VOV4.M’nông: Mhe rlau aơ, tâm nkuăl ƀon têh Buôn Ma Thuột, n’gor Dak Lak, Rmôt tahen ơm Việt Nam ƀư tâm nchră rmôt tahen ơm râng mât ntŭk ntu gŭ âm, đah nau râng bah ăp ntoh măt ăp rmôt tahen ơm 14 n’gor, nkuăl têh nkuăl Miền Trung-Tây Nguyên. Aơ lah rơh gay ăp gưl kan Hội, cán bộ, hội viên rmôt tahen ơm tâm nchră nau tă blau kan, ntĭm nti, pơk hvi nau kan ueh, nau kan săk tam, rgop nau ƀư tĭng nkô̆ nau, nau kan hun hao văng sa, rêh jêng.

            Tĭng rmôt tahen ơm Việt Nam, ntơm năm 2006, Rmôt kan ndrel N’gâng kan ntŭk ntu gŭ âm đăng ký bôk nau kan tâm rgop ƀư nau kan mpeh nau mât ntŭk ntu gŭ âm ndrel mât neh ntu. Tât rnôk aơ, ăp gưl kan hội hŏ ndâk geh 1.650 nau kan tahen ơm râng mât ntŭk ntu. Ăp rmôt nkre geh nau kơl an mât ntŭk ntu, ƀư nau kan mât ntŭk ntu, nkre bonh đă, nkoch trêng nau aơ. Âk rmôt nkoch trêng mât ntŭk ntu geh ăp gưl xã geh rmôt tahen ơm ndâk ndrel pah kan ueh.

            Tâm nar tâm nchră, ăp ntoh măt ndrel tâm nchră, mbơh ăp nkô̆ nau kan tahen ơm râng mât ntŭk ntu, nau blau nau nkoch trêng, bonh đă ƀon lan, n’hao nau blau, nau dơi tâm tahen ơm, ƀư ueh nau kan tơm tâm nau mât ntŭk ntu. Wa Trần Quế Lâm, rmôt tahen ơm xã Ea Kly, nkuăl Krông Pách, n’gor Dak Lak, mbơh:

‘Phung hên ân lah ân geh nkoch trêng jru tâm ƀon lan, tâm nsum mpôl, tâm rmôt kan, tâm ngih săm ƀŭt. Ăp rmôt kan, tă bah rmôt ân tât rnăk kŏ geh nau blau ndrle n’hao nau kan bah nơm tâm nau pă ăp ntil ndŏk ndrel mât ntŭk ntu. Ân geh ndơn ngăn lah, mât ntŭk ntu lah mât nau rêh bah nơm ri mơ dơi ƀư nau nê. Bah nê kŏ ân n’hao nau kan bah ăp gưl, ăp rnâng kan, tâm ăp rmôt kan chính trị rêh jêng tâm rmôt mặt trận gay ma ndrel ăp nŭih râng ndrel ma nau mât ntŭk ntu”.

            Ăp ntoh măt ân lah, nau ndâk ndrel pơk hvi nau kan mât ntŭk ntu geh leo luih kơt du nau nchră gay rmôt kan ƀư jêh nau kan. Ntơm bah nê, ân geh uănh khlay nau kan ntĭm, mbơh nau mpeh nkoch trêng nau mât ntŭk ntu ân ăp tahen ơm.

            Jêh tâm nchră, ăp ntoh măt hŏ hăn uănh tâm nau kan tahen ơm mât ntŭk ntu tâm xã Ea Bhôk, nkuăl Cư Kuin, n’gor Dak Lak. Geh ndaka ntơm năm 2020, rmôt tahen ơm mât ntŭk ntu thôn 1, xã Ea Bhôk hŏ geh rgop khlay tâm nau nkoch trêng ndrel ntrŭt dăng nau kan “Kloh ƀon, kloh lŏ ba”. Tĭng nê, Rnâng kan bah rmôt kan hŏ mbơh pă nau kan ân ăp nŭih, ăp nar ƀư ueh nau kan răk kloh ntŭk ntu tâm ƀon lan, năn nkah đă ăp rnăk klŭp ndŏk mô tâm di, bonh đă ntrơn leo ndrung rong kik sur djar ngai ntŭk gŭ.

            Ngăn lah, ăp khay, nŭih ƀon lan tâm thôn rgum ƀư kloh ntŭk ntu, rep kloh trong hăn. Đah ndrŏk ăp nar, Rnâng kan bah rmôt nchră đah rnâng kan mât bah thôn, tâm ban đah ƀon lan ƀư nau kan nsum ma công ty rep ndŏk bah nkuăl gay ma rgum ndŏkđu pơh 2 tơ̆, prăk nkhôm 30 rbăn/rnăk/khay.

            Wa Phan Văn Tịnh, Kruanh rmôt tahen ơm xã Ea Bhok nkoch, tâm xã rnôk aơ ndâk geh 3 rmôt tahen ơm răk kloh ntŭk ntu. Nau rhơn lah ntơm rnôk ndâk ăp rmôt mât ntŭk ntu tât rnôk aơ nau ma ƀon lan dah ma ân ndŏk mô hôm tay, ăp trong mương hoch dak geh n’hong, ntŭk ntu gŭ âm geh kloh, mô hôm ntŭk khuch ƀŏ mpeh ntŭk ntu. Êp nê, bah nau ƀư nau mât ntŭk ntu hŏ rgum geh nau râng bah ƀon lan, ngăn lah ăp rơh mom.

            Tât rnôk aơ, lam n’gor Dak Lak hŏ ndaka 16 rmôt kan tahen ơm mât ntŭk ntu. Bah nê, ăp rmôt kan ndrel ăp nŭih hŏ gĭt kloh nau khlay bah nau kan mât ntŭk ntu gŭ âm, ntô̆ n’hao nau kan nau kan bah rmôt tahen ơm ăp gưl tâm nau nsôih râng nau kan mât ntŭk ntu.

            Mra dơi lah, ăp nau kan bah rmôt tahen ơm mât ntŭk ntu gŭ âm tâm Dak Lak geh ndâk bôk năp hŏ geh rklaih nau kan ueh ntŭk ntu gŭ âm tâm ƀon lan. Bah nê, lŏ ƀư rjăp nau kan, nau dơi bah rmôt tahen ơm tâm nau kan nsum n’hâm ndâk njêng ƀon lan mhe, ndâk njêng ntŭk ntu kloh-ueh, ntrŭt dăng nau hun hao văng sa, rêh jêng bah nkuăl./.

Nŭih rblang: H’Thi