VOV4.M’nông: Mô êng knŭng ƀư nau kan lah n’gâng tơm, leo trong lor, bonh đă kônh wa tâm kơl hun hao văng sa, rêh jêng, jut n’huch ach o, ăp đảng viên nŭih rnoi mpôl đê̆ tâm Dak Lak hôm tâm dăch lơn đah ƀon lan tâm nau rklaih nau kol, ntoh luh êng tâm ƀon lan. Ntơm bah nê njêng nau tâm ban, ndâk njêng ƀon lan tâm rnglăp, tâm dăch, ndrel mât nau tâm rnơm đah ƀon lan ndrel Đảng.

Yan aơ, kônh wa xã Ea Tiêu, nkuăl Cư Kuin, n’gor Dak Lak rhơn ngăn rnôk ntơm yan klih tiêu. Bri mih nar mô lăng ueh ri ma nau geh tiêu n’huch nklăp 30% rđil năm e, yơn nŭih ƀon lan tâm xã hôm gơih tâm nau kan. Yor mô êng tăm êng du ntil tơm tiêu, ma âk ngăn kônh wa bu tăm nsum ma ăp ntil tơm êng tâm lôch năm. Tâm du blah neh, rnôk aơ, nau geh bah kônh wa hao ntơm 30-40%. Nau rêh bah ƀon lan geh rgâl, rgop nau n’huch ach o tâm nkuăl. Gay dơi geh nau nê, geh nau rgop âk ngăn bah ăp đảng viên tâm ăp chi bộ thôn, ƀon tâm nau nkoch trêng, gay ƀon lan rgâl nau mĭn tâm nau kan tuch tăm, ntih kơl hun hao văng sa. Wa Y Bom Byă, Bí thư chi bộ ƀon Ê Bung, Xã Ea Tiêu, nkuăl Cư Kuin, mbơh:

‘Tâm ăp tơ̆ rƀŭn chi bộ pơk hvi geh rnâng kan mât njrăng nau kan, ntrong kan chính trị kŏ nkoch trêng ân kônh wa n’hao nau săk geh văng sa, kơt: rvăt phân poh, kơt tĭng ăp nau blau nau kan mhe tâm nau tuch tăm. Ƀon phung hên tăm cà phê, tiêu, sầu riêng nsum đah ăp ntil êng ân geh săk rnglay văng sa âk lơn. Nkoch mbơh ân kônh wa hun hao văng sa, rnăk vâl”.

Lah kơt đảng viên ranh Y Bom geh âk nau blau tâm nau kan bonh đă ân ăp nŭih ƀon lan, ri ăp đảng viên mom lah nŭih rnoi mpôl đê̆ lŏ geh tâm nuih n’hâm nơm nau gơih kan, janh mĭn, janh kan. Nô Y Khăn Niê, deh năm 1991, Bí thư Chi bộ ƀon Knir lah du ntoh mhô. Ntơm bah nar geh săch ƀư Bí thư chi bộ, nô ndơn dơi nau kan têh bah nơm. Mô êng knŭng nsôih tâm nau kan, păng mro nsôih tâm nau rêh, nau blau gay ma ƀon la ŭch rŏng. Buôn Knir geh 90% lah nŭih rnoi mpôl đê̆, 98% tĭng chroh tin lành, ăp năm rlau aơ, nau kan đăp mpăn chính trị, rêh jêng tâm aơ mro geh mât nâp. Nau ntŭng ndoh ndơ, ngêt ndrănh, tâm lơh hŏ n’huch âk. Ngăn lah, âk bu mom gơih pah kan jan sa geh ăp rmôt kan kơl an jêng ăp nŭih ƀư kan nsum, đoàn viên gĭt blau mbơh ân chi bộ tâm dâng. Nô Y Khăn Niê, Bí thư chi bộ Buôn Knir, xã Ea Tiêu, nkuăl Cư Kuin, ngơi:

‘Chi bộ ƀon Knir rơh rlau aơ kŏ nsôih ân geh rnglăp âk lơn nŭih đảng viên, rnôk aơ kŏ geh nglăp du đê̆ nŭih đảng viên mom tâm năm hôm ndăm. Nsôih bonh đă ân ƀon lan hun hao văng sa, sŏk rmôt cán bộ đảng viên leo trong lor, hăn lor gay ƀon lan kơt tĭng, nkoch mbơh gay ma ƀon lan gĭt kloh ndrel ƀư tĭng ăp nau ntrŭnh, ntrong kan bah Đảng ndrel Ngih dak”.

Wa Y’Min Ênuôl, Bí thư Đảng uỷ xã Ea Tiêu, nkuăl Cư Kuin mbơh: Lam xã geh 37 chi bộ, tâm 24 thôn, ƀon, đah 645 đảng viên. Tâm nê, geh 125 đảng viên lah nŭih rnoi mpôl đê̆. Đah 100% ăp thôn, ƀon geh nŭih rnoi mpôl đê̆ rêh, ndri ma đảng viên rnoi mpôl đê̆ lah oh kon, lah băl leo kan tâm trong hun hao văng sa, jut n’huch ach o, ndâk njêng ƀon lan mhe. Gay ma kơl an ăp nŭih rnoi mpôl đê̆ ƀư nâp lơn ndrel hăn jru lơn tâm nau kơl an ƀon lan, Đảng uỷ xã hŏ tâm pă nau kan ân ăp đồng chí uỷ viên tât rƀŭn rgum tâm ăp chi bộ, thôn, ƀon. Ntơm bah nau tâm dăch, tâm djăt, rklaih ân năn ăp nau rgop mbơh đă bah ƀon lan ăp đảng viên jêng ntung njŏ, njêng nau rnơm bah ƀon lan ma Đảng. Wa Y Min Ênuôl, Bí thư Đảng uỷ xã Ea Tiêu, mbơh tay:

‘Đảng viên ƀư nau kan rƀŭn rgum tâm thôn, ƀon ri rhơn ngăn. Ăp nau ma ƀon lan bu ŭch joi lah geh rklaih nkre ro yor lah đảng viên lah nŭih ƀư kan nkre. Ntă rnôk ƀon lan ŭch mâp nŭih cán bộ mô lah geh nau ŭch tâm rgop tâm nchră ăp nau kan hôm kol, hôm jêr tâm ƀon nê mô lah chi bộ mhâm nau ƀư, mô lah đảng viên tâm nkuăl geh moh nau rgop ŭch ri ăp đồng chí nê mbơh nau rgop ân ma hên gĭt, mô lah phung hên ƀư tih ri ăp nŭih nê ân geh nau rgop đă gay ma hên geh ntrơn rgâl”.

Đah nuih n’hâm, nau kan gơih, pah kan rjăp bah nơm, ăp đảng viên nŭih rnoi mpôl đê̆ tâm xã Ea Tiêu, nkuăl Cư Kuin, n’gor Dak Lak hŏ ƀư rjăp ndrel ƀư ueh nau kan tơm gay ma ma kơl Đảng, n’gâng kan tâm nkuăl ntrŭnh ƀư ân săk tam ăp nau ntrŭnh, ntrong kan, ngăn lah ăp nau geh geh tât hun hao văng sa, rêh jêng nkuăl rnoi mpôl đê̆. Đảng viên lah nŭih rnoi mpôl đê̆ lah rse geh nau tâm nthoi ân rjăp nau tâm rnglăp ăp rnoi mpôl, rgop nau mât nâp đăp mpăn chính trị, đăp mpăn rnă njrăng ƀon lan, ntrŭt dăng nau văng sa rêh jêng bah nkuăl./.

Nŭih rblang: H’Thi