4 năm bah năp nê, rnăk yuh K’Tâm tâm Thôn 1, xã Liêng Srônh, nkuăl Đam Rônh n’gor Lâm Đồng lah rnăk ach o.  3 sào neh tăm cà phê, ba, mbo tĭng nau ơm, ri ma nau văng sa mô tŏng mro. Bah năp nau nê, wa K’Nga, Kruanh Uỷ ban MTTQ Việt Nam, xã Liêng Srônh hŏ tât uănh, bonh yuh ntrơn neh tăm mô jêng gay tăm tơm ndrŭng brai, kơl an yuh K’Tâm manh prăk gay ma rvăt ntil tăm, ndrŭng brai ndrel nau rong. Jêh geh rgâl nau kan, văng sa bah yuh K’Tâm ăp nhoat geh rgâl. Yuh K’Tâm mbơh, nau geh tă bah ndrŭng brai kơl an yuh nkra ngih, kon geh hăn nti:

 “Bah năp nơh ri rnăk hên tăm cà phê, rnơm nkoch mbơh bah yuh K’Nga ma rnăk hên tăm tơm ndrŭng brai ndrel geh leo nsĭt nau săk geh văng sa âk rlau ma cà phê. Đah tơm prăk bah Uỷ ban MTTQ Việt Nam nkual kơl rvăt ndoh ndơ dŏng ri ma kơl an rnăk hên geh prăk n’hao săk geh văng sa ân rnăk vâl, geh dơi kơl nau rêh ăp nar”.

Mô êng knŭng yuh K’Tâm ma âk rnăk êng rnoi K’ho tâm xã Liêng Srônh nkuăl Đam Rông hŏ rklaih ach o rnơm rgâl nau kan, janh ntrơn rgâl tĭng nau ntrŭnh bah Đảng ndrel Ngih dak. Gay dơi ƀư nau nê, âk cán bộ đảng viên bah xã, tâm nê geh K’Nga lah du hê nŭih ntoh lư, hŏ ƀư ueh nau kan leo trong tâm nau ƀư ndrel nsôih nkoch trêng, bonh đă kônh wa kơt tĭng.

Bah 12 năm kan, bol ma tâm moh nau kan cán bộ Tư pháp, Kruanh rmôt bu ur xã mô lah rnôk aơ lah Kruanh Uỷ ban MTTQ Việt Nam xã, wa K’Nga mro ƀư ueh nau kan bah đảng viên. Wa mro tâm dăch ma ƀon lan, djăt, gĭt nau mĭn, nau ŭch bah ƀon lan gay ma năn mbơh ân giưl uỷ, n’gâng kan kơl rklaih ngăn. Rnơm nê, ăp nau kan bah nkuăl ƀư kơt lah: Ntrơn rgâl tơm tăm, kơl an hun hao văng sa, nsum ty ndâk njêng ƀon lan mhe, pă neh nkra trong, ndâk nau rêh mhe tâm nkuăl ƀon lan... kŏ geh ƀon lan kơt tĭng. Ăp nau rluk mâl ơm tâm nau tâm gŭ ur sai, tâm gŭ ơm, mpăm khĭt jŏ nar dơi geh ăp nhoat ntrŭt jăng lơi. Tĭng wa K’Nga, lah nŭih kon bah ƀon lan ndrel cán bộ đảng viên đŏng ri ma nau kan ndâk njêng ƀon lan nơm ân ueh ndrel hun hao:

‘Đah ma nau kan jut n’huch lơi ăp nau rluk mâl ơm kăl e kơt lah mpăm khĭt, tâm gŭ ur sai tâm nkuăl ri gâp ndrel ma Đảng uỷ, UBND xã hŏ ƀư ueh nau kan nkoch mbơh, bonh đă kônh wa jut n’huch lơi nau rlu mâl ơm tâm nau pah kan jan sa, tuch tăm, n’hao nau rêh. Kơt lah nau mpăm khĭt ri mô ân rlau 48 mông, ƀư tĭng nau ntrŭnh nsum bah Đảng uỷ, nkuăl uỷ. Nau kan tâm gŭ ur sai mô dơi chôk prăk. Đah nau mât nau ơm văn hoá kŏ geh ntrŭt dăng, ngăn lah mât nau ơm mpeh chĭng gong kŏ kơt lah nau njroh bah rnoi ta ntŭk kŏ geh n’hao lơn’.

Liêng Srônh lah xã geh rlau 70% rnoi mpôl đê̆, tâm nê ngăn lah rnoi K’ho. Tĭng wa Nguyễn Thị Thu Hiền, Groi Bí thư Đảng uỷ xã Liêng Srônh, nkuăl Đam Rông bol ma nau rêh văng sa ƀon lan geh rgâl, hun hao âk rđil bah năp yơn hôm rdâng đah âk nau jêr, ntul rlong ân geh nsôih. Ndri ma, nau ƀư ueh nau kan bah đảng viên, ngăn lah rnoi mpôl đê̆ tâm nau hun hao văng sa rêh jêng lah nau khlay. Đảng viên K’Nga ƀư ueh nau kan bah nơm ndrel jêng nŭih leo trong gay âk đảng viên êng kơt tĭng. Wa Nguyễn Thị Thu Hiền, ngơi:

 ‘Bah rlau 10 năm kơl ƀư nau kan bah nkuăl, yuh K’Nga lah nŭih geh bu rnơm ngăn tâm nkuăl ƀon lan rnoi mpôl đê̆. Tâm nau kan nkoch mbơh bonh đă kônh wa ƀư kơt tĭng ueh nau ntrŭnh, ntrong kan bah Đnagr, nau ntrŭnh pháp luật bah Ngih dak. Tâm nê ntoh ngăn lah nau nkoch trêng ân kônh wa tâm nau ƀư ueh gay ma ndâk njêng ƀon lan mhe, hun hao văng sa, kơl an kônh wa rklaih ach o nâp nâl. Ngăn lah wa K’Nga hŏ kơl an âk kônh wa ƀon aln ta ntŭk rklaih luh ach o nâp nâl”.

 Đah ăp nau rgop bah săk nơm tâm nau kan, wa K’Nga, Kruanh Uỷ ban MTTQ Việt Nam xã Liêng Srônh hŏ ndơn geh âk bằng khen, săm ƀŭt rnê nkhôm bah xã, nkuăl ndrel n’gor Lâm Đồng. Aơ lah ăp nau kơp dơn bah cán bộ đảng viên tâm nkuăl rnoi mpôl đê̆”./.