VOV4.M’nông: Pơh rlau aơ,  tâm rơh rƀŭn tal 3, Quốc hội gưl 15 hŏ geh rơh tâm nchră ôp nau ndrel ơh nau ôp. Kruanh n’gâng kan tuch tăm ndrel hun hao ƀon lan Lê Minh Hoan lah nŭih bôk năp geh ơh nau ôp bah năp Quốc hội. Nau kan “geh âk ndơ tuch tăm ma rnoh mô khlay” lŏ geh ƀư nau tâmn nchră âk lơn tâm ngih rƀŭn Quốc hội. Tâm ăp nau kan N’gâng kan Lê Minh Hoan lah rjăp nau ƀư nau kan tuch tăm, bonh đă kônh wa tâm boh nau kan. Nkre lah rjăp tât nau mĭn ntrơn tă bah nau tuch tăm ân jêng nau kan văng sa tuch tăm.

            Pơh bôk nar ôp, rơh rƀŭn Quốc hội lŏ geh ăp nau ôp mpeh “nau mpơ̆ sĭt plơ̆ hăn geh âk play ma rnoh tăch thuk” ndrel ăp nau kan kơl an ndơ tuch tăm ê tât rnôk lôch. Tĭng nau nkoch tă bah rơh kan bah năp, wa Dương Khắc Mai, rmôt kan bah n’gor Dak Nông ndơ̆ nau ôp ân Kruanh n’gâng kan tuch tăm ndrel hun hao ƀon lan:

            ‘Nau kan tuch tăm hôm geh nsing ngăn tâm nau hvi, nsing tâm nau vay geh nê lah ntŭk tăch, tâm rnôk rnoh ăp ntil ndơ gay ma mât chăm ân tơm tăm ri mro hao khlay, nau tuch tăm hôm nsing âk ngăn dah ma tăm ndrel rnôk tăch ri nsing tâm du đê̆ ntŭk rvăt. Nau kan, nau ntrŭnh ê tŏng ueh gay ma rgum ăp tu tơm tâm nau ntuh kơl nau kan aơ. Đă Kruanh n’gâng kan mbơh, rklaih moh nau kan ân nau aơ”.

            Kruanh N’gâng kan tuch tăm ndrel hun hao ƀon lan Lê Minh Hoan ơh nau:

            ‘Phung he ân ƀư tay nau kan tuch tăm, ƀư nâp ăp ntil tơm tăm. Nau mbơh, mbơh nau ân kloh, rnoh geh bah ăp yan tuch tăm bah ăp ntil tơm tăm ndrel ntop tay tâm ăp ntil ntŭk leo tăch. Ntŭk dak nơm leo tăch tât dak ba dih, ntŭk tăch tâm dak nơm. N’gâng kan tuch tăm ndrel hun hao ƀon lan kŏ geh nau ndơn Thủ tướng Chính phủ, mra ơm ndrel ăp ntŭk kan rmôt kan bah dak ba dih nơm ân geh ƀư nau kan aơ”.

            Ôp mpeh nau kan ƀư tay nau kan tuch tăm geh nsum ma ntŭk tăch ndơ, âk ntoh măt uănh kơl an tât nau kan tuch tăm, mbơh nau mpeh ntŭk tăch ndrel nau hôm kol ndơ tuch tăm bah nơm tâm rnôk geh klih, pĕ âk. Wa Hoàng Anh Công, rmôt kan tă bah Thái Nguyên mbơh kloh:

            ‘Ngoai tâm ăp nkô̆ nau tơm lah nau kan rvăt lăp geh tât nau kan kơp ndơn rnoh ndơ tuch tăm ân nâp kloh ueh tă bah Trung Quốc geh âk nau rgâl ân geh nau nâp ueh mpeh nau rvăt lăp nar lơn ma prêh lơn, tŏng dơi ăp nau geh kơp dơn kơt ăp dak Châu Âu ndrel Hoa Kỳ tĭng Kruanh n'gâng kan ri nơm moh nau ƀư gay geh ntrong kan kơl an ƀon lan n'hao nau geh nâp ndơ tuch tăm n'hao rnoh geh ndơ tuch tăm bah nê gay ma n'hao nau tăch luh ndrel ndâk du jâng kan tăch luh ân geh nâp nâl"”

            Kruanh n’gâng kan tuch tăm ndrel hun hao ƀon lan Lê Minh Hoan lah kloh:

            ‘Dŭt âk năm nơm geh nau mĭn ntŭk tăch tâm Trung Quốc lah ntŭk tăch nơih rvăt, rnôk Trung Quốc rgâl ăp nau kan gay ma nkân njrăng srê nuh kŏ kơt lah nau đăp măpn kloh ndơ ngêt sa ri nơm dôl mâp nau jêr, ta aơ nê lah nau kan bah ăp N’gâng kan, ntŭk kan Trung ương, tâm nê N’gâng kan tuch tăm ndrel Hun hao ƀon lan tâm nau mbrơi mbơh ăp nau ân ƀon lan gĭt ndrel săk ƀon lan nơm ri kŏ mô lăng ŭch rgâl, ê mĭn tât nau kan aơ”.

            Ndơ̆ nau ôp mpeh rnoh phân poh, dak si mât chăm tơm tăm, ndơ sa mpa rong, ăp ntil ndơ dŏng tâm nau kan mât chăm hao khlay tâm ăp năm rlau aơ, ƀư ân ƀon lan tŭp tâm nau jêr, dŏng sa n’hâm nơm, mô lah mô geh sa. Ngăn lah ntơm rnôk gh srê Covid-19 ntoh luh, ăp ntil rnoh bah ndơ tăm hao khlay. Ăp ntoh măt ân lah, aơ ngăn lah nau kan ân geh ƀư ngăch đah nau kan tuch tăm, nkre đă Kruanh n’gâng kan Lê Minh Hoan lah rjăp ăp nau kan tâm rơh tât gay ma geh nau kơl an, kơl ƀon lan tŏng dơi ndrel dơi rdâng đah nau kan aơ:

            ‘Aơ lah nau kan ndal ân geh ƀư rgum ăp nau kan, ƀư rgum tay ăp nau kan tuch tăm. Ƀư tay nau kan tuch tăm, bonh đă kônh wa ƀon lan rgum kan nsum. Rnôk kônh wa rgum ƀư nau kan nsum ri ân geh ntrong kan ân kloh gay geh ntŭk kan kơl nchră mbơh, gĭt kloh mpeh rnoh, nau nâp, mbơh nau ân geh n’huch lơi nau dŏng hữu cơ ndrel cô vơ, dak si mât chăm tơm tăm vay dŏng ndrel dak si mât sinh học”.

            Đah Wa Vương Thị Hương, Rmôt kan tă bah n’gor Hà Giang ôp mpeh nau kan ntrŭt dăng bah ntŭk kan tăch rgâl râng nau tâm rgop ƀư nau kan tuch tăm geh nsum ma nau tăch luh ndơ tuch tăm. Kruanh N’gâng kan Lê Minh Hoan ơh nau:

            ‘Ăp nkuăl ân geh nchrăp tâm rgop đah ăp nkuăl êng gay ma geh nau rgum ntŭk ƀư nau kan tăch rgâl ân geh đăp mpăn tŏng ndơ tuch tăm bah nơm. Nkuăl ân geh ƀư tam dăch rjăp lơn gay ma ndrel đah du ding lah ƀon lan tuch tăm, du ding lah ntŭk ƀư nau kan tăch rgâl. Gâp mĭn lah, nau dơi bah ăp ntŭk kan tăch rgâl hŏ ntuh kơl, nau rnơm, nau nkoch kơl an bah ƀon lan, 2 ding ndrel tâm pă mbơh nsum. Geh rnôk nau rnơm hôm geh nau ueh dăng lơn nau nchrăp dŏng kan”./.

            Nŭih rblang: H’Thi