VOV4.M’nông: N’gor Dak Lak dôl ntrŭnh ƀư âk nau kan, nau ƀư khlay đah nau ŭch geh âk neh mbêng hao tata ma rkeh mét khôí. Ndri ma, geh du nau mô tâm di lah lam n’gor rnôk aơ lŏ ê geh du ntŭk neh geh pă săm ƀŭt dơi dŏng dŏng. Nau khuch jêh nê lah âk ntŭk kan tơm khlay dôl ma mbrơi yor mô tŏng neh mbêng.

            Bôk nau nkra trong Hồ Chí Minh trong der mpeh ba dâng Buôn Ma Thuột geh rnoh jong 40km, rnoh prăk ƀư rlau 1.500 rmen, yor Rnâng kan mât bôk nau kan ntuh kơl ndâk nau nkra trong ndrel tuch tăm hun hao ƀon lan n’gor Dak Lak ƀư tơm ntuh kơl. Bôk nau kan ntơm ƀư tâm bôk năm aơ ndrel tĭng nau nchrăp ri mra jêh tâm năm 2023. Nau ntrŭnh ƀư dôl mâp nau jêr, kol, ngăn lah neh gay ma nkra trong. Wa Hoàng Đình Chương, Giám đốc Công ty An Nguyên, ƀư ndơn nau nkra du gưl nau kan mrô 4 bah bôk nau kan, geh rnoh jong 10km mbơh, rnôk aơ dôl mô tŏng nklăp 200 rbăn mét khối neh mbêng, khuch tât nau ngăch kan. Tĭng wa Chương, nau kan nê lah nau bah nŭih ntuh kơl ndrel aơ lah nau jêr rnôk ê geh joi saơ neh gay ma nkra:

            ‘Tâm nau nkra lah du rkeh mét khối neh, yơn mô tŏng 200 rbăn m3 lah mô geh neh mbêng. Tâm nê lŏ geh tâm rnoh ntuh kơl mrô 4 bah Công ty An Nguyên, rnôk aơ mhâm geh joi 200 rbăn mét khối neh ƀư. Tơm ntuh kơl mbơh ê geh joi saơ ntŭk neh ƀư kan”.

            Mô tŏng neh mbêng lah nau dôl geh bah âk nau kan tâm n’gor Dak Lak, kơt nau nkra nglau dak Ea Tam, đah rnoh ntuh kơl 1.500 rmen ndrel nau kan nkra trong Đông-Tây đah rnoh ntuh kơl rlau 1.200 rmen, yor Rnâng kan mât nau kan nkuăl ƀon têh Buôn Ma Thuột ƀư tơm. Wa Lê Khắc Đô, Kruanh jrâu kan khoáng sản, N’gâng kan ntŭk ntu gŭ âm n’gor Dak Lak mbơh, bah năp nơh nau ŭch neh brôi ê geh uănh ngăn ri tât nau rgum ƀư nau kan ơm bah lam n’gor mô geh neh. Nau ƀư sŏk neh knŭng ndăn tă bah kan êng mô lah sŏk neh lŭ yơn lah rnoh neh kŏ mô tŏng yor âk nau kan dôl ƀư kơt rnôk aơ.

            Gay dơi doh rklaih mpeh neh ân ăp nau kan, khay 2 năm 2022 N’gâng kan ntŭk ntu gŭ âm mbơh nchră nau ân UBND n’gor Dak Lak rgum uănh joi 59 ntŭk neh, đah rnoh nklăp 20 rkeh mét khối, tŏng đŏng ƀư nau kan.Yơn lah, nau ƀư pă săm ƀŭt ân geh dŏng neh ri kâp 7 tât 8 khay, du đê̆ nau kan hôm mbrơi. Wa Lê Khắc Đô kŏ mbơh, đah ăp nau kan mô tŏng neh lah êng, mô tŏng ndơ dŏng lah nsum geh nau kan bah tơm ntuh kơl ndrel rmôt ƀư nau ê nkra:

            ‘Nau kan bah khân păng lah  hăn uănh gay ma săch ndơ dŏng. Nau ƀư bah nau kan ntuh kơl ndâk nkra ri nau kan kuih kuai gay ma mbêng bât lah nơm ân geh gĭt ntŭk gay ma nkhŭt ndok tâm nau kan lah geh ndơ dŏng hôm geh rmeh, lah mô tŏng ri nơm ân geh ntŭk gay ma hăn sŏk. Rmôt ƀư nau kan ân geh săch luh ăp ntŭk neh, choih lŭ ân tâm di ma nau kan, jêh ri mơ đă ƀư nau kan. Kơt lah tâm rnôk ndâk nau kan ntuh kơl ri ân geh ƀư ăp nhoat nê hôm, ntơm bah tơm prăk ân tât nau ƀư nau kan, nau nchrăp kan ân geh tŏng pe nhoat”.

            Tâm nau kan êng, wa Trần Đình Nhuận, Giám đốc N’gâng kan ntŭk ntu gŭ âm bah n’gor Dak Lak mbơh, nau kol tâm nau ƀư nau kan sŏk neh gay ma ƀư ăp nau kan hôm geh nau kol bah nau ntrŭnh. Tĭng Luật neh ntu, đah nroh ri ân geh ƀư tĭng nau nchrăp. Yơn nau kan ntŭk ƀư kan hăn tâm nchră ma ƀon lan gay ma sŏk ri rnoh khlay, geh rnôk ri hao tât âk jêt rmen tâm du ha, mô dơi ƀư. Đah nau kan tơm bah neh dak, Quốc hội, Chính phủ ntrŭnh nau kan êng gay ma doh rklaih yơn đah ăp nau kan tâm nkuăl ri jêr ngăn:

            ‘Tĭng khoản 3, Điều 62 Luật neh ntu ri Ngih dak sŏk nsĭt lơi neh yơn lŏ knŭp lơi ăp ntil ndơ neh choih êng êng, kơt lah neh brôi, choih, lŭ, nau kan ân geh tâm di ma nau tă nchră. Tâm nau aơ, lah Ngih dak sŏk nsĭt gay ma ƀư nau dơi pă săm ƀŭt mêt uănh ân geh ntuh kơl nkre ri tă bah nau nchrăp kan ân geh uănh năl nê lah nau ê nkra tă tâm dâng bah nau kan ntuh kơl ri mơ geh nau dơi gay ma sŏk nkân lơi. Tâm ăp nau kan têh kơt lah trong cao tốc Bắc-Nam ri Quốc hội, Chính phủ geh nau ntrŭnh êng. Yơn ăp nau kan tâm n’gor, tâm nkuăl ri jêr ngăn”.

            Nau mô tŏng neh brôi dôl ma ƀư âk ntŭk kan, nau kan têh tâm n’gor Dak Lak mra geh nau mbrơi kan. Ndrel đah ăp nau kol tâm nau rgum, uănh, ndâk nau kan, geh nau dơi bah tơm ntuh kơl ndrel ăp rmôt kan geh tât ri nau sŏk neh gay ma kơl ân nau kan nau ƀư kŏ dôl mâp âk nau nking kol ân geh doh rklaih tă bah nau ntrŭnh, nau kơl mpeh neh ntu, lŭ choih./.

                                    Nŭih rblang: H’Thi