng wa Vũ Mạnh Hà, Uỷ viên Dự khuyết Trung ương Đảng, Groi Bí thư N’gor uỷ Lai Châu, n’gor Lai Châu hŏ uănh khlay nau ƀư tĭng, nau dơi bah bu ur, nau kan bu ur ndrel nau tâm ban bu ur bu klô. Tâm nê geh ăp nau ntrŭnh mpeh hun hao văng sa nkual rnoi mpôl đê̆ geh tât nau dơi bah bu ur, kon se nkuăl rnoi mpôl đê̆. Ngăn lah, n’gor uỷ Lai Châu hŏ ntrŭnh nau mrô 06 lơ 16/3/2021 mpeh nau n’hao nŭih cán bộ rđau kan, mât nŭih rnoi mpôl đê̆ ndrel cán bộ tơm bah gưl xã năm kan 2021-2025, rƀŏng tât năm 2030; rđau mrô 9/2021 bah Rnâng kan n’gor uỷ mpeh nau n’hao nau rđay kan bah gưl uỷ Đảng đah nau kan n’huch tâm gŭ ur sai ơm, tâm dăch dak mham, bôk nau kan kơl bu ur ndâk kan, ntrŭnh nau đah nŭih bu ur, nau kơl rnôk deh kon, mât chăm n’hâm soan, bảo hiểm y tế, nau deh đê̆ kon, mât nau dơi ndrel nau geh bah bu ur bah năp pháp luật:

 ‘Nau kơl an rgum ntĭm nti ndrle nchiăr cán bộ bu ur bah 5 năm ri nau tă dơi geh du đê̆ nkô̆ nau: Tal bôk năp, ndơn năl, ƀư nau kan bah ăp gưl uỷ n’gâng kan bah lam nau rêh jêng, tâm nê săk bu ur nơm mpeh nau kan, nau dơi bah bu ur ndrel nau kan bu ur tâm rơh mhe geh âk nau ntrơn rgâl ngăn. Tal bar mpeh nau tâm ban bu ur bu klô tâm nau kan chính trị, văng sa, văn hoá rêh jêng geh dơi ăp nau ueh. Rmôt cán bộ bu ur rđau kan mât ntŭk kan, rmôt kan geh n’hao mpeh rnoh âk, rnoh blau kan”.

Wa Tôn Thị Ngọc Hạnh, Groi Kruanh rmôt bu ur Việt Nam mbơh, nau kan mpeh nau tă dơi geh ƀư tâm nau kan bu ur hŏ dơi geh âk nau dơi ngăn ndrel geh nau ntrơn rgâl ngăn tâm nau mĭn. Nau kan bah ăp gưl, ăp ntŭk kan, nkuăl tâm rơh rlau aơ geh n’hao prêh lơn. Ndrel geh kơl an jru, bu ur râng âk lơn tâm ăp nau kan bah nau rehe, lah rjăp nau dơi, nau kan ndrel n’hâm ang, rgop ngăn tâm ăp nau dơi geh nsum bah ăp nkuăl kŏ kơt lah lam dak. Yơn lah, nau mĭn tâm nkhah mpeh bu ur bu klô, nau ơm yau, nau kơl an, hôm khuch ngăn tât nau hun hao bah bu ur. Lŏ kơl an tât nau kan bu ur ndrel nau ƀư nau kan bah rmôt bu ur ƀư du nau kan rnộk aơ lah rnôk gay ma ƀư nau dơi n’hao nau dăng bah bu ur kŏ kơt lah ƀư nau tâm ban bu ur bu klô tâm nau kan chính trị, văn hoá rêh jêng. Wa Tôn Thị Ngọc Hạnh, ngơi:

‘Đah nau ƀư tĭng nau kơl an nsum đah rmôt bu ur ƀư du nau kan bôk năp, ngăn lah ăp nau kan mpeh pahsp luật gay đăp mpăn nau dơi bah bu ur nar lơn ma geh nau dơi, nau kan mpeh kơl an tâm nau rêh hŏ geh mât ăp lam. Kơl an ăp mrôt nŭih kơl bu ur rnoi mpôl đê̆, bu ur rven rvo, bu ur ntrơn ntŭk gŭ, bu ur bu ranh...ngăn lah geh kơl an ndrel nau tă dơi geh ƀư nau kan hôm âk nau hôm njrăng uănh”.

 Nau tă dơi geh bah nau kan bu ur tâm rơh rlau aơ hŏ nar lơn ma kơl an lah rjăp lơn nau dơi khlay bah rmôt cán bộ bu ur. Nau ƀư nau kan đah ăp rmôt bu ur geh nau dơi bah nkuăl mpeh ba lơ tâm rơh rlau aơ du tŏ tay đŏng lah rjăp nau kơl an, rđau ngăn bah gưl uỷ, ndrel ma nau lăp kan rjăp, tâm ban bah ăp gưl, ăp ntŭk kan, ăp rôt kan nsum đah nau kan bu ur; ngăn lah nau nchrăp lor, blau nau mhe ndrel geh nau dơi ngăch đah nau ŭch ƀư ngăn bah ăp nau kan tâm rmôt tâm rơh rlau aơ./.