VOV4.M’nông:   Bôk nău kan “Chor jay n’hŭt răm công đoàn” yor Liên đoàn Lao động n’gor Dak Lak rgŏ jă ăp năm bah năp lĕ kơl hang rhiăng đoàn viên, nuĭh pah kan geh nău rêh jêr jŏt “đăp mpăn gŭ âm pah kan”. Êng năm 2021, bah tơm prăk nkrem “Chor jay n’hŭt răm Công đoàn” ăp gưl Công đoàn ta n’gor lĕ ngăch ntop kơl ndâk ƀư, nkra 120 rnăk wâl an đoàn viên geh nău rêh jêr jŏt đah jay gŭ đah dĭng lĕ prăk ntop kơl rlău 4 rmen 500 rkeh prăk.

Sai lĕ khĭt, yuh Nguyễn Thị Loan, ta xă Ea Rốk, nkuăl Ea Súp, n’gor Dak Lak jêng nuĭh tơm mât uănh an kon jêt n’hanh mê̆ sai lĕ ranh. Nău rêh rnăk wâl jêr jŏt jêng nău ŭch đah du mlâm jay nâp nâl đah yuh Loan dŭt ngai. Yuh Loan nkoch: Mbak jâk dôih rnon yor manh prăk săm ji an sai, mĭn piăng sa ao nsoh an rnăk wâl n’hanh nău nti nsơm bah kon ƀư yuh mâp âk jêr jŏt. Nău rêh tâm jay lĕ sat mê̆ kon, u mon dŭt rvê ăp tơ̆ yan mih phŭt sial tât.

 “Nkre rngot yor sai roh, lŏ rngot đah wăng sa, yơn dŭt lah lap geh oh nô tâm Liên đoàn Lao động nkuăl saơ nău rêh jêr jŏt bah oh lĕ ntop kơl an me sau oh bah rnôk rnăk wâl oh mâp nău. N’hanh lơn lah oh yuh lĕ kơl gay mê̆ kon oh geh chor jay n’hŭt răm tâm yô̆ tâm kơl”.

Jao an jay công đoàn an nuĭh pah kan jêr jŏt

Năm 2021, Yuh H’Ni Wong B’krông, đoàn viên Công đoàn bah dâng xă Cư Huê,  nkuăl Ea Kar, nsrôih răk jut jay mhe yor Liên đoàn lao động n’gor ntop kơl prăk ndâk ƀư. Jay mhe dơi ƀư dĭng lĕ rnoh neh 70m2, khlay bơi 180 rkeh prăk. Tâm nĕ, Liên đoàn Lao động n’gor ntop kơl 50 rkeh prăk, Ban ntĭm rđău tahen nkuăl Ea Kar ntop kơl 10 rkeh prăk, rnoh prăk hôm ƀa ƀă yor rnăk wâl ntêm nkrem n’hanh manh nuĭh bên. Yuh H’Ni Wong B’krông nkoch: Rlău 10 năm aơ nău rêh bah rnăk wâl jêr jŏt jêng ur sai gâp gŭ nsum đah me bơ̆ n’hanh ăp oh. Aƀaơ dơi geh ƀư jay mhe kơl rnăk wâl geh ntŭk nsing nơm gay nsrôih ƀư sa, hun hao tâm nău rêh.

“Yor prăk geh mô đăp mpăn, mô dơi ƀư jay jêng gŭ nsu tâm 10 năm. Aƀaơ dơi geh jay oh lah uĕh nău uănh kơl bah ăp gưl ủy đảng, bah ƀon lan, nkuăl kơt n’gor lĕ uănh mĭn nta an ur sai oh, gay đăp mpăn nău rêh, gay mpôl oh đăp mpăn pah kan”.

Tĭng rnoh kơp bah Liên đoàn Lao động n’gor Dak Lak, tâm năm 2021, bah tơm prăk nkrem “Chor jay n’hŭt râm Công đoàn” ăp gưl Công đoàn ta n’gor lĕ ngăch ntop kơl ndâk ƀư, nkra 120 mlâm jay an đoàn viên geh nău rêh jêr jŏt đah jay gŭ đah dĭng lĕ rnoh prăk ntop kơl rlău 4 rmen 500 rkeh prăk.

Wa Nguyễn Công Bảo, Kruanh Liên đoàn Lao động n’gor Dak Lak an gĭt: Bôk nău kan “Chor jay n’hŭt răm Công đoàn” ăp năm bah năp lĕ dơi dơn nău tâm ban ŭch, nău kơl bah ăp gưl ủy Đảng, n’gâng kan ƀon lan, ăp nău kan, nsum mpôl ta ntŭk, ăp ntŭk kan, doanh nghiệp tâm n’hanh bah dih n’gor. Bôk nău kan lĕ kơl an đoàn viên, nuĭh pah kan jêr jŏt đăp mpăn ntŭk gŭ đăp mpăn pah kan jan sa, krêp dêh đah rmôt kan công đoàn, rgop đăp mpăn nău rêh jêng ta lam n’gor.

Jao an prăk ntop kơl ndâk ƀư jay an đoàn viên jêr jŏt.

“Tâm năm mhe rlău aơ, Chor jay n’hŭt răm công đoàn kơt ăp ntŭk kan ƀư tĭng uĕh da dê nău rgŏ jă nuĭh pah kan tâm pă, tâm rgop an tơm prăk nkrem aơ. Tĭng nău ntrŭnh bah mpôl hên du hê đoàn viên du khay rgop 5.000 prăk. N’hanh jêh nĕ mpôl hên ntêm tay an công đoàn gưl bah lơ n’hanh bah dâng 90% gay nchrăp ndâk ƀư trong nchrăp n’hanh mbơh ƀư. Hôm 10% mpôl hên prăp gay tâm pă an ăp ntŭk kan jêr jŏt lơn. Rlău ma nĕ Liên đoàn Lao động n’gor hôm rgŏ jă ăp ntŭk kan êng”.

Ăp Chor jay n’hŭt răm công đoàn dơi jao an lĕ jêng nuih n’hâm rhơn răm tâm đoàn viên công đoàn, bah nĕ, khân pơng nsing nơm ndâk njêng rnăk wâl hơm răm./.

                              Nuĭh rblang: Y Sưng Phê Ja