VOV4.M’nông: Uỷ ban Rnâng kan Quốc hội hŏ ntrŭnh nau rgum rƀŭn tal 3, Quốc hội gưl XV, ntơm ƀư tâm lơ 23/5 ndrel nchrăp lôch tâm lơ 17/6/2022. Rơh rlau aơ, rmôt kan ntoh măt Quốc hội ăp n’gor tâm nkuăl Tây Nguyên hŏ geh âk nar tâm mâp ma cử tri gay djăt nau rgop, nau đă njoăl tât rơh rƀŭn tal 3 bah Quốc hội.

            Dŭt khay 4 mhe rlau, wa Phan Đình Trạc, Uỷ viên Bộ chính trị, Bí thư Trung ương Đảng, Kruanh Ban Nội chính Trung ương ndrel rmôt kan ntoh măt Quốc hội n’gor Lâm Đồng hŏ geh nar mâp cử tri tâm xã Ka Đô, nkuăl Đơn Dương. Ta aơ, cử tri đă tât Rmôt kan Quốc hội n’gor Lâm Đồng âk nau kan jêr, kol geh n’gor, nkuăl ndrel Trung ương kơl an doh rklaih.

            Nau kan geh cử tri uănh khlay ngăn lah rnoh hao khlay ndơ. Tâm nê, rnoh ndơ tuch tăm hao khlay, rnôk trong tăch mô tâm ban, ƀư nau tăm byăp tâm ntŭk mâp nau jêr. Cử tri Phan Tùng Châu, tâm thôn Nghĩa Hiệp 2, xã Ka Đô, ngơi:

            ‘Rnôk aơ ndơ tuch tăm ri hao khlay ir, kơt lah du ƀao phân tăch du rkeh 350 rbăn/ƀao, bah năp nê knŭng 950 rbăn/ƀao dơm. Đă gưl kan ba lơ mhâm ƀư gay ndơ dŏng ta aơ geh ân ueh rnoh năch gay ma ƀon lan hên geh dơi dŏng âk”.

            Tâm nar mâp, ntoh măt rmôt kan bah n’gor Lâm Đồng, wa Phan Đình Trạc-Kruanh Ban bộ chính Trung ương kơp dơn, djăt nau đă bah cử tri. Rmnôt kan  ntoh măt Quốc hội n’gor mra rgum, njoăl hăn n’gâng kan ba lơ đă rklaih, êng nau mô geh tŏng dơi ri mbơh ân Quốc hội tâm rơh tât:

            ‘Ăp ntŭk ƀư nau kan nsum mpôl tâm nkuăl, n’gor, xã, thôn, ƀon kŏ kơl an nau ŭch bah ƀon lan ndrel ƀon lan geh dŏng. Ŭch kônh wa gĭt ndrel kơl an ăp nau jêr đah n’gâng kan. Nsum nau rgop aơ lah nau nkoch mâp âk nau jêr bah n’gâng kan ndrel ƀon lan tâm nau ƀư. Gâp đă rđau kan nkuăl, n’gor ndrel rđau kan xã kơp uănh nau kan bah nơm mhâm ƀư, ân tâm di ndrel nơih ân kônh wa lơn tay”.

            Dŭt khay 4 mhe rlau, rmôt kan ntoh măt Quốc hội n’gor Dak Lak kŏ ƀư rơh rƀŭn mâp cử tri bah năp rơh rƀŭn tal 3, Quốc hội gưl 15. Tâm ntŭk mâp, cử tri Dak Lak kŏ đă Quốc hội, Chính phủ ân geh lŏ n’hao lơn tay nau tam njrăng rdâng srê Covid-19, ndrel ma nau ndâk ndrel hun hao văng sa rêh jêng bah nkuăl, geh nau kan ƀư tâm ban rnoh tăch, đăp mpăn ntŭk tăch ndrel kơl doh rklaih nau jêr ân tuch tăm, tăch rgâl bah nŭih ƀon lan.

            Rvê rnoh neh hao khlay ndal, ƀư jêng nau hao khlay neh tâm ăp nkuăl geh âk lah mra ƀư kan têh tâm nkuăl ƀon teh Buôn Ma Thuột ndrel ăp nkuăl êp nê, cử tri Bùi Minh Bảo, thôn 2A, xã Ea M’nang, nkuăl Cư M’gar, mbơh nau:

            ‘Bah năp lah ân geh mbơh nau rgum ƀư kan bah ăp nkuăl, ăp ntŭk gay ma đăp mpăn kŏ kơt lah nau geh dơi uănh năl bah ƀon lan gay ma der nau mbơh lah ăp nau mô tâm di ma nau rgum ƀư kan bah n’gâng kan. Mpeh nau nau ŭch ngăn, nŭih ƀon lan ŭch ƀư nau kan tuch tăm yơn ăp ntŭk ntuh kơl bu lăp dŏng ngăn lah knŭng lơi neh dơm. Nŭih ƀon lan ŭch neh ri mô geh neh, hôm nŭih mô ŭch neh ri sŏk rvăt neh âk, mpŭng lir neh âk. Ri gâp đă ăp n’gâng kan geh du nau kan gay ma nkân lơi nau rgum neh gay ma tăch kơt rnôk aơ gay đăp mpăn nau ueh lăng bah nkuăl ndrel bah neh dak”.

            Tâm nar rƀŭn, ăp cử tri hŏ ŭch ndrel đă âk nkô̆ nau geh tât nau ndâk ndrel hun hao văng sa rêh jêng, nchrăp luyh nau kan ueh lơn tay gay ma đăp mpăn rnoh, đăp mpăn ntŭk tăch ndrel kơl an doh rklaih nau kan tuch tăm, tăch rgâl bah nŭih ƀon lan jêh bah nau khuch bah srê Covid-19. Wa Lê Văn Lập, tâm thôn 3, xã Ea M’nang, nkuăl Cư M’gar đă:

            ‘Nau geh bah srê Covid-19 ndrel jêh rnôk bah jêh Covid-19 ri nau rêh bah kônh wa mâp âk nau jêr ngăn. Êp nê, nau jêr lơn ma jêr tay rnôk ma rnoh tăch ndoh ndơ ƀư tuch tăm hao khlay, nê kŏ lah du nau mpet đă ƀon lan. Tal 3, rnoh ndơ tuch tăm jêh ƀư ri mô khlay, mô tŏng rnôk mât chăm. Đă ân geh nau kan ndâk tay ân kônh wa. Ngân hàng ân geh pơk trong nơih kơl an kônh wa geh manh prăk nơih lơn gay ma kônh wa lŏ rlet rlau tâm nau rêh”.

            Êp nê, cử tri Dak Lak đă ăp gưl kan, ntŭk kan ân lŏ pơk trong nơih kơl an mpeh kan pah, manh prăk gay hun hao nau kan tuch tăm ân nkuăl, kơl an ntuh kơl, nkra mhe ăp trong hăn đô thị ndrel ăp xã yor rnôk aơ trong hăn tâm du đê̆ ntŭk djơh khuch hô, ân geh uănh ân tam ngăn nau ntrŭnh ƀư ăp ntrong geh kol ndjơh, ân geh uănh kloh nau săk tam bah nau ƀư nau kan hun hao văng sa rêh jêng bah nkuăl, ngăn lah nkuăl rnoi mpôl đê̆, uănh ăp tơm ntuh kơl nsum ndrel nau kan rvăt dŏng ndơ, ndơ dŏng dak si ndrel ntĭm nti./.

Nŭih rblang: H’Thi