VOV4.M’nông- Di rơh kahgĭt 75 năm nar tahen sôt rmanh, tahen khĭt tâm lơh kăl e 27/7, n’gor Dak Lak ntêm an rlău 13 rmen prăk gay ma pă ndơ an ăp nuĭh dơi kơl, nuĭh geh kan đah cách mạng. Rnoh prăk rlău 13 rmen prăk aơ mbra geh pă an bơi tât 42.500 nuĭh geh kan đah cách mạng ta n’gor. Tâm nĕ, ndơ pă an bâh kruanh dak đah rnoh prăk rlău 4 rmen 200 rkeh prăk, rnoh prăk hôm e lah ndơ bâh n’gor n’hanh ăp ntŭk. Ndơ pă an geh pă jêng 2 rnoh: 600 rbăn prăk n’hanh 300 rbăn prăk. Na nê̆, rnoh ndơ 600 rbăn prăk mbra geh pă an ăp nuĭh mê̆ Việt Nam anh hùng, rnăk vâl tahen khĭt tâm lơh dôl geh dơn ndơ kơl an ăp khay, tahen sôt rmanh geh rnoh sôt ji tâm săk jăn bâh 81% let lơ. Rnoh ndơ pă an 300 rbăn prăk pă an tahen sôt rmanh, tahen geh nău ji mô dăng pah kan bâh 80% let dâng; tahen sôt rmanh mô dăng pah kan, nuĭh pah kan ta rơh tâm lơh geh ntưp dak si dioxin geh rnoh khuch săk jăn bâh 80% let dâng, ndơn kan an rnăk vâl tahen sôt rmanh, nuĭh mbah ryơk tahen khĭt.

Nuĭh rblang: Thị Đoắt