VOV4.M’nông – Bah bôk năm 2022 tât aƀaơ, Ntŭk joi mbơh nău kan, N’gâng kan Lao động Thương binh n’hanh Xã hội n’gor Dak Lak lĕ mkra nău kơl bảo hiểm mô geh nău kan đah 8.640 sam ƀŭt rhăch nău, hao 43,8% nkôp đah rơh aơ năm 2021. Tĭng Ntŭk mbơh joi nău kan Dak Lak, tâm rnoh rlău 8.600 sam ƀŭt rhăch nău đă mkra nău kơl bảo hiểm mô geh nău kan, geh rlău 5.700 nuĭh pah kan ta ăp n’gor êng, rlău 2.800 nuĭh ta ntŭk, dĭng lĕ rnoh prăk trok an bảo hiểm mô geh nău kan lah 132 rmen prăk.

Nuĭh pah kan ƀư sam ƀŭt ntop kơl yor khuch bah Covid-19 ta Dak Lak

Nkre Ntŭk kan ntop kơl ntĭm nti nău kan an 310 nuĭh dôl geh nău kơl bảo hiểm mô geh nău kan, đah rnoh prăk ntop kơl 1 rmen 900 rkeh prăk. Tĭng wa Trần Xuân Đa, Groi giám đốc ntŭk kan, gay kơl nuĭh pah kan mô geh nău kan ơm dơi bảo hiểm mô geh nău kan, tâm 3 khay dŭt năm ntŭk kan mbra n’hao nuĭh pah kan an Ntŭk kan mbơh joi ta nkual têh Buôn Hồ, nkuăl Ea Kar n’hanh ta ntŭk kan gay wơt dơn, mkra nău kơl bảo hiểm mô geh nău kan gay đăp mpăn trong way ƀư 3 di: di nuĭh, di nău kơl n’hanh di nar.

 Nuĭh rlang: Y Sưng Phê Ja