VOV4.M’nông: Jêh rnôk lôch rơh rƀŭn tal 3, Quốc hội gưl 15, rmôt kan ntoh măt Quốc hội ăp n’gor tâm nkuăl Tây Nguyên hŏ ƀư nar tâm mâp cử tri. Ntoh nau rhơn bah năp ăp nau dơi bah rơh rƀŭn, cử tri 2 n’gor Lâm Đồng ndrel Gia Lai kŏ đă âk nkô̆ nau khlay bah nkuăl.

            Ta Lâm Đồng, wa Phan Đình Trạc, Uỷ viên Bộ, Bí thư Trung ương Đảng, Kruanh Ban Nội chính Trung ương ndrel rmôt kan ntoh măt Quốc hội n’gor Lâm Đồng, hŏ mâp cử tri tâm xã Đại Lào, nkuăl ƀon têh Bảo Lộc ndrel xã Liên Đầm, nkuăl Di Linh.

            Tâm ăp ntŭk mâp, cử tri ntoh nau rhơn mpeh ăp nau tă dơi bah rơh rƀŭn tal 3, ngăn lah Quốc hội hŏ dŏng âk mông nchră âk nkô̆ nau khlay. Nkre, cử tri lŏ rgop đă tât rmôt kan ntoh măt Quốc hội rmôt kan n’gor Lâm Đồng ăp nau kan hôm ntoh ân geh uănh, rklaih. Tâm nê, nkah âk ngăn lah nau ƀư nau kơl an rmôt kan tăch rgâl ndrel nŭih ƀon lan jêh bah srê Covid-19, ntrong ƀư đăp mpăn ăp ntil ndơ kơt pring, xăng, ndơ dŏng tuch tăm, mât rnoh ƀư khám, săm ji, nau khám, săm ji bảo hiểm y tế, nau mât neh ntu, nau mât đăp mpăn ndâk nkra, mât njrăng bri, mât ndơ ơm geh, nau ƀư kan hành chính hôm kloh, trong hăn ƀon lan mô ueh, hôm geh roh đăp mpăn...Cử tri Nguyễn Thị phương, tâm thôn 3, xã Đại Lào, nkuăl ƀon têh Bảo Lộc, ngơi:

            ‘Nau ŭch bah ƀon lan phung hên, ntă nkuăl ân geh rgum ri rgum, nkuăl mô geh ân rgum ri ân geh pă neh ân kônh wa geh săm ƀŭt dơi dŏng neh, pơk trong ân hun hao văng sa. Ân geh manh prăk ngân hàng mô lah pă neh ân oh kon đŏng. Ƀon lan hên kŏ geh nau rgop đă gưl kan ba lơ kơt nê”.

            Ndrel ma nê, cử tri kŏ đă ân geh ntrŭt dăng lơn tay nau njrăng rdâng sa khâm, rklaih nau tih, ngăch ƀư nkra trong hăn ngăch Dầu Giây-Tân Phú-Liên Khương.

            Ntoh măt rmôt kan ntoh măt Quốc hội n’gor Lâm Đồng, wa Phan Đình Trạc-Uỷ viên Bộ chính trị, Bí thư Trung ương Đảng, Kruanh Ban Nội chính Trung ương hŏ djăt nau rgop, đă bah cử tri ndrel ơh nau kan geh nau dơi. Êng nau kan njrăng rdâng sa khâm, wa Phan Đình Trạc lah rjăp “mô geh nkuăl mô ân, mô geh nau êng” ndrel mra ƀư rjăp lơn tay tâm rơh tât:

            ‘Ntơm bôk nau kan tal 13 tât rnôk aơ, mhe rlau du năm n’gul yơn phung he hŏ mhal 45 cán bộ tâm Trung ương mât, ndrel phong 21 cán bộ Trung ương mât bôk. Ma ê mâp tă geh ôh nơm ân du ndrel du tơ̆ 2 Uỷ viên Trung ương ndrel nkre ƀư nau mhal, leo krŭng nkre. Nê, nau kan njrăng rdâng sa khâm păng rjăp ngăn. Ân geh ƀư kan rjăp, dŭt roh hoach bah ăp nŭih ƀư kan ri mơ nơm dơi geh ƀư nau kan kơt nê. Ngăn lah, mra lŏ hôm âk nau ueh êng đŏng”.

            Rơh aơ, Rmôt kan ntoh măt Quốc hội rmôt kan n’gor Lâm Đồng hŏ pă 40 nklâm ndơ ân ăp rnăk ach o, pă 1000 thùng dak toh ndrôk yor rmôt kan TH True kơl an ân kon se ach o tâm 2 xã Đại Lào ndrel Liên Đầm.

            Kŏ tâm pơh rlau aơ, rmôt kan ntoh măt Quốc hội n’gor Gia Lai hŏ mâp ƀon lan tâm ăp nkuăl Kông Chro, Mang Yang ndrel nkuăl têh Ayun Pa. Ăp nau kan “duh” kơt rnoh pring xăng, ndơ dŏng kan tuch tăm hao prêh, nau tăch ndơ tuch tăm mâp nau jêr, mbrơi pă săm ƀŭt kơp dơn dŏng neh, rklaih kan pah ân ƀon lan, ntuh kơl nkra trong hoch dak kơl an tuch tăm...hŏ geh cử tri nbơh đah ăp ntoh măt Quốc hội. Ngăn lah, wa Nguyễn Đức Hướng, Groi Kruanh HDND nkuăl Kông chro đă: yor geh anu khuch bah âk nau kan ri ma rnoh xăng, pring, ndơ tuch tăm hao khlay, khuch ngăn tât nau rêh văng sa bah ƀon lan. Đă Quốc hội, Chính phủ uănh geh nau ƀư đăp mpăn, rgâl rnoh xăng, ndơ dŏng tuch tăm tâm rơh tât gay pơk trong gay ƀon lan geh dơi hun hao tuch tăm, ngăn lah tâm xã nkuăl jru, nkuăl ngai bah nkuăl”.

            Tâm nkuăl Mang Yang, cử tri đă Quốc hội geh nau ntrŭt dăng lơn nau tăch ndơ tuch tăm kơl an ân ƀon lan, ngăn lah dnơ tăm âk, der nau kan “geh yan ma rnoh thuk, geh rnoh ma yan mô geh” kơt âk năm rlau aơ. Êp nê, cử tri ân lah ăp nau kan mpeh neh ntu, trong hăn, nau kan mât ndâk hôm kol, rnoh phân poh hao khlay tâm rnôk phân rlăm ê geh njrăng rdâng gay ƀư khuch ngăn tât nau kan tuch tăm bah ƀon lan./.

Nŭih rblang: H’Thi